ಬಾಕ್ಸ್ ಆಫೀಸ್‌ನಲ್ಲಿ ಮೊದಲ ದಿನವೇ ಆ್ಯಕ್ಷನ್ ಪ್ರಿನ್ಸ್ ಕಮಾಲ್​: 'ಮಾರ್ಟಿನ್' ಗಳಿಸಿದ್ದೆಷ್ಟು?

ಧ್ರುವ ಸರ್ಜಾ ಅಭಿನಯದ 'ಮಾರ್ಟಿನ್' ಸಿನಿಮಾಕ್ಕೆ ಬಾಕ್ಸ್ ಆಫೀಸ್‌ನಲ್ಲಿ ಮೊದಲ ದಿನವೇ ಉತ್ತಮ ಆರಂಭ ಸಿಕ್ಕಿದೆ. ಚಿತ್ರದ ಗಳಿಕೆ ಕುರಿತಂತೆ ಧ್ರುವ ಸರ್ಜಾ ಆಪ್ತರೊಬ್ಬರು ಅಂಕಿ-ಅಂಶಗಳ ಮಾಹಿತಿ ನೀಡಿದ್ದಾರೆ.

'ಪೊಗರು' ಚಿತ್ರದ ಬಳಿಕ ಆ್ಯಕ್ಷನ್ ಪ್ರಿನ್ಸ್ ಧ್ರುವ ಸರ್ಜಾ ಅಭಿನಯದ ಹೈವೋಲ್ಟೇಜ್ 'ಮಾರ್ಟಿನ್' ಸಿನಿಮಾ ರಿಲೀಸ್​ ಆದ ದಿನವೇ ಬಾಕ್ಸ್ ಆಫೀಸ್‌ನಲ್ಲಿ ಕಮಾಲ್ ಮಾಡಿದೆ. ಮೊದಲ ಬಾರಿಗೆ ದ್ವಿಪಾತ್ರದಲ್ಲಿ ಸಿಲ್ವರ್ ಸ್ಕ್ರೀನ್ ಮೇಲೆ 'ಮಾರ್ಟಿನ್' ಆಗಿ ಅಬ್ಬರಿಸಿರುವ ಧ್ರುವ ಮತ್ತೊಮ್ಮೆ ತಾವೊಬ್ಬ ಆ್ಯಕ್ಷನ್ ಹೀರೋ ಅಂತಾ ಸಾಬೀತು ಮಾಡಿದ್ದಾರೆ.

ಉದ್ದುದ್ದ ಡೈಲಾಗ್ ಹೊಡೆಯುತ್ತ, ಆ್ಯಕ್ಷನ್​ಗಳಲ್ಲಿ ಮಾಸ್ ಹೀರೋ ಅಂತಾ ಬ್ರಾಂಡ್ ಆಗಿದ್ದ ಧ್ರುವ ಸರ್ಜಾ, ಈ ಚಿತ್ರದಲ್ಲಿ ಥ್ರಿಲ್ ಎನಿಸುವ ಆ್ಯಕ್ಷನ್​ಗ​ಳಿಂದಲೇ ಅಭಿಮಾನಿಗಳ ದಿಲ್ ಖುಷ್ ಮಾಡಿದ್ದಾರೆ. ಸದ್ಯ ಆಯುಧ ಪೂಜೆಯ ದಿನದಂದು ಬಿಡುಗಡೆ ಆಗಿರುವ 'ಮಾರ್ಟಿನ್', ಅಂದುಕೊಂಡಂತೆ ಬಾಕ್ಸ್ ಆಫೀಸ್‌ನಲ್ಲಿ ಧೂಳ್ ಎಬ್ಬಿಸಿದೆ.

ಮಾರ್ಟಿನ್ ಸಿನಿಮಾದ ಫಸ್ಟ್ ಡೇ ಕಲೆಕ್ಷನ್‌ ಎಷ್ಟು ಎಂಬ ವಿಚಾರ ಗಾಂಧಿನಗರದಿಂದ ಹಿಡಿದು ಬನಶಂಕರಿ ಸಮೀಪ ಇರುವ ಧ್ರುವ ಸರ್ಜಾ ಮನೆ ತನಕವೂ ಚರ್ಚೆ ಆಗುತ್ತಿದೆ. ಧ್ರುವ ಆಪ್ತರೊಬ್ಬರು ಹೇಳುವ ಪ್ರಕಾರ ಚಿತ್ರಕ್ಕೆ ಕನ್ನಡ, ತೆಲುಗು, ತಮಿಳು, ಮಲಯಾಳಂ ಸೇರಿದಂತೆ ಎಲ್ಲಾ ಭಾಷೆಯಲ್ಲಿ ಭರ್ಜರಿ ಓಪನಿಂಗ್ ಸಿಕ್ಕಿದ್ದು, ಮಾರ್ಟಿನ್ 14 ಕೋಟಿ ರೂ.ಗೂ ಹೆಚ್ಚು ಕಲೆಕ್ಷನ್‌ ಮಾಡಿದೆಯಂತೆ.

ಅವರೇ ಹೇಳುವಂತೆ, ಕರ್ನಾಟಕದಲ್ಲಿ 300ಕ್ಕೂ ಚಿತ್ರಮಂದಿರ 900ಕ್ಕೂ ಹೆಚ್ಚು ಶೋಗಳು, ಬುಕ್ ಮೈ ಶೋನಲ್ಲಿ 24 ಗಂಟೆಯಲ್ಲಿ 93 ಸಾವಿರ ಟಿಕೆಟ್ ಬುಕ್ಕಿಂಗ್ ಆಗಿವೆ. ಈ ಲೆಕ್ಕಾಚಾರದ ಜೊತೆಗೆ, ಎಲ್ಲಾ ಥಿಯೇಟರ್ ಹೌಸ್​​ಫುಲ್ ಆದ ಕಾರಣ ಕರ್ನಾಟಕದಲ್ಲಿ 8 ಕೋಟಿ ರೂಪಾಯಿ ಕಲೆಕ್ಷನ್​ ಆಗಿದೆ. ತೆಲುಗಿನಲ್ಲಿ 2 ಕೋಟಿ, ಹಿಂದಿಯಲ್ಲಿ 2 ಕೋಟಿ, ತಮಿಳಿನಲ್ಲಿ 1.5 ಕೋಟಿ ಹಾಗೂ ಮಲೆಯಾಳಂನಲ್ಲಿ 1 ಕೋಟಿ ರೂಪಾಯಿ ಸಂಗ್ರಹ ಮಾಡಿದೆ‌ ಅಂತಾ ಅಂದಾಜಿನ ಲೆಕ್ಕ ಕೊಟ್ಟಿದ್ದಾರೆ.

ಮಾರ್ಟಿನ್ ಪೋಸ್ಟರ್​ (Cinema Team)

ಶನಿವಾರ ಹಾಗೂ ಭಾನುವಾರ ರಜೆ ಇರುವ ಕಾರಣ ಕರ್ನಾಟಕದಲ್ಲಿ ಎರಡು ದಿನಕ್ಕೆ 5 ಕೋಟಿ ಕಲೆಕ್ಷನ್‌ ಆಗುವ ಸಾಧ್ಯತೆ ಇದೆ. ಸೋಮವಾರದ ವೇಳೆಗೆ 19ರಿಂದ 20 ಕೋಟಿ ರೂ. ಗಳಿಸುವ ಸಾಧ್ಯತೆಯಿದೆ. ವಿಶ್ವದಾದ್ಯಂತ ರಿಲೀಸ್ ಆಗಿರುವ ಕಾರಣ ಯಾವ ದೇಶದಲ್ಲಿ ಎಷ್ಟು ಕಲೆಕ್ಷನ್‌ ಆಗಿದೆ ಎಂಬುದು ಸೋಮವಾರ ಲೆಕ್ಕ ಸಿಗಲಿದೆ ಅಂತಾ ಧ್ರುವ ಸರ್ಜಾ ಆಪ್ತರು ಅಂಕಿ-ಅಂಶಗಳ ಬಗ್ಗೆ ಮಾಹಿತಿ ನೀಡಿದ್ದಾರೆ.

ಇದನ್ನೂ ಓದಿ: ನಟರಾಕ್ಷಸ ಡಾಲಿ ಧನಂಜಯ್ ನಿರ್ಮಾಣದ 'JC' ಮೇಕಿಂಗ್ ವಿಡಿಯೋ ರಿಲೀಸ್

ಭಾರತ ಹಾಗೂ ಪಾಕಿಸ್ತಾನದ ಜೊತೆ ಸಾಗುವ ಚಿತ್ರದಲ್ಲಿ ಆ್ಯಕ್ಷನ್ ಪ್ರಿನ್ಸ್ ಹೀರೋ ಹಾಗೂ ಖಳನಾಯಕನಾಗಿ ಮಿಂಚಿದ್ದಾರೆ. ಧ್ರುವಗೆ ಜೋಡಿಯಾಗಿ ವೈಭವಿ ಶಾಂಡಿಲ್ಯಾ ನಟಿಸಿದ್ದು, ಅನ್ವೇಶಿ ಜೈನ್, ನಿಕಿತಿನ್ ಧೀರ್ ಸೇರಿದಂತೆ ದೊಡ್ಡ ತಾರಾಬಳಗವಿದೆ. ಬೆಂಗಳೂರು ಹಾಗೂ ಕಾಶ್ಮೀರದ ಸುಂದರ ತಾಣಗಳಲ್ಲಿ ಶೂಟಿಂಗ್ ಮಾಡಲಾಗಿದೆ.

ಕಾಶ್ಮೀರದ ಐಸ್‌ ವಾರ್ ಸಾಹಸ ದೃಶ್ಯಗಳ ಜೊತೆಗೆ, ರೋಮಾಂಚನಕಾರಿ ಸ್ಕೇಟಿಂಗ್ ಆ್ಯಕ್ಷನ್ ಸೀನ್‌ಗಳು ಚಿತ್ರದಲ್ಲಿವೆ. ಕ್ಲೈಮ್ಯಾಕ್ಸ್ ಸನ್ನಿವೇಶಗಳನ್ನು ಸಾಹಸ ನಿರ್ದೇಶಕರಾದ ರವಿವರ್ಮ ಹಾಗೂ ರಾಮ್ ಲಕ್ಷ್ಮಣ್ ಕಂಪೋಸ್ ಮಾಡಿದ್ದಾರೆ. ನಿರ್ಮಾಪಕ ಉದಯ್ ಕೆ‌‌.ಮೆಹ್ತಾ ಹಾಕಿರುವ ಹಣಕ್ಕೆ ಪ್ರತಿಯಾಗಿ ಮಾರ್ಟಿನ್ ಎಷ್ಟು ಕಲೆಕ್ಷನ್‌ ಮಾಡಲಿದೆ ಎಂಬುದು ಈ ವಾರದಲ್ಲಿ ಗೊತ್ತಾಗಲಿದೆ.

ಇದನ್ನೂ ಓದಿ: ರಾಮ್​ ಚರಣ್​, ಕಿಯಾರಾ ಅಡ್ವಾಣಿ ನಟನೆಯ 'ಗೇಮ್​​ ಚೇಂಜರ್'​​ ಬಿಡುಗಡೆ ದಿನಾಂಕ ಮುಂದೂಡಿಕೆ