ಶಿಬು ಸೊರೆನ್​ ಹಿರಿಯ ಸೊಸೆ ಸೀತಾ ಸೊರೆನ್​ ಬಿಜೆಪಿ ಸೇರ್ಪಡೆ

ಇಂದು ಬೆಳಗ್ಗೆ ತಮ್ಮ ಪಕ್ಷದ ಎಲ್ಲಾ ಸ್ಥಾನಗಳಿಗೆ ರಾಜೀನಾಮೆ ಸಲ್ಲಿಸಿದ್ದ ಸೀತಾ ಸೊರೆನ್​ ಇದೀಗ ಬಿಜೆಪಿ ಸೇರ್ಪಡೆಯಾಗಿದ್ದಾರೆ.

ದೆಹಲಿ: ಜಾರ್ಖಂಡ್ ಮುಕ್ತಿ ಮೋರ್ಚಾ (ಜೆಎಂಎಂ) ಪಕ್ಷದ ಶಾಸಕಿ, ಶಿಬು ಸೊರೆನ್​ ಅವರ ಹಿರಿಯ ಸೊಸೆ ಸೀತಾ ಮುರ್ಮು ಸೊರೆನ್​ ಅವರು ಇಂದು ಬಿಜೆಪಿಗೆ ಸೇರ್ಪಡೆಯಾಗಿದ್ದಾರೆ. ಇಂದು ಬೆಳಗ್ಗೆ ತಮ್ಮ ಪಕ್ಷದ ಎಲ್ಲಾ ಹುದ್ದೆಗಳಿಗೆ ರಾಜೀನಾಮೆ ನೀಡಿದ್ದ ಸೀತಾ ಸೊರೆನ್​, ಇದೀಗ ದೆಹಲಿಯಲ್ಲಿ ಕಮಲ ಮುಡಿದಿದ್ದಾರೆ.

ಸತತ ಮೂರು ಬಾರಿ ಜೆಎಂಎಂ ಪಕ್ಷದಿಂದ ದುಮ್ಕಾದ ಜಮಾ ವಿಧಾನಸಭಾ ಕ್ಷೇತ್ರದ ಶಾಸಕಿಯಾಗಿದ್ದ ಸೀತಾ ಸೊರೆನ್​ ಮಂಗಳವಾರ ಬೆಳಗ್ಗೆ ಪಕ್ಷದ ಅಧ್ಯಕ್ಷ ಹಾಗೂ ಮಾವ ಶಿಬು ಸೊರೆನ್​ ಅವರಿಗೆ ಪತ್ರ ಬರೆದು ತಮ್ಮ ನಿರ್ಧಾರ ತಿಳಿಸಿದ್ದರು. ಪತ್ರದಲ್ಲಿ ಜೆಎಂಎಂನ ಸಕ್ರಿಯ ಸದಸ್ಯತ್ವ ಮತ್ತು ಕೇಂದ್ರ ಪ್ರಧಾನ ಕಾರ್ಯದರ್ಶಿ ಹುದ್ದೆಗೆ ರಾಜೀನಾಮೆ ನೀಡುವುದಾಗಿ ಹೇಳಿದ್ದರು. ಸೀತಾ ಸೊರೆನ್​ ಅವರು ಮೊದಲ ಬಾರಿಗೆ 2009ರಲ್ಲಿ ವಿಧಾನಸಭಾ ಚುನಾವಣೆಯಲ್ಲಿ ಗೆದ್ದು ಶಾಸಕಿಯಾಗಿದ್ದರು. ನಂತರ 2014 ಹಾಗೂ 2019ರಲ್ಲಿ ಚುನಾವಣೆ ಗೆಲುವು ಸಾಧಿಸಿದ್ದರು.

ಈ ಬಗ್ಗೆ ಬಿಜೆಪಿ ಕಾರ್ಯದರ್ಶಿ ವಿನೋದ್​ ತಾವ್ಡೆ ಅವರು ಮಾತನಾಡಿ, "ಜಾರ್ಖಂಡ್​ನ ಇನ್ನೊಬ್ಬ ನಾಯಕಿ ಸಹೋದರಿ ಸೀತಾ ಸೊರೆನ್​ ಅವರು ಈಗ ಬಿಜೆಪಿಗೆ ಸೇರ್ಪಡೆಯಾಗಿದ್ದಾರೆ. ಬಿಜೆಪಿಗೆ ಸೀತಾ ಸೇರ್ಪಡೆಯಿಂದ ಪಕ್ಷದ ಬಲ ಹೆಚ್ಚಾಗುವುದು ನಿಶ್ಚಿತ. ಅದರ ಪರಿಣಾಮ 2024ರ ಲೋಕಸಭಾ ಚುನಾವಣೆಯಲ್ಲಿ ಗೋಚರಿಸಲಿದೆ. ಜಾರ್ಖಂಡ್​ನಲ್ಲಿ ನಾವು ಶಕ್ತಿಶಾಲಿಯಾಗುತ್ತಿದ್ದೇವೆ. ಆದಿವಾಸಿಗಳ ಅಭ್ಯುದಯಕ್ಕೆ ನಮ್ಮ ಸಂಪೂರ್ಣ ಶಕ್ತಿಯನ್ನು ಬಳಸುತ್ತೇವೆ" ಎಂದು ಹೇಳಿದರು.

ಸಂಸದ ಲಕ್ಷ್ಮೀಕಾಂತ್​ ಭಾಜಪೇಯಿ ಮಾತನಾಡಿ, "ಸೀತಾ ಸೊರೆನ್​ ಅವರು ಜೆಎಂಎಂನಲ್ಲಿದ್ದಾಗ ಭ್ರಷ್ಟಾಚಾರದ ವಿರುದ್ಧ ಹೋರಾಡಿದ್ದಾರೆ. ದೆಹಲಿಯವರೆಗೂ ಅವರು ಅದರ ವಿರುದ್ಧ ಧ್ವನಿ ಎತ್ತಿದ್ದಾರೆ. ಅವರ ಹೋರಾಟದ ಶಕ್ತಿ ನಮ್ಮ ಪಕ್ಷ್ಕೆ ಬಲವಾಗಲಿದೆ" ಎಂದರು.

ಬಿಜೆಪಿ ಸೇರ್ಪಡೆ ಬಳಿಕ ಸೀತಾ ಮಾತು: ಬಿಜೆಪಿ ಸೇರ್ಪಡೆ ಬಳಿಕ ಮಾತನಾಡಿದ ಸೀತಾ ಸೊರೆನ್​, "ಇಂದು ನಾನು ಮೋದೀಜಿ ಅವರ ದೊಡ್ಡ ಕುಟುಂಬವನ್ನು ಸೇರಿಕೊಂಡಿದ್ದೇನೆ. ಮೋದಿ ಆಡಳಿತದಲ್ಲಿ ದೇಶದಲ್ಲಿ ಅಭಿವೃದ್ಧಿ ಕಾರ್ಯಗಳು ನಡೆಯುತ್ತಿವೆ. ಆ ಅಭಿವೃದ್ಧಿ ಕಾರ್ಯಗಳಲ್ಲಿ ನಾವೂ ಕೈಜೋಡಿಸಬೇಕಿದೆ. ದೇಶದ ಅಭಿವೃದ್ಧಿಗೆ ಕೊಡುಗೆ ನೀಡುತ್ತಿರುವ ರೀತಿ ನೋಡಿ, ಇಂದು ಎಲ್ಲರೂ ಮೋದಿ ಪರಿವಾರಕ್ಕೆ ಸೇರಬೇಕೆಂದು ಬಯಸುತ್ತಾರೆ. ಹಾಗೆಯೇ ನಾನೂ ಈಗ ಮೋದಿ ಪರಿವಾರಕ್ಕೆ ಸೇರ್ಪಡೆಯಾಗಿದ್ದೇನೆ" ಎಂದರು.

"ಜಾರ್ಖಂಡ್​ನಲ್ಲಿ ನಾನೂ ಸಾಕಷ್ಟು ಹೋರಾಟ ಮಾಡಿದ್ದೇನೆ. 14 ವರ್ಷಗಳಿಂದ ನಾನು ಜೆಎಂಎಂನಲ್ಲಿಯೇ ಇದ್ದೆ" ಎಂದು ತಮ್ಮ ಮಾವ ಶಿಬು ಸೊರೆನ್​ ಹಾಗೂ ಪತಿ ದುರ್ಗಾ ಸೊರೆನ್​ ಅವರನ್ನು ನೆನಪಿಸಿಕೊಂಡರು.

"ಪತಿಯ ಕನಸನ್ನು ನನಸು ಮಾಡಲು ಜೆಎಂಎಂ ಮೂಲಕ ರಾಜಕೀಯ ಪ್ರವೇಶಿಸಿದೆ. ಆದರೆ ಜಾರ್ಖಂಡ್​ ಇನ್ನೂ ತಲುಪಬೇಕಾದ ಹಂತವನ್ನು ತಲುಪಿಲ್ಲ. ಜಾರ್ಖಂಡ್​ ಇನ್ನೂ ಅಭಿವೃದ್ಧಿಯಿಂದ ದೂರಿದೆ. ಜಾರ್ಖಂಡ್​ ಅನ್ನು ಅಭಿವೃದ್ಧಿಯ ಪಥದಲ್ಲಿ ಮುನ್ನಡೆಸಲು ಬಯಸಿದ್ದು, ಅದಕ್ಕಾಗಿಯೇ ನಾನು ಬಿಜೆಪಿಗೆ ಸೇರಿದ್ದೇನೆ " ಎಂದು ಹೇಳಿದರು.

ಇದನ್ನೂ ಓದಿ: ಠಾಕ್ರೆ ಕುಟುಂಬದ ಮತ್ತೊಂದು ಕುಡಿ ಚುನಾವಣಾ ಅಖಾಡಕ್ಕೆ: ಯಾರವರು?