ಕಾಕಿನಾಡ (ಆಂಧ್ರಪ್ರದೇಶ): ಕಾಕಿನಾಡ ಬಂದರಿನ ಮೂಲಕ ವಿದೇಶಕ್ಕೆ ಪಿಡಿಎಸ್ ಅಕ್ಕಿ ಕಳ್ಳಸಾಗಣೆ ಮುಂದುವರಿದಿದ್ದು, ಬುಧವಾರ ಬಂದರಿನಲ್ಲಿ ಪರಿಶೀಲನೆ ನಡೆಸಿದ ಕಾಕಿನಾಡ ಜಿಲ್ಲಾಧಿಕಾರಿ ಶಾನ್ ಮೋಹನ್ ಹಡಗಿನಲ್ಲಿದ್ದ 640 ಟನ್ ಪಿಡಿಎಸ್ ಅಕ್ಕಿಯನ್ನು ವಶಪಡಿಸಿಕೊಂಡಿದ್ದಾರೆ.
ಆಂಕಾರೇಜ್ ಬಂದರಿನಲ್ಲಿ ದಿಢೀರ್ ತಪಾಸಣೆ ವೇಳೆ ಪಶ್ಚಿಮ ಆಫ್ರಿಕಾಕ್ಕೆ ತೆರಳಲು ಸಿದ್ಧವಾಗಿದ್ದ ಸ್ಟೆಲ್ಲಾ ಎಲ್ ಹಡಗಿನಲ್ಲಿ 640 ಮೆಟ್ರಿಕ್ ಟನ್ ಪಿಡಿಎಸ್ ಅಕ್ಕಿಯನ್ನು ಅಕ್ರಮವಾಗಿ ಸಾಗಿಸುತ್ತಿರುವುದು ಪತ್ತೆಯಾಗಿದೆ.
ಅಕ್ಕಿ ಸಾಗಣೆಯಾಗುತ್ತಿರುವ ಬಗ್ಗೆ ಖಚಿತ ಮಾಹಿತಿ ಮೇರೆಗೆ ಬಾರ್ಜ್ ಬರ್ತಿಂಗ್ ಪ್ರದೇಶದ ಪೊಲೀಸ್, ಕಂದಾಯ ಮತ್ತು ನಾಗರಿಕ ಸರಬರಾಜು ತಂಡದೊಂದಿಗೆ ದಿಢೀರ್ ದಾಳಿ ನಡೆಸಿದ ಜಿಲ್ಲಾಧಿಕಾರಿ, ಸುಮಾರು ಒಂದು ಗಂಟೆ ಕಾಲ ಸಮುದ್ರದಲ್ಲಿ ಪ್ರಯಾಣಿಸಿ, ಪಶ್ಚಿಮ ಆಫ್ರಿಕಾಕ್ಕೆ ಹೋಗಲು ಸಿದ್ಧವಾಗಿದ್ದ ಸ್ಟೆಲ್ಲಾ ಎಲ್ ಹಡಗನ್ನು ಪರಿಶೀಲಿಸಿದರು. ಈ ವೇಳೆ ಹಡಗಿನ ಐದು ಕೊಠಡಿಗಳಲ್ಲಿ ಅಕ್ಕಿ ದಾಸ್ತಾನುಗಳಿರುವುದು ಗೊತ್ತಾಗಿದೆ. ಐದೂ ಕೊಠಡಿಗಳಲ್ಲಿ ಸಂಗ್ರಹಿಸಿದ್ದ ಅಕ್ಕಿಯ ಮಾದರಿಗಳನ್ನು ಸಂಗ್ರಹಿಸಲಾಗಿದೆ. ಅನುಮಾನಾಸ್ಪದವಾಗಿ ಕಂಡ ಅಕ್ಕಿಯನ್ನು ಸ್ಥಳದಲ್ಲಿಯೇ ರಾಸಾಯನಿಕ ಪರೀಕ್ಷೆಗೆ ಒಳಪಡಿಸಲಾಯಿತು.
"52 ಸಾವಿರ ಟನ್ ಸಾಮರ್ಥ್ಯದ ಹಡಗಿನಲ್ಲಿ 38 ಸಾವಿರ ಟನ್ ಅಕ್ಕಿ ತುಂಬಲಾಗಿದೆ. ಅದರಲ್ಲಿ 640 ಟನ್ ಪಿಡಿಎಸ್ ಅಕ್ಕಿ ಇರುವುದು ಪತ್ತೆಯಾಗಿದೆ. ಕಾಕಿನಾಡ ಬಂದರಿನಿಂದ ವಿದೇಶಕ್ಕೆ ಅಕ್ಕಿಯನ್ನು ರಫ್ತು ಮಾಡುವ ಹಡಗಿಗೆ ಲೋಡ್ ಮಾಡಲಿರುವ ಬಾರ್ಜ್ IV0073 ರಲ್ಲಿ 1,064 ಟನ್ ಅಕ್ಕಿ ದಾಸ್ತಾನುಗಳಿರುವುದನ್ನು ಅಧಿಕಾರಿಗಳು ಗುರುತಿಸಿದ್ದಾರೆ. ಇವು ಲವನ್ ಮತ್ತು ಸಾಯಿ ತೇಜಾ ಎಕ್ಸ್‌ಪೋರ್ಟ್ಸ್‌ಗೆ ಸೇರಿದ್ದು ಎಂದು ತಿಳಿದುಬಂದಿದೆ. ಈ ಸ್ಟಾಕ್‌ಗಳ ಮಾದರಿಗಳು PDS ನ ಲಕ್ಷಣಗಳನ್ನು ತೋರಿಸಿವೆ. ಬ್ಯಾಂಕ್ ಗ್ಯಾರಂಟಿಯೊಂದಿಗೆ ಇತ್ತೀಚೆಗೆ ಬಿಡುಗಡೆಯಾದ ಪಿಡಿಎಸ್ ಸ್ಟಾಕ್‌ಗಳು ಎಂದು ಅವರು ಹೇಳುತ್ತಿದ್ದು, ದಾಖಲೆಗಳನ್ನು ಪರಿಶೀಲಿಸಿದ ನಂತರ ನಿರ್ಧಾರ ತೆಗೆದುಕೊಳ್ಳಲಾಗುವುದು" ಎಂದು ಜಿಲ್ಲಾಧಿಕಾರಿ ತಿಳಿಸಿದರು.
ಇದನ್ನೂ ಓದಿ: ಬೆಂಗಳೂರಿಗೆ ಟ್ರಾಲಿ ಬ್ಯಾಗ್ಗಳಲ್ಲಿ ಕಳ್ಳಸಾಗಣೆ ಯತ್ನ: ಏರ್ಪೋರ್ಟ್ನಲ್ಲಿ 40 ವನ್ಯಜೀವಿಗಳ ರಕ್ಷಿಸಿದ ಕಸ್ಟಮ್ಸ್ ಅಧಿಕಾರಿಗಳು
