2021ರ 'ಮದಗಜ' ಸಿನಿಮಾ ಬಳಿಕ ಬಹುನಿರೀಕ್ಷೆಗಳೊಂದಿಗೆ ಬಂದ ಸ್ಯಾಂಡಲ್ವುಡ್ನ ರೋರಿಂಗ್ ಸ್ಟಾರ್ ಶ್ರೀಮುರುಳಿ ಅವರ 'ಬಘೀರ' ಸಿನಿಪ್ರೇಮಿಗಳನ್ನು ಮನರಂಜಿಸುವಲ್ಲಿ ಯಶ ಕಂಡಿದೆ. ಕಳೆದ ದಿನ, ಗುರುವಾರದಂದು ಬಿಡುಗಡೆ ಆದ ಈ ಚಿತ್ರ ಆರಂಭಿಕವಾಗಿ ಬಹುತೇಕ ಉತ್ತಮ ಪ್ರತಿಕ್ರಿಯೆಯನ್ನೇ ಗಳಿಸಿದ್ದು, ಕಲೆಕ್ಷನ್ ಅಂಕಿ ಅಂಶ ಕೂಡಾ ಉತ್ತಮವಾಗಿದೆ.
ಸಿನಿಮಾ ಇಂಡಸ್ಟ್ರಿ ಟ್ರ್ಯಾಕರ್ ಸ್ಯಾಕ್ನಿಲ್ಕ್ ವರದಿ ಪ್ರಕಾರ, ರೋರಿಂಗ್ ಸ್ಟಾರ್ ಶ್ರೀಮುರುಳಿ ಮತ್ತು ಸಪ್ತ ಸಾಗರದಾಚೆ ಎಲ್ಲೋ ಖ್ಯಾತಿಯ ಸುಂದರಿ ರುಕ್ಮಿಣಿ ವಸಂತ್ ಅಭಿನಯದ ಬಘೀರ 2.8 ಕೋಟಿ ರೂ. ಗಳಿಸುವಲ್ಲಿ (ನೆಟ್ ಕಲೆಕ್ಷನ್) ಯಶಸ್ವಿ ಆಗಿದೆ. ಕನ್ನಡ ಮತ್ತು ತೆಲುಗು ಭಾಷೆಯಲ್ಲಿ ಈ ಸಿನಿಮಾ ತೆರೆಕಂಡಿದ್ದು, ಕನ್ನಡ ಆವೃತ್ತಿಯಲ್ಲಿ 2.3 ಕೋಟಿ ರೂ. ಮತ್ತು ತೆಲುಗು ಆವೃತ್ತಿಯಲ್ಲಿ 0.5 ಕೋಟಿ ರೂ. ಕಲೆಕ್ಷನ್ ಮಾಡಿದೆ.
ಇನ್ನೂ ಎರಡನೇ ದಿನ ಅಂದರೆ ಶುಕ್ರವಾರದ ವ್ಯವಹಾರ ಗಮನಿಸಿದರೆ, ಎರಡೂ ಭಾಷೆಯ ಆನ್ಲೈನ್ ವ್ಯವಹಾರದಲ್ಲಿ 0.44 ಕೋಟಿ ರೂ. (ಸದ್ಯದ ಸ್ಯಾಕ್ನಿಲ್ಕ್ ಮಾಹಿತಿ) ಕಲೆಕ್ಷನ್ ಆಗಿದೆ. ಈ ಅಂಕಿ ಅಂಶ ಏರಲಿದೆ. ನಾಳೆ ಮತ್ತು ನಾಡಿದ್ದು ಇನ್ನೂ ಹೆಚ್ಚು ಕಲೆಕ್ಷನ್ ಆಗುವ ಸಾಧ್ಯತೆ ಇದೆ. ವಾರಾಂತ್ಯದಲ್ಲಿ ಪ್ರೇಕ್ಷಕರ ಸಂಖ್ಯೆ ಏರೋದು ಸಹಜ.
ನಿನ್ನೆ ಅದ್ಧೂರಿಯಾಗಿ ಚಿತ್ರಮಂದಿರ ಪ್ರವೇಶಿಸಿದ ಈ ಸಿನಿಮಾವನ್ನು ನಾಯಕ ನಟ ಶ್ರೀಮುರಳಿ ಕುಟುಂಬ ವೀಕ್ಷಿಸಿ ಸಂಭ್ರಮಿಸಿದೆ. ಅಲ್ಲದೇ ದಿ. ನಟ ಪುನೀತ್ ರಾಜ್ಕುಮಾರ್ ಅವರ ಎರಡನೇ ಮಗಳು ವಂದಿತಾ ಕೂಡಾ ಚಿತ್ರಮಂದಿರದಲ್ಲಿ ಕಾಣಿಸಿಕೊಂಡರು. ವಂದಿತಾ ಸೇರಿ ಅಲ್ಲಿದ್ದ ಕುಟುಂಬಸ್ಥರನ್ನು ಪ್ರೀತಿಯ ಅಪ್ಪುಗೆ ಮೂಲಕ ಶ್ರೀಮುರುಳಿ ಸ್ವಾಗತಿಸಿದ್ದು, ಸುಂದರ ವಿಡಿಯೋಗಳು ವ್ಯಾಪಕವಾಗಿ ವೈರಲ್ ಆಗಿವೆ. ಇವರಷ್ಟೇ ಅಲ್ಲದೇ ಖಳನಟ ಗರುಡ ರಾಮ್ ಸೇರಿದಂತೆ ಚಿತ್ರರಂಗದ ಹಲವರು 'ಬಘೀರ'ನನ್ನು ಕಣ್ತುಂಬಿಕೊಂಡು ತಮ್ಮ ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ.
ಇದನ್ನೂ ಓದಿ: Watch: ಶ್ರೀಮುರಳಿ, ರುಕ್ಮಿಣಿ ವಸಂತ್ ನಟನೆಯ 'ಬಘೀರ' ಬಿಡುಗಡೆ: ಅಭಿಮಾನಿಗಳ ಸಂಭ್ರಮ
ಬಘೀರ ಅಕ್ಟೋಬರ್ 31ರಂದು 250ಕ್ಕೂ ಹೆಚ್ಚು ಚಿತ್ರಮಂದಿರದಲ್ಲಿ ತೆರೆಕಂಡಿದೆ. ಬೆಂಗಳೂರಿನ ಕೆ.ಜಿ ರಸ್ತೆಯಲ್ಲಿರುವ ಸಂತೋಷ್ ಚಿತ್ರಮಂದಿರಕ್ಕೆ ನಾಯಕ ನಟ ಗುರುವಾರ ಆಗಮಿಸಿ ಪ್ರೇಕ್ಷಕರ ಶಿಳ್ಳೆ, ಚಪ್ಪಾಳೆ ಸ್ವೀಕರಿಸಿದ್ದಾರೆ. ಜೊತೆಗೆ ತಮ್ಮ ಹರ್ಷ ಹಂಚಿಕೊಂಡಿದ್ದಾರೆ. ಚಿತ್ರಮಂದಿರಕ್ಕೆ ಬರುವ ಮೊದಲು ಪಕ್ಕದಲ್ಲಿರೋ ಡಾ. ರಾಜ್ಕುಮಾರ್ ಪುತ್ಧಳಿಗೆ ಪುಷ್ಪಾರ್ಚನೆ ಮಾಡಿ ನಮಿಸಿ, ಆಶೀರ್ವಾದ ಪಡೆದಿದ್ದರು. ನಂತರ ಅಭಿಮಾನಿಗಳನ್ನು ಮನರಂಜಿಸಿ ಗಮನ ಸೆಳೆದರು.
ಇದನ್ನೂ ಓದಿ: ಪ್ರೇಕ್ಷಕರೊಂದಿಗೆ ಶ್ರೀಮುರಳಿ; 'ಬಘೀರ' ವೀಕ್ಷಿಸಿದ ಪುನೀತ್ ಪುತ್ರಿ; ಹೀಗಿದೆ ಚಿತ್ರ ವೀಕ್ಷಕರ ಅಭಿಪ್ರಾಯ
'ಬಘೀರ' ಚಿತ್ರದ ಹೈಲೆಟ್ ಪ್ರಶಾಂತ್ ನೀಲ್. ಮಾಡಿದ ಬೆರಳೆಣಿಕೆ ಸಿನಿಮಾಗಳ ಮೂಲಕ ಇಡೀ ಭಾರತೀಯ ಚಿತ್ರರಂಗದಲ್ಲಿ ಬೇಡಿಕೆ ಹೆಚ್ಚಿಸಿಕೊಂಡಿರುವ ಅತ್ಯಂತ ಹೆಸರಾಂತ ನಿರ್ದೇಶಕ ಪ್ರಶಾಂತ್ ನೀಲ್ ಅವರು ಈ ಚಿತ್ರಕ್ಕೆ ಕಥೆ ಕೊಟ್ಟಿದ್ದಾರೆ. ಡಾ.ಸೂರಿ ನಿರ್ದೇಶನದ ಈ ಸಿನಿಮಾದ ಮೂಲಕ ಇದೇ ಮೊದಲ ಬಾರಿಗೆ ಶ್ರೀಮುರುಳಿ ಮತ್ತು ರುಕ್ಮಿಣಿ ವಸಂತ್ ತೆರೆ ಹಂಚಿಕೊಂಡಿದ್ದಾರೆ. ಸೂರಿ ಆ್ಯಕ್ಷನ್ ಕಟ್ ಹೇಳೋ ಜೊತೆಗೆ ಚಿತ್ರಕಥೆ ಮತ್ತು ಡೈಲಾಗ್ಸ್ನ ಜವಾಬ್ದಾರಿಯನ್ನೂ ಹೊತ್ತುಕೊಂಡಿದ್ದಾರೆ. ಉಳಿದಂತೆ ಎ.ಜೆ ಶೆಟ್ಟಿ ಅವರ ಛಾಯಾಗ್ರಹಣ, ಚೇತನ್‌ ಡಿಸೋಜಾ ಅವರ ಸಾಹಸ ನಿರ್ದೇಶನ ಈ ಸಿನಿಮಾಗಿದೆ.
