ನಾಯಗಢ(ಒಡಿಶಾ): ಮಹಿಳೆಯೊಬ್ಬಳು ತನ್ನ ಪ್ರಿಯಕರನ ಜೊತೆ ಸೇರಿಕೊಂಡು ಸ್ವಂತ ಗಂಡನನ್ನೇ ಕೊಲೆಗೈದು, ಮೃತದೇಹವನ್ನು ಮನೆಯಲ್ಲೇ ಹೂತು ಹಾಕಿದ ಘಟನೆ ಒಡಿಶಾದ ನಾಯಗಢ ಜಿಲ್ಲೆಯಲ್ಲಿ ಬೆಳಕಿಗೆ ಬಂದಿದೆ. ಅಕ್ರಮ ಸಂಬಂಧದಿಂದಲೇ ಈ ದುಷ್ಕೃತ್ಯ ನಡೆದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಪ್ರಕಾಶ್ ನಾಯಕ್ ಎಂಬಾತ ಹತ್ಯೆಗೀಡಾದ ವ್ಯಕ್ತಿ. ಈತನ ಪತ್ನಿ ಜ್ಯೋತ್ನಾರಾಣಿ ಮತ್ತು ಪ್ರಿಯಕರ ಸೋನು ಸಮಾಲ್ ಕೊಲೆ ಆರೋಪಿಗಳು. ಪ್ರಕಾಶ್ ಮತ್ತು ಜ್ಯೋತ್ನಾ 14 ವರ್ಷಗಳ ಹಿಂದೆ ಮದುವೆಯಾಗಿದ್ದರು. ದಂಪತಿಗೆ ಇಬ್ಬರು ಮಕ್ಕಳಿದ್ದಾರೆ. ಆದಾಗ್ಯೂ, ಸೋನು ಜೊತೆಗೆ ಜ್ಯೋತ್ನಾ ಅಕ್ರಮ ಸಂಬಂಧ ಹೊಂದಿದ್ದಳು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಕೊಲೆ ಮಾಡಿ ನಾಪತ್ತೆ ನಾಟಕ: ಇಲ್ಲಿನ ಒಡಗಾಂವ್ ಪೊಲೀಸ್ ಠಾಣಾ ವ್ಯಾಪ್ತಿಯ ಕೋಮಂಡಾ ಗ್ರಾಮದಲ್ಲಿ ಘಟನೆ ವರದಿಯಾಗಿದೆ. ಕೋಮಂಡಾ ಗ್ರಾಮವು ಜ್ಯೋತ್ನಾರಾಣಿ ತವರೂರು ಇಲ್ಲಿಯೇ ದಂಪತಿ ವಾಸವಾಗಿದ್ದರು. ಆದರೆ, ಅನೈತಿಕ ಸಂಬಂಧದ ಕಾರಣದಿಂದ ಪ್ರಕಾಶ್ನನ್ನು ಕೊಲೆ ಮಾಡಲು ಪತ್ನಿ ನಿರ್ಧರಿಸಿದ್ದಳು.20 ದಿನಗಳ ಹಿಂದೆ ಪ್ರಿಯಕರನ ಜೊತೆಗೂಡಿ ಸಂಚು ರೂಪಿಸಿ ಮನೆಯಲ್ಲಿ ಈ ಕೊಲೆ ಮಾಡಲಾಗಿದೆ. ನಂತರ ಶವವನ್ನು ಹೊರಗಡೆ ಸಾಗಿಸದೇ ಮನೆಯಲ್ಲೇ ಹೂತು ಹಾಕಿದ್ದಾರೆ ಎಂದು ಪೊಲೀಸ್ ತನಿಖೆಯಲ್ಲಿ ಬಯಲಾಗಿದೆ.
ಇತ್ತೀಚೆಗೆ ಪ್ರಕಾಶ್ ಅವರ ತಂದೆ ಗೋಕುಲ್ ನಾಯಕ್ ಯಾವುದೋ ಕೆಲಸದ ನಿಮಿತ್ತ ಬೀಗರ ಮನೆಗೆ ಹೋಗಿದ್ದರು. ಆಗ ಪ್ರಕಾಶ್ ಕಾಣೆಯಾಗಿದ್ದಾನೆ ಎಂದು ಸೊಸೆ ಜ್ಯೋತ್ನಾ ತನ್ನ ಮಾವನಿಗೆ ಸುಳ್ಳು ಹೇಳಿದ್ದಳು. ಇದರಿಂದ ಅನುಮಾನಗೊಂಡ ಅವರು ಪೊಲೀಸರಿಗೆ ದೂರು ನೀಡಿದ್ದರು. ಈ ದೂರಿನ ಮೇರೆಗೆ ಪೊಲೀಸರು ತನಿಖೆ ಆರಂಭಿಸಿದಾಗ ಪ್ರಕಾಶ್ ಕೊಲೆಯಾಗಿರುವುದು ಬೆಳಕಿಗೆ ಬಂದಿದೆ.
ಅಲ್ಲದೇ, ಗೋಕುಲ್ ನಾಯಕ್ ಬೀಗರ ಮನೆಗೆ ಹೋದಾಗ ಅಲ್ಲಿ ಭೂಮಿ ಅಗೆದು ಗುಡ್ಡೆ ಹಾಕಿರುವುದನ್ನೂ ಗಮನಿಸಿದ್ದರು. ಹೀಗಾಗಿ ಸಂಶಯಗೊಂಡ ಪೊಲೀಸರು ಮನೆಯಲ್ಲಿ ಮತ್ತೆ ಭೂಮಿ ಅಗೆದಿದ್ಧಾರೆ. ಈ ವೇಳೆ, ಪ್ರಕಾಶ್ನ ಮೃತದೇಹ ದೊರೆತಿದೆ. ಸದ್ಯ ಪ್ರಮುಖ ಆರೋಪಿಗಳಾದ ಜ್ಯೋತ್ನಾ ಮತ್ತು ಸೋನುನನ್ನು ಬಂಧಿಸಲಾಗಿದೆ. ಇಷ್ಟೇ ಅಲ್ಲ, ಈ ಕೊಲೆಯಲ್ಲಿ ಜ್ಯೋತ್ನಾ ತಾಯಿಯ ಕೈವಾಡ ಇರುವ ಶಂಕೆ ಕೂಡ ವ್ಯಕ್ತವಾಗಿದೆ. ಆದ್ದರಿಂದ ಆಕೆಯನ್ನೂ ಪೊಲೀಸರು ಬಂಧಿಸಿದ್ದಾರೆ.
ಇದನ್ನೂ ಓದಿ: ಮಾಟಮಂತ್ರದ ಶಂಕೆ: ಎಲ್ಲರೂ ನೋಡು ನೋಡುತ್ತಿದ್ದಂತೆ ತಾಯಿ ಮಗನ ಬರ್ಬರ ಕೊಲೆ
