ಸುಂದರ್‌ಗಢ(ಒಡಿಶಾ): ಒಡಿಶಾದಲ್ಲಿ ಲೋಕಸಭೆ ಚುನಾವಣೆಯೊಂದಿಗೆ ವಿಧಾನಸಭೆ ಚುನಾವಣೆಯೂ ಏಕಕಾಲಕ್ಕೆ ನಡೆಯುತ್ತಿದೆ. ಈ ಬಾರಿ ಚುನಾವಣಾ ಅಖಾಡಕ್ಕೆ ಭಾರತೀಯ ಪುರುಷರ ಹಾಕಿ ತಂಡದ ಮಾಜಿ ನಾಯಕರಾದ ದಿಲೀಪ್ ಟಿರ್ಕಿ ಮತ್ತು ಪ್ರಬೋಧ್ ಟಿರ್ಕಿ ಜಿಗಿದಿದ್ದಾರೆ. ಇಬ್ಬರು ಕೂಡ ಬೇರೆ-ಬೇರೆ ಪಕ್ಷಗಳಿಂದ ಸ್ಪರ್ಧಿಸಿದ್ದು, ಚುನಾವಣಾ ಕಣ ರಂಗೇರಿದೆ.
47 ವರ್ಷದ ದಿಲೀಪ್ ಹಾಗೂ 40 ವರ್ಷದ ಪ್ರಬೋಧ್ ಇಬ್ಬರೂ ತಮ್ಮ ಕ್ರೀಡಾ ವೃತ್ತಿಜೀವನದ ನಂತರ ಸಕ್ರಿಯ ರಾಜಕೀಯಕ್ಕೆ ಧುಮುಕ್ಕಿದ್ದಾರೆ. ಇವರು ಪರಸ್ಪರ ಮುಖಾಮುಖಿಯಾಗಿ ಸ್ಪರ್ಧಿಸದಿದ್ದರೂ, ಪ್ರತ್ಯೇಕ ಪಕ್ಷಗಳಿಂದ, ಪ್ರತ್ಯೇಕ ಕ್ಷೇತ್ರಗಳಲ್ಲಿ ಅದೃಷ್ಟ ಪರೀಕ್ಷೆಗೆ ಇಳಿದಿದ್ದಾರೆ. ಹೀಗಾಗಿ ಈ ಮಾಜಿ ಹಾಕಿ ಪಟುಗಳ ಸ್ಪರ್ಧೆಯು ಹಾಕಿ ಟರ್ಫ್‌ನಿಂದ ರಾಜಕೀಯ ರಣಾಂಗಣವಾಗಿ ಪರಿವರ್ತನೆಗೊಂಡಂತಾಗಿದೆ.
ಒಬ್ಬರು ಲೋಕಸಭೆ, ಮತ್ತೊಬ್ಬರು ವಿಧಾನಸಭೆಗೆ ಸ್ಪರ್ಧೆ: ದಿಲೀಪ್ ಟಿರ್ಕಿ ಹಾಗೂ ಪ್ರಬೋಧ್ ಟಿರ್ಕಿ ಇಬ್ಬರೂ ಲೋಕಸಭೆ ಮತ್ತು ವಿಧಾನಸಭೆಗೆ ಪ್ರವೇಶಿಸುವ ಆಕಾಂಕ್ಷೆ ಹೊಂದಿದ್ದಾರೆ. ಆದರೆ, ಇಬ್ಬರೂ ಒಂದೇ ಜಿಲ್ಲೆಯಲ್ಲಿ ಸ್ಪರ್ಧೆ ಮಾಡುತ್ತಿದ್ದಾರೆ ಎಂಬುದು ವಿಶೇಷ. ಪ್ರಸ್ತುತ ಹಾಕಿ ಇಂಡಿಯಾದ ಅಧ್ಯಕ್ಷರೂ ಆದ ದಿಲೀಪ್ ಸುಂದರ್‌ಗಢ ಲೋಕಸಭೆ ಕ್ಷೇತ್ರದಲ್ಲಿ ಬಿಜೆಡಿಯಿಂದ ಟಿಕೆಟ್ ಗಿಟ್ಟಿಸಿಕೊಂಡಿದ್ದಾರೆ. ಮತ್ತೊಂದೆಡೆ, ಪ್ರಬೋಧ್ ಅದೇ ಸುಂದರ್‌ಗಢ ಜಿಲ್ಲೆಯ ತಲ್ಸಾರಾ ವಿಧಾನಸಭಾ ಕ್ಷೇತ್ರದಲ್ಲಿ ಕಾಂಗ್ರೆಸ್ ಟಿಕೆಟ್‌ನಿಂದ ಸ್ಪರ್ಧಿಸುತ್ತಿದ್ದಾರೆ.
ಭಾರತಕ್ಕಾಗಿ 412 ಅಂತಾರಾಷ್ಟ್ರೀಯ ಹಾಕಿ ಪಂದ್ಯಗಳನ್ನು ಆಡಿರುವ ದಿಲೀಪ್ ಟಿರ್ಕಿ ಪದ್ಮಶ್ರೀ ಪುರಸ್ಕೃತರು. ಸುಂದರ್‌ಗಢ ಲೋಕಸಭೆ ಕ್ಷೇತ್ರದಲ್ಲಿ ಬಿಜೆಪಿಯ ಪ್ರಬಲ ಅಭ್ಯರ್ಥಿಯ ವಿರುದ್ಧ ಅವರು ಕಣಕ್ಕೆ ಇಳಿದಿದ್ದಾರೆ. ಬಿಜೆಪಿಯಿಂದ ಕೇಂದ್ರದ ಮಾಜಿ ಬುಡಕಟ್ಟು ವ್ಯವಹಾರಗಳ ಸಚಿವ ಜುಯಲ್ ಓರಾಮ್ ಇಲ್ಲಿ ಸ್ಪರ್ಧಿಸಿದ್ದಾರೆ. ಈ ಹಿಂದೆ ಬಿಜೆಡಿ ದಿಲೀಪ್ ಅವರನ್ನು ರಾಜ್ಯಸಭೆಗೆ ನಾಮನಿರ್ದೇಶನ ಮಾಡಿತ್ತು.
2012ರಿಂದ 2018 ರವರೆಗೆ ಸಂಸತ್ತಿನ ಮೇಲ್ಮನೆ ಸದಸ್ಯರಾಗಿ ಕಾರ್ಯ ನಿರ್ವಹಿಸಿದ್ದರು. 2014ರ ಲೋಕಸಭೆ ಚುನಾವಣೆಯಲ್ಲಿ ಇದೇ ಜುಯಲ್ ಓರಾಮ್ ವಿರುದ್ಧವೇ ದಿಲೀಪ್ ಸ್ಪರ್ಧಿಸಿ 18,829 ಮತಗಳಿಂದ ಸೋತಿದ್ದರು. ನಂತರದ 2019ರ ಚುನಾವಣೆಗೆ ದಿಲೀಪ್ ಸ್ಪರ್ಧಿಸಿರಲಿಲ್ಲ. ಈಗ ಮತ್ತೆ ಇಬ್ಬರು ನಡುವೆ ಮುಖಾಮುಖಿಯಾಗಿದ್ದು, ಈ ಚುನಾವಣೆಯು ಕುತೂಹಲವನ್ನು ಹೆಚ್ಚಿಸಿದೆ.
ಒಡಿಶಾದ 21 ಲೋಕಸಭೆ ಕ್ಷೇತ್ರಗಳು ಮತ್ತು 147 ವಿಧಾನಸಭೆಯ ಕ್ಷೇತ್ರಗಳಿಗೆ ಮೇ 13ರಿಂದ ಜೂನ್ 1ರವರೆಗೆ ನಾಲ್ಕು ಹಂತಗಳಲ್ಲಿ ಮತದಾನ ನಡೆಯಲಿದೆ. ಎರಡೂ ಚುನಾವಣೆಗಳ ಫಲಿತಾಂಶವು ಜೂನ್ 4ರಂದು ಪ್ರಕಟವಾಗಲಿದೆ.
ಇದನ್ನೂ ಓದಿ: ಕಳೆದ 10 ವರ್ಷಗಳ ಕೆಲಸ ಕೇವಲ ಟ್ರೇಲರ್ ಅಷ್ಟೇ: ಪ್ರಧಾನಿ ಮೋದಿ
