ಕಿರುತೆರೆ ಲೋಕದ ಅತ್ಯಂತ ಜನಪ್ರಿಯ ಕಾರ್ಯಕ್ರಮ 'ಬಿಗ್ ಬಾಸ್ ಕನ್ನಡ ಸೀಸನ್ 11' ಏಳನೇ ವಾರಾಂತ್ಯ ಸಮೀಪಿಸಿದೆ. ಏಳನೇ ವಾರದ ಟಾಸ್ಕ್ ಭಾಗವಾಗಿ ಜೋಡಿ ಚಟುವಟಿಕೆಗಳು ನಡೆದಿದೆ. ಅದರಂತೆ, ಮೋಕ್ಷಿತಾ ಮತ್ತು ಧನರಾಜ್ ಒಂದು ಜೋಡಿಯಾಗಿ ಆಟ ಆಡಿದ್ದರು. ಆದರೆ ಈಗ ಇವರ ನಡುವೆ ಬಿರುಕು ಮೂಡಿದಂತೆ ತೋರುತ್ತಿದೆ. ಬಹಳ ನಾಜೂಕು ನಡೆಯಿಂದ ಗುರುತಿಸಿಕೊಂಡಿದ್ದ ಧನರಾಜ್ ಆಚಾರ್ ಅವರಿಂದು ಕೆರಳಿ ಕೆಂಡವಾಗಿದ್ದಾರೆ.
''ಕಳಪೆ ಆಯ್ಕೆಗಾಗಿ ಕಟ್ ಆಯ್ತಾ ಪಾರ್ಟ್ನರ್ಶಿಪ್?'' ಬಿಗ್ ಬಾಸ್ ಕನ್ನಡ ಸೀಸನ್ 11. ಸೋಮ-ಶುಕ್ರ ರಾತ್ರಿ 9:30ಕ್ಕೆ ಪ್ರಸಾರ ಎಂಬ ಕ್ಯಾಪ್ಷನ್ನೊಂದಿಗೆ ಇಂದಿನ ಸಂಚಿಕೆಯ ಪ್ರೋಮೋ ಅನಾವರಣಗೊಂಡಿದೆ. ಪ್ರತೀ ವಾರದಂತೆ ಕಳಪೆ ಪಟ್ಟ ಕೊಡಲು ಸ್ಪರ್ಧಿಗಳು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ಧನರಾಜ್ ಆಚಾರ್ ಪಾರ್ಟರ್ ಆಗಿದ್ದ ಮೋಕ್ಷಿತಾ ಅವರು ಧನರಾಜ್ ಅವರಿಗೇನೆ ಕಳಪೆ ಪಟ್ಟ ಕೊಟ್ಟಿದ್ದಾರೆ. ಧನರಾಜ್ ಅವರ ಸರದಿ ಬಂದಾಗ ಅವರ ಪ್ರತಿಕ್ರಿಯೆ ಬಹಳ ಖಾರವಾಗಿತ್ತು. ಈ ನಡೆ ಮಿಶ್ರ ಪ್ರತಿಕ್ರಿಯೆ ಸ್ವೀಕರಿಸಿದೆ.
ಕಳಪೆಯನ್ನು ನಾನು ಧನರಾಜ್ ಅವರಿಗೆ ಕೊಡುತ್ತೇನೆ. ಟಾಸ್ಕ್ ವಿಚಾರ ಬಂದಾಗ ಸ್ಮಾರ್ಟ್ ಆಗಿ ನೀವು ಯೋಚನೆ ಮಾಡುತ್ತಿರಲಿಲ್ಲ ಎಂದು ಮೋಕ್ಷಿತಾ ತಮ್ಮ ಕಾರಣ ಕೊಟ್ಟಿದ್ದಾರೆ. ಅದಕ್ಕೆ ಧನ್ಯವಾದಗಳು ಎಂದು ಧನರಾಜ್ ಕೈಮುಗಿದು ಪ್ರತಿಕ್ರಿಯಿಸಿದ್ದಾರೆ.
ಇದನ್ನೂ ಓದಿ: ತುಳುನಾಡಿನ ಸಂಪ್ರದಾಯ ಮರೆಯದ ಐಶ್ವರ್ಯಾ ರೈ: ಭಾಷಾಪ್ರೇಮದ ವಿಡಿಯೋ ನೋಡಿ
ನಂತರ ಧನರಾಜ್ ಆಚಾರ್ ಅವರ ಸರದಿ ಬಂದಾಗ, ನನ್ನ ಪಾರ್ಟ್ನರ್ ನನಗೆ ಕಳಪೆ ಕೊಟ್ಟಿದ್ದಾರೆ ಎಂದು ಹೇಳುತ್ತಿದ್ದಂತೆ ಮೋಕ್ಷಿತಾ ವಾದಕ್ಕಿಳಿದಿದ್ದಾರೆ. ಪಾರ್ಟ್ನರ್ ಆಗಿ ಎಷ್ಟು ಸಪೋರ್ಟಿವ್ ಆಗಿದ್ರಿ? ಎಂದು ಪ್ರಶ್ನಿಸಿದ್ದಾರೆ. ಕಿಚನ್ ಡಿಪಾರ್ಟ್ಮೆಂಟ್ ಇದ್ದಾಗ್ಲೇ ಗೊತ್ತಾಯ್ತು.... ಅಂತಾ ಧನರಾಜ್ ತಿಳಿಸಿದ್ದಾರೆ. ಅದಕ್ಕೆ ಮೋಕ್ಷಿತಾ, ಕಿಚನ್ ಡಿಪಾರ್ಟ್ಮೆಂಟ್ ಬಗ್ಗೆ ಮಾತಾಡ್ಬೇಡಿ ನೀವು ಎನ್ನುತ್ತಿದ್ದಂತೆ, ನಾನು ಮಾತನಾಡುವಾಗ ನೀವ್ಯಾಕೆ ಮಾತನಾಡುತ್ತಿದ್ದೀರಾ ಎಂದು ಧನರಾಜ್ ಪ್ರಶ್ನಿಸಿದ್ದಾರೆ.
ಇದನ್ನೂ ಓದಿ: ಭೈರತಿ ರಣಗಲ್: ಡಾಲಿ ಧನಂಜಯ್ ಭರ್ಜರಿ ಡ್ಯಾನ್ಸ್; ಹೇಗಿದೆ ಸಿನಿಮಾ?
ಕುತ್ಕೊಳ್ರಿ ಸುಮ್ನೆ ಅಂತಾ ಮೋಕ್ಷಿತಾ ಹೇಳುತ್ತಿದ್ದಂತೆ ಸಿಡಿದೆದ್ದ ಧನರಾಜ್, ಅಹಂಕಾರ ಇದೆ ನಿಮ್ಗೆ, ಕಳಪೆ ಮೋಕ್ಷಿತಾ ಅವ್ರು ಎಂದು ತಿಳಿಸಿದ್ದಾರೆ. ಆ ಕೂಡಲೇ ಉಗ್ರಂ ಮಂಜು ಪ್ರತಿಕ್ರಿಯಿಸಿ, ಸೂಪರ್ ಧನರಾಜ್ ಎಂದು ಚಪ್ಪಾಳೆ ತಟ್ಟಿದ್ದಾರೆ. ಅವರಿಗೆ ಅಸಲಿ ಆಟ ತೋರಿಸ್ತೀನಿ ಎಂದು ಧನರಾಜ್ ಕಳಪೆ ಬಟ್ಟೆ ತೊಟ್ಟು ಬಿಗ್ ಬಾಸ್ ಜೈಲಿನೊಳಗೆ ಹೋಗಿದ್ದಾರೆ. ನಂತರ ಅಹಂಕಾರದ ಬಗ್ಗೆ ಮಾತನಾಡುತ್ತಾ, ಮೋಕ್ಷಿತಾ ತಮ್ಮವರೊಂದಿಗೆ ಕಣ್ಣೀರಿಟ್ಟಿದ್ದಾರೆ. ಧನರಾಜ್ ಅವರ ಧೈರ್ಯ ಹೆಚ್ಚಿನವರ ಮೆಚ್ಚುಗೆಗೆ ಪಾತ್ರವಾಗಿದ್ದು, ಸಂಪೂರ್ಣ ಸಂಚಿಕೆ ವೀಕ್ಷಿಸಲು ಕಾತರರಾಗಿದ್ದಾರೆ.
