ಸ್ಯಾಂಡಲ್ವುಡ್ನಲ್ಲಿ 'ಭೀಮ' ಹಾಗೂ 'ಕೃಷ್ಣಂ ಪ್ರಣಯ ಸಖಿ' ಸಿನಿಮಾಗಳ ಸಕ್ಸಸ್ ಬೆನ್ನಲ್ಲೇ ಬಹುನಿರೀಕ್ಷಿತ 'ಪೌಡರ್' ಚಿತ್ರ ಇಂದು ರಾಜ್ಯಾದ್ಯಂತ ತೆರೆಗಪ್ಪಳಿಸಿದೆ. ವಿಭಿನ್ನ ಕಥಾಹಂದರದ ಮೂಲಕ ಸಿನಿಪ್ರೇಕ್ಷಕರಲ್ಲಿ ಕುತೂಹಲ ಮೂಡಿಸಿದ್ದ 'ಪೌಡರ್' ಕರುನಾಡಿನ 125ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿ ಪ್ರೇಕ್ಷಕರಿಂದ ಬಹುತೇಕ ಉತ್ತಮ ಪ್ರತಿಕ್ರಿಯೆ ಸ್ವೀಕರಿಸಿದೆ.
ಕನ್ನಡ ಚಿತ್ರರಂಗದ ನವರಸನಾಯಕ ಜಗ್ಗೇಶ್, ಪಾತ್ರಧಾರಿಗಳ ಪರಿಚಯ ಮಾಡಿಕೊಡುವ ಮೂಲಕ ಶುರುವಾಗುವ 'ಪೌಡರ್' ಕಂಪ್ಲೀಟ್ ಔಟ್ ಅಂಡ್ ಔಟ್ ಕಾಮಿಡಿ ಸಿನಿಮಾ. ದಿಗಂತ್ ಸೂಪರ್ ಮಾರ್ಕೆಟ್ನಲ್ಲಿ ಕೆಲಸ ಮಾಡುವ ಯುವಕ ಸೂರ್ಯನ ಪಾತ್ರ ನಿರ್ವಹಿಸಿದ್ದಾರೆ. ತಾನು ಪ್ರೀತಿಸೋ ಹುಡುಗಿಯನ್ನು ಇಂಪ್ರೆಸ್ ಮಾಡೋದೇ ಅವನ ಕಾಯಕ. ದಿಗಂತ್ ಪ್ರೇಮಿಯಾಗಿ ಧನ್ಯಾ ರಾಮ್ಕುಮಾರ್ ನಟಿಸಿದ್ದು, ನಿತ್ಯಾ ಎಂಬ ನರ್ಸ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಹಣದ ಮೇಲಿನ ವ್ಯಾಮೋಹ ಕೊಂಚ ಹೆಚ್ಚೇ. ಇನ್ನೂ ಲವ್ ಮಾಡಲು ವಿಚಿತ್ರ ಐಡಿಯಾ ಕೊಡುವ ದಿಗಂತ್ ಸ್ನೇಹಿತನ ಪಾತ್ರದಲ್ಲಿ ಅನಿರುದ್ಧ್ ಆಚಾರ್ಯ ಕಾಣಿಸಿಕೊಂಡಿದ್ದಾರೆ. ಈ ಮೂವರು ಪೌಡರ್ ಹೆಸರಿನ ಡ್ರಗ್ಸ್ ಮಾರಿ ದಿಢೀರನೇ ಶ್ರೀಮಂತರಾಗುವ ಕನಸು ಕಾಣುತ್ತಾರೆ. ಹಾಗಾದ್ರೆ ಈ ಪೌಡರ್ ಮಾರಿ ಈ ಮೂವರು ಶ್ರೀಮಂತರಾಗುತ್ತಾರೋ, ಇಲ್ಲವೋ ಎಂಬುದನ್ನು ತಿಳಿದುಕೊಳ್ಳಲು ನೀವು ಚಿತ್ರಮಂದಿರಕ್ಕೆ ಬರಬೇಕು.
ಚಿತ್ರದಲ್ಲಿ ದಿಗಂತ್, ಧನ್ಯಾ ರಾಮ್ ಕುಮಾರ್ ಪಾತ್ರಗಳಿಗೆ ಪ್ರೇಕ್ಷಕರಿಂದ ಶಿಳ್ಳೆ ಚಪ್ಪಾಳೆ ಸಿಕ್ಕಿದೆ. ಇವರ ಜೊತೆ ಡ್ರಗ್ಸ್ ಮಾರಾಟ ಮಾಡುವ ಅಣ್ಣಾಚಿ ಪಾತ್ರದಲ್ಲಿ ರಂಗಾಯಣ ರಘು ಕಾಣಿಸಿಕೊಂಡಿದ್ದಾರೆ. ತಮಿಳು ಭಾಷೆಯಲ್ಲಿ ಮಾತನಾಡುತ್ತಾ ಪ್ರೇಕ್ಷಕರನ್ನು ಮನರಂಜಿಸಿದ್ದಾರೆ. ರಂಗಾಯಣ ರಘು ಎದುರಾಳಿಯಾಗಿ ಸುಲೇಮಾನ್ ಪಾತ್ರದಲ್ಲಿ ಗೋಪಾಲಕೃಷ್ಣ ದೇಶಪಾಂಡೆ, ಮೇಕಪ್ ಮಲ್ಲಿಕಾ ಪಾತ್ರದಲ್ಲಿ ಶರ್ಮಿಳಾ ಮಾಂಡ್ರೆ, ವಯಸ್ಸು 35ದಾದರೂ ಮದುವೆ ಆಗದ ಪಾತ್ರದಲ್ಲಿ ರವಿಶಂಕರ್ ಹಾಗೂ ಬ್ರೂಸ್ಲಿ ಪಾತ್ರದಲ್ಲಿ ನಾಗಭೂಷಣ್ ಕ್ಯಾರೆಕ್ಟರ್ಗಳು ಸಿನಿಪ್ರಿಯರನ್ನು ನಕ್ಕು ನಲಿಸುತ್ತವೆ.
ಇದನ್ನೂ ಓದಿ: ನಟಿ ಪ್ರಣಿತಾ ಸುಭಾಷ್ ಸೀಮಂತ: ಆಕರ್ಷಕ ಫೋಟೋಗಳನ್ನು ನೋಡಿ - Pranitha Subhash Baby Shower
ಚಿತ್ರಕ್ಕೆ ವಾಸುಕಿ ವೈಭವ್ ಸಂಗೀತ ನೀಡಿದ್ದಾರೆ. ಮಿಷನ್ ಘಮ ಘಮ ಮತ್ತು ಪರಪಂಚ ಘಮ ಘಮ ಸಾಂಗ್ಸ್ 'ಪೌಡರ್' ಪರಿಮಳ ಹೆಚ್ಚಿಸಿದೆ. ಈ ಹಿಂದೆ ಗುಲ್ಟು ಎಂಬ ಕ್ರೈಮ್ ಥಿಲ್ಲರ್ ಸಿನಿಮಾ ಮಾಡಿದ್ದ ನಿರ್ದೇಶಕ ಜನಾರ್ಧನ ಚಿಕ್ಕಣ್ಣ ನಿರ್ದೇಶನ ಉತ್ತಮವಾಗಿದ್ದು, ಅವರು ಕಥೆಗೆ ಮತ್ತಷ್ಟು ಹೊತ್ತು ಕೊಡಬೇಕಾಗಿತ್ತು ಎಂದೆನಿಸುತ್ತದೆ. ಚಿತ್ರವನ್ನು ಕಾರ್ತಿಕ್ ಗೌಡ, ಯೋಗಿ ಜಿ.ರಾಜ್ ಮತ್ತು ವಿಜಯ್ ಸುಬ್ರಹ್ಮಣ್ಯಂ ಕೆಆರ್ಜಿ ಸ್ಟುಡಿಯೋಸ್ ಬ್ಯಾನರ್ ಅಡಿ ಹಾಗೂ ಅರುನಭ್ ಕುಮಾರ್ ಟಿವಿಎಫ್ ಮೋಷನ್ ಪಿಕ್ಚರ್ಸ್ ಬ್ಯಾನರ್ ಅಡಿ ನಿರ್ಮಾಣ ಮಾಡಿದ್ದಾರೆ. ಫ್ಯಾಮಿಲಿ ಎಂಟರ್ಟೈನಿಂಗ್ ಚಿತ್ರ ನಿರ್ಮಾಣ ಮಾಡಿರುವ ಖುಷಿ ನಿರ್ಮಾಪಕರಿಗಿದೆ.
ಇದನ್ನೂ ಓದಿ: 'ಕರ್ಕಿ' ಮೂಲಕ ಕನ್ನಡಕ್ಕೆ ಬಂದ ತಮಿಳಿನ ಖ್ಯಾತ ನಿರ್ದೇಶಕ ಪವಿತ್ರನ್: ಟ್ರೇಲರ್ ರಿಲೀಸ್ - Karki Movie
ಇಂದು ತೆರೆಗಪ್ಪಳಿಸಿರುವ ತಮ್ಮ ಸಿನಿಮಾ ವೀಕ್ಷಿಸಲು ನಟ ದಿಗಂತ್ ಮಂಚಾಲೆ, ನಟಿ ಧನ್ಯಾ ರಾಮ್ಕುಮಾರ್ ತ್ರಿವೇಣಿ ಚಿತ್ರಮಂದಿರಕ್ಕೆ ಆಗಮಿಸಿದ್ದರು. ಪ್ರೇಕ್ಷಕರ ಜೊತೆ ಸಿನಿಮಾ ನೋಡಿ ಸಖತ್ ಎಂಜಾಯ್ ಮಾಡಿದ್ರು. ಒಟ್ಟಿನಲ್ಲಿ ಕನ್ನಡ ಚಿತ್ರರಂಗದಲ್ಲಿ ಒಂದರ ಹಿಂದೆ ಒಂದು ಸಿನಿಮಾಗಳು ಯಶ ಕಾಣುತ್ತಿವೆ. ಪ್ರೇಕ್ಷಕರನ್ನು ಚಿತ್ರಮಂದಿರಗಳಿಗೆ ಸೆಳೆಯುವಲ್ಲಿ ಯಶಸ್ವಿಯಾಗುತ್ತಿದ್ದು ಉತ್ತಮ ಬೆಳವಣಿಗೆ ಅಂತಾರೆ ಚಿತ್ರರಂಗದವರು.
