ಚೈನ್ನೈ( ತಮಿಳುನಾಡು): ಬಾಯಲ್ಲಿ ಇಟ್ಟರೆ ಕರಗುವಂತಹ ಬಣ್ಣ ಬಣ್ಣದ ಚಿಣ್ಣರ ಅಚ್ಚುಮೆಚ್ಚಿನ ಕಾಟನ್ ಕ್ಯಾಂಡಿಯನ್ನು ಇತ್ತೀಚಿಗೆ ಪಾಂಡಿಚೇರಿ ಸರ್ಕಾರ ನಿಷೇಧಿಸಿದೆ. ಇದೀಗ ಅದರ ಬೆನ್ನಲ್ಲೇ ತಮಿಳುನಾಡು ಸರ್ಕಾರ ಕೂಡ ಈ ಕಾಟನ್ ಕ್ಯಾಂಡಿ ನಿಷೇಧಿಸಿ, ಶನಿವಾರ ಆದೇಶಿಸಿದೆ.
ಕಾಟನ್ ಕ್ಯಾಂಡಿಯಲ್ಲಿನ ಬಣ್ಣಕ್ಕಾಗಿ ಬಳಕೆ ಮಾಡುತ್ತಿರುವ ವಸ್ತುವೂ ವಿಷಕಾರಿಯಾಗಿದ್ದು, ಕ್ಯಾನ್ಸರ್ ಕಾರಕ ರಾಸಾಯನಿಕ ಅಂಶವನ್ನು ಹೊಂದಿರುವ ಹಿನ್ನಲೆ ಕಾಟನ್ ಕ್ಯಾಂಡಿಯನ್ನು ತಮಿಳುನಾಡು ಸರ್ಕಾರ ನಿಷೇಧ ಹೇರಿದೆ. ಕಾಟನ್ ಕ್ಯಾಂಡಿಯಲ್ಲಿ ರೋಡಮಿನ್ ಬಿ ಎಂಬ ಕೃತಕ ಬಣ್ಣವನ್ನು ಬಳಕೆ ಮಾಡಲಾಗುತ್ತಿದೆ. ಆಹಾರ ಸುರಕ್ಷತಾ ಮತ್ತು ಗುಣಮಟ್ಟ ಕಾಯ್ದೆ 2006ರ ಸೆಕ್ಷನ್ ಅಡಿ ಇದು ಅಸುರಕ್ಷಿತ ಎಂದು ದೃಢಪಟ್ಟಿದೆ. ಇದೀಗ ಕಾಟನ್ ಕ್ಯಾಂಡಿಯಲ್ಲಿ ಈ ಅಂಶ ಇರುವ ಸಂಬಂಧ ಸರ್ಕಾರ ಆಹಾರ ವಿಶ್ಲೇಷಣೆ ಪ್ರಯೋಗಾಲಯದಲ್ಲಿ ಪರೀಕ್ಷೆ ನಡೆಸಿದೆ. ಈ ವೇಳೆ, ಇದರಲ್ಲಿ ಹಾನಿಕಾರ ರಾಸಾಯನಿಕ ಇರುವುದು ಪತ್ತೆಯಾಗಿದೆ.
ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಕಾಯಿದೆ, 2006ರ ಪ್ರಕಾರ ರೋಡಮಿನ್ ಬಿ ಎಂಬ ಕೃತಕ ಬಣ್ಣವನ್ನು ಸಾರ್ವಜನಿಕ ಸಮಾರಂಭಗಳಲ್ಲಿ ತಯಾರಿಕೆ, ಪ್ಯಾಕೇಜಿಂಗ್, ಆಮದು ಮಾಡಿಕೊಳ್ಳುವುದು, ಮಾರಾಟ ಮಾಡುವುದು, ಸೇವೆ ಮಾಡುವುದು ಶಿಕ್ಷಾರ್ಹ ಅಪರಾಧವಾಗಿದೆ. ಈ ಹಿನ್ನಲೆ ಈ ಕ್ರಮಕ್ಕೆ ಮುಂದಾಗಲಾಗಿದೆ.
ಈ ಕುರಿತು ಮಾತನಾಡಿರುವ ಆರೋಗ್ಯ ಮತ್ತು ಸಾರ್ವಜನಿಕ ಕಲ್ಯಾಣ ಸಚಿವ ಮಾ ಸುಬ್ರಮಣಿಯನ್, ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಕಾಯಿದೆ 2006ರ ಪ್ರಕಾರ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳುವಂತೆ ಆಹಾರ ಸುರಕ್ಷತಾ ಆಯುಕ್ತರು ಎಲ್ಲ ಆಹಾರ ಸುರಕ್ಷತಾ ಅಧಿಕಾರಿಗಳಿಗೆ ಆದೇಶ ನೀಡಿದ್ದಾರೆ ಎಂದು ತಿಳಿಸಿದ್ದಾರೆ.
ಏನಿದು ರೋಡಮಿನ್ ಬಿ?: ರಾಷ್ಟ್ರೀಯ ಆರೋಗ್ಯ ಸಂಸ್ಥೆ (ಎನ್ಐಎಚ್) ಪ್ರಕಾರ, ರೊಡಮಿನ್ ಅನ್ನು ಆರ್ಎಚ್ಬಿ ಎಂದು ಕೂಡ ಕರೆಯಲಾಗುವುದು. ಈ ರೋಡಮಿನ್ ಬಿ ಎಂಬುದು ಸಿಂಥೆಟಿಕ್ ಡೈ ಆಗಿ ಹಲವು ಉದ್ಯಮದಲ್ಲಿ ಬಳಕೆ ಮಾಡಲಾಗುವುದು. ಇದನ್ನು ಹೆಚ್ಚಾಗಿ ಜವಳಿ, ಇಂಕ್ ಮತ್ತು ಕಾಸ್ಮೆಟಿಕ್ನಲ್ಲಿ ಬಳಕೆ ಮಾಡಲಾಗುತ್ತದೆ. ಆರ್ಎಚ್ಬಿ ದೇಹದ ಒಳಗೆ ಆಹಾರದ ಮೂಲಕ ಸೇರಿದಲ್ಲಿ ಇದು ಅಂಗಾಂಶದ ಮೇಲೆ ಒತ್ತಡ ಹಾಕುತ್ತದೆ. ಜೊತೆಗೆ ಕ್ಯಾನ್ಸರ್ ಅಥವಾ ಯಕೃತ್ ಕಾರ್ಯಾಚರಣೆಗೆ ತೊಡಕು ಮೂಡಿಸುವಂತಹ ಆರೋಗ್ಯ ಸಮಸ್ಯೆಗೆ ಕಾರಣವಾಗುತ್ತದೆ. ಕಡಿಮೆ ಅವಧಿಯಲ್ಲಿ ಹೆಚ್ಚಿನ ಅಂಶವು ಇದು ದೇಹಕ್ಕೆ ಸೇರಿದಲ್ಲಿ ಅದು ವಿಷಕಾರಿಯಾಗುತ್ತದೆ.
ಭಾರತದಲ್ಲಿ ಅಗ್ಗದ ದರದಲ್ಲಿ ಈ ಆಹಾರ ಉತ್ಪನ್ನದ ಬಣ್ಣವೂ ದೊರೆಯುವುದರಿಂದ ಇದನ್ನು ಅಕ್ರಮವಾಗಿ ಬಳಕೆ ಮಾಡಲಾಗುತ್ತಿದೆ. ಆಹಾರ ಸುರಕ್ಷತಾ ನಿಯಮದಡಿ ಇದನ್ನು ಬಳಕೆ ಮಾಡದಂತೆ ಕೆಲವು ಪ್ರದೇಶದಲ್ಲಿ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗಿದೆ.
ಇದನ್ನೂ ಓದಿ: ಅಮೇಥಿಯಲ್ಲಿ ಹೊಸ ಮನೆ ಕಟ್ಟಿಸಿದ ಸ್ಮೃತಿ ಇರಾನಿ: ಫೆಬ್ರವರಿ 22ಕ್ಕೆ ಗೃಹಪ್ರವೇಶ
