ನವದೆಹಲಿ: ವಿದೇಶದ ವಿಮಾನ ಪ್ರಯಾಣ ಅನೇಕರಿಗೆ ಬೋರಿಂಗ್ ಆಗಿರುತ್ತದೆ. ಇಂಟರ್ನೆಟ್ ಹೆಚ್ಚು ಬಳಕೆ ಮಾಡುವ ಪ್ರಯಾಣಿಕರಿಗೆ ಆಗಸದಲ್ಲಿ ಮನೋರಂಜನೆ ಸೌಲಭ್ಯ ಇಲ್ಲದೇ ಸಾಗುವ ಈ ಪ್ರಯಾಣ ಅನೇಕರಿಗೆ ಪ್ರಯಾಸದಾಯಕವೇ ಸರಿ. ಆದರೆ, ಇದೀಗ ಕೊರತೆ ನೀಗಿಸಲು ವಿಸ್ತಾರ ಮುಂದಾಗಿದೆ. ಅಂತಾರಾಷ್ಟ್ರೀಯ ವಿಮಾನ ಹಾರಾಟದ ವೇಳೆ ಪ್ರಯಾಣಿಕರಿಗೆ 20 ನಿಮಿಷ ಉಚಿತ ವೈಫೈ ಒದಗಿಸುವುದಾಗಿ ಸಿಹಿ ಸುದ್ದಿ ಘೋಷಿಸಿದೆ. ಈ ರೀತಿ ಸೌಲಭ್ಯ ಕಲ್ಪಿಸಿದ ಭಾರತದ ಮೊದಲ ವಿಮಾನ ಸಂಸ್ಥೆ ಎಂಬ ಹೆಗ್ಗಳಿಕೆಗೆ ಇದೀಗ ವಿಸ್ತಾರ ಪಾತ್ರವಾಗಿದೆ.
ಟಾಟಾ - ಸಿಂಗಾಪೂರ್ ಏರ್ಲೈನ್ಸ್ ಜಂಟಿಯಾಗಿ ವಿಮಾನಗಳಲ್ಲಿ ವೈಫೈ ಸೌಲಭ್ಯ ಕಲ್ಪಿಸುವ ಪೂರಕ ವ್ಯವಸ್ಥೆ ನೀಡಿದೆ. ಎಲ್ಲ ಕ್ಯಾಬಿನ್ನಲ್ಲಿ ಪ್ರಯಾಣಿಕರು 20 ನಿಮಿಷಗಳ ಕಾಲ ವೈ- ಫೈ ಸೌಲಭ್ಯ ಪಡೆಯಲಿದ್ದಾರೆ. ಒಂದು ವೇಳೆ ಹೆಚ್ಚಿನ ವೈ ಫೈ ಸೌಲಭ್ಯ ಬೇಕು ಎನ್ನುವುದಾದರೆ ಭಾರತೀಯರು ಕ್ರೆಡಿಟ್/ ಡೆಬಿಟ್ ಕಾರ್ಡ್ಗಳನ್ನು ಬಳಕೆ ಮಾಡಿಕೊಂಡು ಯೋಜನೆಗಳನ್ನು ವಿಸ್ತರಣೆ ಮಾಡಿಕೊಳ್ಳಬಹುದಾಗಿದೆ.
ಈ ಸೇವೆಯು ಬೋಯಿಂಗ್ 787 -9 ಡ್ರೀಮ್ಲೈನರ್ ಮತ್ತು ಏರ್ಬಸ್ ಎ321 ನಿಯೋ ಏರ್ಕ್ರಾಫ್ಟ್ನಲ್ಲಿ ಲಭ್ಯವಿದೆ. ಗ್ರಾಹಕರು ಇ-ಮೇಲ್ ಮೂಲಕ ಒಟಿಪಿ ಮೂಲಕ ಪಡೆಯಬಹುದು. ಸಕ್ರಿಯ ಹಾರಾಟದಲ್ಲಿ ವಿಸ್ತೃತ ಇನ್ ಫ್ಲೈಟ್ ವೈ-ಫೈ ಖರೀದಿಸಲು ಅನುಕೂಲವನ್ನು ಕಲ್ಪಿಸಲಾಗಿದೆ ಎಂದು ವಿಸ್ತಾರ ತಿಳಿಸಿದೆ.
ಈ ನಮ್ಮ ಹೆಚ್ಚುವರಿ ಸೇವೆಯ ಹೊಸ ನಡೆಯನ್ನು ಗ್ರಾಹಕರು ಮೆಚ್ಚುತ್ತಾರೆ ಎಂಬ ನಂಬಿಕೆ ಇದೆ. ಇದು ವಿಸ್ತಾರ ಪ್ರಯಾಣವನ್ನು ಮತ್ತಷ್ಟು ಆರಾಮದಾಯಕ, ಉತ್ಪಾದಕತೆ ಮತ್ತು ತಡೆ ರಹಿತವಾಗಿಸುತ್ತದೆ ಎಂದು ವಿಸ್ತಾರದ ಮುಖ್ಯ ವಾಣಿಜ್ಯ ಅಧಿಕಾರಿ ದೀಪಕ್ ರಜವತ್ ತಿಳಿಸಿದ್ದಾರೆ.
20 ನಿಮಿಷದ ಹೊರತಾಗಿ ಬ್ಯುಸಿನೆಸ್ ಕ್ಲಾಸ್ ಮತ್ತು ಪ್ಲಾಟಿನಂ ಕ್ಲಬ್ ವಿಸ್ತಾರ ಸದಸ್ಯರಿಗೆ ಹೆಚ್ಚುವರಿಯಾಗಿ 50 ಎಂಬಿಗಳನ್ನು ವೈಫೈ ಪೂರಕ ಸೇವೆಯಾಗಿ ನೀಡಲಾಗುವುದು. ಏರ್ಲೈನ್ ಪ್ರಕಾರ, ಸದಸ್ಯೇತರ ಪ್ರಯಾಣಿಕರು ವಾಟ್ಸ್ಆ್ಯಪ್ ನಂತಹ ಮೆಸೇಜಿಂಗ್ ಆ್ಯಪ್ಗಳ ಸೌಲಭ್ಯಕ್ಕೆ ಅನಿಯಮಿತ ಡೇಟಾಗೆ 327.74 ಪ್ಲಸ್ ಜಿಎಸ್ಟಿ ಹಣ ನೀಡಬೇಕು.
ವಿಮಾನದೊಳಗೆ ಇಂಟರ್ನೆಟ್ ಸರ್ಫಿಂಗ್ಗೆ 1,577.54 ಪ್ಲಸ್ ಜಿಎಸ್ಟಿ ನೀಡಬೇಕಿದೆ. ಇದರಿಂದ ಸಾಮಾಜಿಕ ಜಾಲತಾಣ ಮತ್ತು ವೆಬ್ಗಳ ಆಡಿಯೋ ಮತ್ತು ವಿಡಿಯೋ ಸ್ಟ್ರೀಮಿಂಗ್ ಸೌಲಭ್ಯ ಪಡೆಯಬಹುದು. ಅನಿಯಮಿತ ಡೇಟಾಗಳು ಎಲ್ಲ ಸ್ಟ್ರೀಮಿಂಗ್ ಪ್ರೋಟೋಕಾಲ್ ಅನುಮತಿಸಲು 2707.04 ಪ್ಲಸ್ ಜಿಎಸ್ಟಿಗೆ ಲಭ್ಯವಾಗಿದೆ
ಈ ಕುರಿತು ಮಾತನಾಡಿರುವ ಏರ್ಲೈನ್ಸ್, ವಿಮಾನದೊಳಗಿನ ಮನೋರಂಜನೆ ವ್ಯವಸ್ಥೆ ಸರಿಸುಮಾರು 700 ಗಂಟೆಗಳ ಕಂಟೆಂಟ್ ಒಳಗೊಂಡಿದ್ದು, ಇದು ಸಿನಿಮಾ ಟಿವಿ ಶೋ ಮತ್ತು ಆಡಿಯೋ ಟೈಟಲ್ಸ್ಗಳು ಸೇರಿರಲಿದೆ. (ಐಎಎನ್ಎಸ್)
ಇದನ್ನೂ ಓದಿ: ಜಾಗತಿಕ ಪಾಸ್ಪೋರ್ಟ್ ಸೂಚ್ಯಂಕದಲ್ಲಿ ಏರಿಕೆ ಕಂಡ ಭಾರತ; 58 ದೇಶಗಳಿಗೆ ವೀಸಾ ಮುಕ್ತ ಪ್ರವೇಶ
