ನವದೆಹಲಿ: ಕೊಲೆ ಪ್ರಕರಣ ಸಂಬಂಧ 25 ಸಾವಿರ ರೂಪಾಯಿ ಘೋಷಿತ ಬಹುಮಾನ ಹೊಂದಿದ್ದ 22 ವರ್ಷದ ಲೇಡಿ ಡಾನ್‌ವೋರ್ವಳನ್ನು ಬಂಧಿಸುವಲ್ಲಿ ದೆಹಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಬಂಧಿತ ಆರೋಪಿ ಕೈಲಿ ತನ್ವರ್ ಎಂಬಾಕೆಯ ವಿರುದ್ಧ ವಿವಿಧೆಡೆ ಹಲವು ಪ್ರಕರಣಗಳು ದಾಖಲಾಗಿವೆ.
ಉತ್ತರ ಪ್ರದೇಶದ ಗಾಜಿಯಾಬಾದ್ ನಿವಾಸಿಯಾಗಿರುವ ಕೈಲಿ ತನ್ವರ್, ದೀಪಕ್ ಅಕ್ರೊಲಾ-ಕರ್ಮವೀರ್ ಕಾಲಾ ಎಂಬ ನಟೋರಿಯಸ್ ಗ್ಯಾಂಗ್ನಲ್ಲಿ ಗುರುತಿಸಿಕೊಂಡಿದ್ದಳು. ಇದೀಗ ಈಕೆಯನ್ನು ದೆಹಲಿಯ ಫತೇಪುರ್ ಪ್ರದೇಶದಲ್ಲಿ ಸೆರೆ ಹಿಡಿಯಲಾಗಿದೆ.
ಉತ್ತರ ಪ್ರದೇಶದಲ್ಲಿ ನಡೆದ ಕೊಲೆ ಪ್ರಕರಣ ಸಂಬಂಧ ಪೊಲೀಸರು ಈಕೆಗೆ ಶೋಧ ನಡೆಸುತ್ತಿದ್ದರು. ದೆಹಲಿಯ ಫತೇಫುರ್ ಬಸ್ ನಿಲ್ದಾಣದ ಸಮೀಪ ತನ್ವರ್ ವಾಸವಿದ್ದ ಬಗ್ಗೆ ಗುಪ್ತಚರ ಮೂಲಗಳಿಂದ ಸಿಕ್ಕ ಮಾಹಿತಿ ಆಧರಿಸಿ ಕೊನೆಗೂ ಆರೋಪಿಯನ್ನು ಬಂಧಿಸಲಾಗಿದೆ ಎಂದು ಉಪ ಪೊಲೀಸ್ ಆಯುಕ್ತ (ವಿಶೇಷ ಘಟಕ) ಅಮಿತ್ ಕೌಶಿಕ್ ತಿಳಿಸಿದರು.
ನಟೋರಿಯಸ್ ಗ್ಯಾಂಗ್ನಲ್ಲಿ ಗುರುತಿಸಿಕೊಂಡಿರುವ ತನ್ವರ್, ಪೊಲೀಸ್ ವಿಚಾರಣೆ ವೇಳೆ ಹತ್ಯೆಗೆ ಕಾರಣ ಬಿಚ್ಚಿಟ್ಟಿದ್ದಾಳೆ. ಕೊಲೆಗೆ ಹಳೇ ದ್ವೇಷವೇ ಪ್ರಮುಖ ಕಾರಣವಾಗಿತ್ತು ಎಂದು ಆಕೆ ತಿಳಿಸಿರುವ ಬಗ್ಗೆ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ: ದೆಹಲಿ-ವಾರಣಾಸಿ ವಿಮಾನಕ್ಕೆ ಬಾಂಬ್ ಬೆದರಿಕೆ: ತುರ್ತು ನಿರ್ಗಮನ ದ್ವಾರದಿಂದ ಹೊರಬಂದ ಪ್ರಯಾಣಿಕರು
