ದುಲ್ಕರ್ ಸಲ್ಮಾನ್, ದಕ್ಷಿಣ ಚಿತ್ರರಂಗದ ಬಹುಬೇಡಿಕೆ ತಾರೆಯಲ್ಲೋರ್ವರು. ತಮ್ಮ ಅಮೋಘ ಅಭಿನಯದಿಂದ ಅಪಾರ ಸಂಖ್ಯೆಯ ಅಭಿಮಾನಿಗಳನ್ನು ಸಂಪಾದಿಸಿದ್ದಾರೆ. ಅತ್ಯುತ್ತಮ ನಟನೆಗೆ ಪ್ರೇಕ್ಷಕರ ಮೆಚ್ಚುಗೆ ಸಂಪಾದಿಸಿದ್ದಾರೆ. ಮುಂದಿನ ಚಿತ್ರಗಳ ಬಗ್ಗೆ ಪ್ರೇಕ್ಷಕರು ಕುತೂಹಲ ವ್ಯಕ್ತಪಡಿಸುತ್ತಿದ್ದು, ಸಾಮಾಜಿಕ ಜಾಲತಾಣದಲ್ಲಿ ನಟನ ವಿಡಿಯೋವೊಂದು ಜಾಗ ಗಿಟ್ಟಿಸಿಕೊಂಡಿದೆ.
ವೆಂಕಿ ಅಟ್ಲೂರಿ ನಿರ್ದೇಶನದ 'ಲಕ್ಕಿ ಭಾಸ್ಕರ್' ನಟನ ಮುಂಬರುವ ಬಹುನಿರೀಕ್ಷಿತ ಚಿತ್ರ. ಇತ್ತೀಚೆಗೆ, ಹೈದರಾಬಾದ್ನ ಪ್ರಸಿದ್ಧ ಕೋಟಿ ಮಹಿಳಾ ಕಾಲೇಜಿನ ಚಿತ್ರೀಕರಣದ ಸ್ಥಳದಲ್ಲಿ ನಟ ಕಾಣಿಸಿಕೊಂಡರು. ಇದರ ಫೋಟೋ-ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದೆ.
ವೆಂಕಿ ಅಟ್ಲೂರಿ ಆ್ಯಕ್ಷನ್ ಕಟ್ ಹೇಳುತ್ತಿರುವ ಈ ಬಹುನಿರಿಕ್ಷಿತ ಸಿನಿಮಾದಲ್ಲಿ ಸೂಪರ್ ಸ್ಟಾರ್ ದುಲ್ಕರ್ ಸಲ್ಮಾನ್ ಮುಖ್ಯಭೂಮಿಕೆಯಲ್ಲಿದ್ದಾರೆ. ಇತ್ತೀಚೆಗಷ್ಟೇ ನಟ ತಮ್ಮ ಅಧಿಕೃತ ಸಾಮಾಜಿಕ ಮಾಧ್ಯಮದಲ್ಲಿ ಚಿತ್ರದ ಫಸ್ಟ್ ಲುಕ್ ಪೋಸ್ಟರ್ ಅನ್ನು ಹಂಚಿಕೊಂಡಿದ್ದರು. ತಮ್ಮ ಹೊಸ ಅವತಾರ ಪ್ರದರ್ಶಿಸೋ ಮೂಲಕ ಅಭಿಮಾನಿಗಳ ಕುತೂಹಲ ಹೆಚ್ಚಿಸಿದ್ದರು.
ಇದೀಗ ತಮ್ಮ ಇನ್ಸ್ಟಾಗ್ರಾಮ್ ಸ್ಟೋರಿನಲ್ಲಿ ದುಲ್ಕರ್ ಸಲ್ಮಾನ್ ಚಿತ್ರೀಕರಣಕ್ಕಾಗಿ ಹೈದರಾಬಾದ್ನ ಕೋಟಿ ವುಮನ್ಸ್ ಕಾಲೇಜಿಗೆ ಆಗಮಿಸಿರುವ ವಿಡಿಯೋವನ್ನು ಹಂಚಿಕೊಂಡಿದ್ದರು. ನಟ ತಮ್ಮ ವಾಹನದಿಂದ ಹೊರಬರುತ್ತಿದ್ದಂತೆ, ಅವರಿಗಾಗಿ ಕಾದು ಕುಳಿತಿದ್ದ ಜನಸಾಗರ ಅವರನ್ನು ಸುತ್ತುವರೆಯಿತು. ಶರ್ಟ್, ಟೈ, ಪ್ಯಾಂಟ್ ಮತ್ತು ಏವಿಯೇಟರ್ ಸನ್ ಗ್ಲಾಸ್‌ ಧರಿಸಿ ನಟ ಆಕರ್ಷಕ ನೋಟದಲ್ಲಿ ಕಾಣಿಸಿಕೊಂಡರು. ಮೆಟ್ಟಿಲುಗಳನ್ನು ಹತ್ತುವಾಗ ಅಭಿಮಾನಿಗಳತ್ತ ಕೈ ಬೀಸಿದರು.
ಇನ್ಸ್ಟಾಗ್ರಾಮ್ನ ಹಿಂದಿನ ಪೋಸ್ಟ್‌ನಲ್ಲಿ, 'ಲಕ್ಕಿ ಭಾಸ್ಕರ್'ನ ಒಂದು ನೋಟವನ್ನು ಹಂಚಿಕೊಂಡಿದ್ದರು. ಗಂಭೀರ ನೋಟದಲ್ಲಿ ಕಾಣಿಸಿಕೊಂಡ ಅವರ ಸುತ್ತಲೂ ನೋಟುಗಳ ಸ್ಟಾಕ್ ಇತ್ತು. ಸಿತಾರಾ ಎಂಟರ್‌ಟೈನ್‌ಮೆಂಟ್ ಮತ್ತು ಫಾರ್ಚೂನ್ ಫೋರ್ ಸಿನಿಮಾಸ್‌ ನಿರ್ಮಾಣದ ಈ ಸಿನಿಮಾ ಕುರಿತು ಚಿತ್ರತಂಡ ಹೆಚ್ಚಿನ ಗುಟ್ಟನ್ನು ಬಿಟ್ಟುಕೊಟ್ಟಿಲ್ಲ.
ಇದನ್ನೂ ಓದಿ: 'ಕೈಲಾಸ ಕಾಸಿದ್ರೆ' ಟ್ರೇಲರ್ ರಿಲೀಸ್: ಮಾ.8ಕ್ಕೆ ಸಿನಿಮಾ ಬಿಡುಗಡೆ
ಪೋಸ್ಟ್ ಶೇರ್ ಮಾಡಿದ ನಟ, "ಸಿನಿ ಪಯಣಕ್ಕೆ ಹನ್ನೆರಡು ವರ್ಷಗಳ ಸಂಭ್ರಮ. ನಮ್ಮ ಬಹುನಿರೀಕ್ಷಿತ ಲಕ್ಕಿ ಭಾಸ್ಕರ್ನ ಫಸ್ಟ್ ಲುಕ್ ಪೋಸ್ಟರ್ ನಿಮಗಾಗಿ. ಶೀಘ್ರದಲ್ಲೇ ಚಿತ್ರಮಂದಿರಗಳಲ್ಲಿ ನಮ್ಮ ಸಿನಿಮಾ ತೆಲುಗು, ಮಲಯಾಳಂ, ತಮಿಳು ಮತ್ತು ಹಿಂದಿಯಲ್ಲಿ ಬಿಡುಗಡೆ ಆಗಲಿದೆ" ಎಂದು ಬರೆದುಕೊಂಡಿದ್ದರು.
ಇದನ್ನೂ ಓದಿ: 'ಶಭ್ಬಾಷ್' ಎರಡನೇ ಹಂತದ ಚಿತ್ರೀಕರಣ ಪೂರ್ಣ
ದುಲ್ಕರ್ ಸಲ್ಮಾನ್ ಕೊನೆಯದಾಗಿ ಆ್ಯಕ್ಷನ್-ಪ್ಯಾಕ್ಡ್ ಸಿನಿಮಾ 'ಕಿಂಗ್ ಆಫ್ ಕೋಥಾ'ದಲ್ಲಿ ಕಾಣಿಸಿಕೊಂಡರು. ದುಲ್ಕರ್ ಸಲ್ಮಾನ್ ನಿರ್ಮಾಣದ ಚೊಚ್ಚಲ ಚಿತ್ರವಿದು. ತಮ್ಮ ನಟನಾ ಕೌಶಲ್ಯವನ್ನು ಸಾಬೀತುಪಡಿಸಿದ್ದಲ್ಲದೇ, ನಿರ್ಮಾಪಕರಾಗಿಯೂ ಯಶ ಕಂಡಿದ್ದಾರೆ. ನಟನ ಮುಂದಿನ ಚಿತ್ರಗಳ ಮೇಲೆ ಸಾಕಷ್ಟು ನಿರೀಕ್ಷೆಗಳಿವೆ.
