ಇಂದು ಪಂಜಾಬ್​ ಬಂದ್​ಗೆ ರೈತರ ಕರೆ; ತುರ್ತು ಸೇವೆ ಹೊರತುಪಡಿಸಿ ಇತರ ಸೌಕರ್ಯಗಳು ಸ್ಥಗಿತ

ರೈತರು ಇಂದು ಪಂಜಾಬ್​ ಬಂದ್​ಗೆ ಕರೆ ನೀಡಿದ್ದಾರೆ. ತುರ್ತು ಸೇವೆ ಹೊರತುಪಡಿಸಿ ಸಂಪೂರ್ಣ ಬಂದ್​ ನಡೆಸುವುದಾಗಿ ಅವರು ಘೋಷಿಸಿದ್ದಾರೆ.

ಚಂಡೀಗಢ ಪಂಜಾಬ್​​: ವಿವಿಧ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಪಂಜಾಬ್​ ಮತ್ತು ಹರಿಯಾಣ ರೈತರು ಶಂಭು ಮತ್ತು ಕನೌರಿ ಗಡಿ ಬಳಿ ನಿರಂತರ ಪ್ರತಿಭಟನೆ ಮುಂದುವರೆಸಿದ್ದಾರೆ. ಈ ನಡುವೆ ರೈತರು ನಡೆಸಿದ್ದ ದೆಹಲಿ ನಡಿಗೆ ಹಲವು ಬಾರಿ ವಿಫಲವಾಗಿದ್ದು, ಗಡಿಯಲ್ಲಿಯೇ ಅವರನ್ನು ತಡೆಯಲಾಗುತ್ತಿದೆ. ಮತ್ತೊಂದೆಡೆ ನಾನಾ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ರೈತ ನಾಯಕ ಜಗ್ಜೀತ್​​ ಸಿಂಗ್​ ಕಳೆದ 34 ದಿನಗಳಿಂದ ಅಮರಣಾಂತ ಉಪವಾಸ ನಡೆಸುತ್ತಿದ್ದಾರೆ. ಅವರ ಆರೋಗ್ಯ ದಿನದಿಂದ ದಿನಕ್ಕೆ ಕ್ಷೀಣಿಸುತ್ತಿರುವ ಹಿನ್ನೆಲೆ ಮಧ್ಯ ಪ್ರವೇಶಿಸಿರುವ ಸುಪ್ರೀಂ ಕೋರ್ಟ್​​ ಪಂಜಾಬ್​ ಮತ್ತು ಕೇಂದ್ರ ಸರ್ಕಾರಗಳು, ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುವಂತೆ ಸೂಚಿಸಿದೆ.

ಈ ನಡುವೆ ರೈತರು ಇಂದು ಪಂಜಾಬ್​ ಬಂದ್​ಗೆ ಕರೆ ನೀಡಿದ್ದಾರೆ. ತುರ್ತು ಸೇವೆ ಹೊರತುಪಡಿಸಿ ಸಂಪೂರ್ಣ ಬಂದ್​ ನಡೆಸುವುದಾಗಿ ಅವರು ಘೋಷಿಸಿದ್ದಾರೆ. ಇದಾದ ಬಳಿಕ ಹರಿಯಾಣದಲ್ಲಿ ಜನವರಿ 4 ರಂದು ಮತ್ತು ಜನವರಿ 9 ರಂದು ಮೊಗಾದಲ್ಲಿ ಮಹಾಪಂಚಾಯತ್​ ಸಂಘಟಿಸಲಾಗುವುದು ಎಂದು ರೈತರು ಘೋಷಿಸಿದ್ದಾರೆ.

ಪಂಜಾಬ್​ ಬಂದ್​ಗಿಲ್ಲ ಉದ್ಯಮಗಳ ಬೆಂಬಲ: ಡಿಸೆಂಬರ್​ 30ರಂದು ಕರೆ ನೀಡಿರುವ ಪಂಜಾಬ್​ ಬಂದ್​ ರಸ್ತೆ ಟ್ರಾಫಿಕ್​ ಜೊತೆಗೆ ಉದ್ಯಮದ ಮೇಲೂ ಪರಿಣಾಮ ಬೀರಲಿದೆ. ಇದೇ ವೇಳೆ ಪಂಜಾಬ್​​ ಉದ್ಯಮಿಗಳು ಮಾರುಕಟ್ಟೆ ತೆರೆಯುವುದಾಗಿ ಘೋಷಿಸಿದ್ದಾರೆ. ಈ ಕುರಿತು ಮಾತನಾಡಿರುವ ಪಂಜಾಬ್​ ಉದ್ಯಮ ಮಂಡಳಿಯ ರಾಜ್ಯ ನಾಯಕ ಅನಿಲ್​ ಬನ್ಸಾಲ್​ ನಾನಾ, ರೈತ ಸಂಘಟನೆ ಬಂದ್​ ಕುರಿತಾಗಿ ನಮ್ಮ ಜೊತೆ ಯಾವುದೇ ಸಂಪರ್ಕ ನಡೆಸಿಲ್ಲ. ಜೊತೆಗೆ ಬಂದ್​ನಿಂದ ಉದ್ಯಮಿ - ವ್ಯಾಪಾರಿಗಳಿಗೆ ತೊಂದರೆಯಾಗಲಿದೆ. ಈಗಾಗಲೇ ಉದ್ಯಮವೂ ಕೆಟ್ಟ ಸ್ಥಿತಿಯಲ್ಲಿದೆ. ಈ ಹಿನ್ನೆಲೆಯಲ್ಲಿ ನಾವು ಪಂಜಾಬ್​ ಬಂದ್​​ಗೆ ಬೆಂಬಲ ನೀಡುವುದಿಲ್ಲ ಎಂದರು.

ಬಂದ್​ಗೆ ಸಾರಿಗೆ ಬೆಂಬಲ: ರಾಜ್ಯ ಬಂದ್​ಗೆ ಪಿಆರ್​​ಟಿಸಿ ಗುತ್ತಿಗೆ ಕಾರ್ಮಿಕರು ಬೆಂಬಲ ನೀಡಿದ್ದಾರೆ. ಬೆಳಗ್ಗೆ 10 ರಿಂದ ಮಧ್ಯಾಹ್ನ 2ರವರೆಗೆ ದಿಗ್ಬಂದನ ಹಾಕುವುದಾಗಿ ತಿಳಿಸಿದ್ದಾರೆ.

ಇಂದು ಈ ಸೌಲಭ್ಯವಿಲ್ಲ

• ಬೆಳಗ್ಗೆ 7ರಿಂದ 4ರವರೆಗೆ ಸಂಪೂರ್ಣ ಪಂಜಾಬ್​ ಬಂದ್​ ಇರಲಿದೆ.
• ಶಾಲಾ ಮತ್ತು ಕಾಲೇಜ್​ಗಳು ಕೂಡ ಮುಚ್ಚಲಿವೆ.
• ಬಸ್​ ಸೇವೆ ಲಭ್ಯವಿಲ್ಲ.
• ರೈಲು ಸೇವೆ ಕೂಡ ಇರುವುದಿಲ್ಲ.
• ಸರ್ಕಾರಿ ಮತ್ತು ಸರ್ಕಾರೇತರ ಕಚೇರಿ ಕೂಡ ಬಂದ್​ ಆಗಿರಲಿದೆ.
• ಖಾಸಗಿ ವಾಹನಗಳ ಸೇವೆ ಕೂಡ ಇರುವುದಿಲ್ಲ
• ಗ್ಯಾಸ್​ ಸ್ಟೇಷನ್​ ಕೂಡ ಮುಚ್ಚಲಿದೆ.
• ಪೆಟ್ರೋಲ್​ ಪಂಪ್ಸ್​​ ಕೂಡ ಮುಚ್ಚಲಿವೆ.
• ತರಕಾರಿ ಮಾರುಕಟ್ಟೆ ಬಂದ್​ ಇರಲಿದೆ.
• ಹಾಲಿನ ಸೇವೆಯೂ ಅಲಭ್ಯ.
• 200-300 ಸ್ಥಳದಲ್ಲಿ ದಿಗ್ಬಂಧನ
• ಸಾಮಾನ್ಯ ಜನರು ಮನೆಯಿಂದ ಹೊರ ಬರುವಂತೆ ಇಲ್ಲ.

ಯಾವ ಸೇವೆ ಲಭ್ಯವಿರಲಿದೆ?

• ತುರ್ತು ಸೇವೆ ಕಾರ್ಯಾಚರಣೆ ನಿರ್ವಹಿಸಲಿದೆ.
• ಮೆಡಿಕಲ್​ ಸೇವೆ ಕೂಡ ಲಭ್ಯ
• ವಿಮಾನ ಪ್ರಯಾಣಿಕರಿಗೆ ತಡೆ ಇಲ್ಲ.
• ವಧು ಮತ್ತು ವರರ ವಾಹನಗಳನ್ನು ತಡೆಯುವುದಿಲ್ಲ.
• ಪೇಪರ್​ ನೀಡಲು ತೆರಳುವ ವಿದ್ಯಾರ್ಥಿಗಳಿಗೆ ತಡೆಯಿಲ್ಲ.
• ಸಂದರ್ಶನಕ್ಕೆ ಹೋಗುವ ಯುವಜನರಿಗೂ ತಡೆಯಿಲ್ಲ.

ಇದನ್ನೂ ಓದಿ: ಕೇಂದ್ರ ಸರ್ಕಾರ ಹಟಮಾರಿತನ ಬಿಟ್ಟು ರೈತರೊಂದಿಗೆ ಮಾತುಕತೆಗೆ ಮುಂದಾಗಲಿ: ಪಂಜಾಬ್ ಸಿಎಂ ಮಾನ್