'ಪ್ಯಾಲೆಸ್ಟೈನ್​' ಬರಹದ ಬ್ಯಾಗ್ ಹೆಗಲಿಗೇರಿಸಿಕೊಂಡು​ ಸಂಸತ್ತಿಗೆ ಬಂದ ಪ್ರಿಯಾಂಕಾ ವಾದ್ರಾ

ಪ್ಯಾಲೆಸ್ಟೈನ್​ ಬರಹವುಳ್ಳ ಬ್ಯಾಗ್​ ಅನ್ನು ಸಂಸತ್ತಿಗೆ ಧರಿಸಿ ಬರುವ ಮೂಲಕ ಕಾಂಗ್ರೆಸ್ ಸಂಸದೆ ಪ್ರಿಯಾಂಕಾ ವಾದ್ರಾ ಹೊಸ ವಿವಾದ ಸೃಷ್ಟಿಸಿದ್ದಾರೆ.

ನವದೆಹಲಿ: ಯುದ್ಧಪೀಡಿತ ಪ್ಯಾಲೆಸ್ಟೈನ್​​ಗೆ ಬೆಂಬಲ ಸೂಚಿಸಿ ಕಾಂಗ್ರೆಸ್ ಸಂಸದೆ ಪ್ರಿಯಾಂಕಾ ವಾದ್ರಾ ಅವರು 'ಪ್ಯಾಲೆಸ್ಟೈನ್​' ಎಂಬ ಬರಹವುಳ್ಳ ವಿಶೇಷವಾಗಿ ರಚಿಸಿದ ಕೈಚೀಲವನ್ನು (ಬ್ಯಾಗ್​) ಸೋಮವಾರ ಸಂಸತ್ತಿಗೆ ತಂದಿದ್ದಾರೆ. ಇದು ವಿವಾದಕ್ಕೆ ಎಡೆ ಮಾಡಿಕೊಟ್ಟಿದ್ದು, 'ಅತಿಯಾದ ಕೋಮು ಓಲೈಕೆ' ಎಂದು ಬಿಜೆಪಿ ಟೀಕಿಸಿದೆ.

ಚಳಿಗಾಲದ ಸಂಸತ್​ ಅಧಿವೇಶನದಲ್ಲಿ ಸಂವಿಧಾನದ ಮೇಲಿನ ಚರ್ಚೆಯಲ್ಲಿ ಮಾತನಾಡಿ ಗಮನ ಸೆಳೆದಿದ್ದ ಪ್ರಿಯಾಂಕಾ ವಾದ್ರಾ ಇಂದು ಪ್ಯಾಲೆಸ್ಟೈನ್​ ಬ್ಯಾಗ್​​ನಿಂದ ಟೀಕೆಗೆ ಗುರಿಯಾದರು.

ವಯನಾಡ್​ ಸಂಸದೆ, ಗಾಜಾದಲ್ಲಿ ಇಸ್ರೇಲ್‌ನ ಕ್ರಮಗಳ ವಿರುದ್ಧ ಈ ಹಿಂದಿನಿಂದಲೂ ಧ್ವನಿ ಎತ್ತುತ್ತಾ ಬಂದಿದ್ದಾರೆ. ಅಲ್ಲಿನ ಜನರು ಮಾರಣಹೋಮದ ವಿರುದ್ಧ ಇಡೀ ವಿಶ್ವವೇ ಖಂಡಿಸಬೇಕು. ಅಲ್ಲಿನ ನಾಗರಿಕರು, ಮಹಿಳೆ, ಪುರುಷ, ವೈದ್ಯರು, ದಾದಿಯರು, ಪತ್ರಕರ್ತರು, ಶಿಕ್ಷಕರು, ಬರಹಗಾರರು, ಕವಿಗಳು, ಮುಗ್ಧ ಮಕ್ಕಳು ಸಾವನ್ನಪ್ಪುತ್ತಿದ್ದಾರೆ. ಈ ನರಮೇಧ ನಿಲ್ಲಬೇಕು ಎಂದು ಎಕ್ಸ್​ ಖಾತೆಯಲ್ಲಿ ಹಂಚಿಕೊಂಡಿದ್ದರು.

ಕಚೇರಿಗೆ ಕರೆಸಿ ಅಭಿನಂದಿಸಿದ್ದ ಪ್ಯಾಲೆಸ್ಟೈನ್​ ರಾಯಭಾರಿ: ಇತ್ತೀಚೆಗೆ ನಡೆದ ವಯನಾಡ್​ ಲೋಕಸಭೆಯಲ್ಲಿ ಗೆಲುವು ಸಾಧಿಸಿದ ಪ್ರಿಯಾಂಕಾ ವಾದ್ರಾ ಅವರಿಗೆ ಪ್ಯಾಲೆಸ್ಟೈನ್​ ರಾಯಭಾರಿ ಅಭಿನಂದನೆ ಸಲ್ಲಿಸಿದ್ದರು. ನವದೆಹಲಿಯಲ್ಲಿನ ಪ್ಯಾಲೆಸ್ಟೈನ್ ರಾಯಭಾರ ಕಚೇರಿಗೆ ಪ್ರಿಯಾಂಕಾರನ್ನು ಕರೆಸಿಕೊಂಡಿದ್ದ ರಾಯಭಾರಿಯು ಚುನಾವಣಾ ಗೆಲುವಿಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಬಿಜೆಪಿ ಟೀಕೆ: ಭಾರತದ ಸಂಸತ್ತಿನೊಳಗೆ ಪ್ಯಾಲೆಸ್ಟೈನ್​ ಪರವಾದ ಬ್ಯಾಗ್​ ಧರಿಸಿದ ಬಂದ ಪ್ರಿಯಾಂಕಾ ವಾದ್ರಾ ವಿರುದ್ಧ ಬಿಜೆಪಿ ಟೀಕಾಪ್ರಹಾರ ನಡೆಸಿದೆ. 140 ಕೋಟಿ ಭಾರತೀಯರ ಆಶಯವನ್ನು ಹೊತ್ತ ಸಂಸತ್ತಿನಲ್ಲಿ ದೂರದ ಪ್ಯಾಲೆಸ್ಟೈನ್​​ಗೆ ಬೆಂಬಲ ಸೂಚಿಸುವ ಪರಿಕರಗಳನ್ನು ತಂದ ಪ್ರಿಯಾಂಕಾರದ್ದು ಅತಿಯಾದ ಕೋಮು ಓಲೈಕೆಯಾಗಿದೆ ಎಂದು ಕುಟುಕಿದೆ.

ಬಾಂಗ್ಲಾದೇಶದಲ್ಲಿ ಹಿಂದುಗಳ ಮೇಲೆ ದೌರ್ಜನ್ಯ ನಡೆಯುತ್ತಿದೆ. ಈ ಬಗ್ಗೆ ಮಾತನಾಡದ ಕಾಂಗ್ರೆಸ್​ ನಾಯಕರು, ಮುಸ್ಲಿಂ ರಾಷ್ಟ್ರದಲ್ಲಿ ನಡೆಯುತ್ತಿರುವ ಯುದ್ಧದ ಬಗ್ಗೆ ಕಳವಳ ಹೊಂದಿದೆ. ಇದು ಆ ಪಕ್ಷದ ಮಾನಸಿಕತೆಯನ್ನು ಪ್ರತಿಬಿಂಬಿಸುತ್ತದೆ ಎಂದು ಕಿಡಿಕಾರಿದೆ.

At the end of this Parliament session, observe a two minute silence for everyone in the Congress, who believed Priyanka Vadra was the long-awaited solution, they should have embraced earlier. She is a bigger disaster than Rahul Gandhi, who thinks sporting a bag in support of… pic.twitter.com/UHofKVKdei

— Amit Malviya (@amitmalviya) December 16, 2024

ಕಾಂಗ್ರೆಸ್​ ಹೊಸ ಮುಸ್ಲಿಂ ಲೀಗ್​ ಪಕ್ಷ: ಬಿಜೆಪಿಯ ಐಟಿ ಸೆಲ್​ ಮುಖ್ಯಸ್ಥ ಅಮಿತ್​ ಮಾಳವಿಯಾ ಅವರು ವಯನಾಡ್​ ಸಂಸದೆಯ ನಡೆಯನ್ನು ಟೀಕಿಸಿದ್ದಾರೆ. ಪ್ರಿಯಾಂಕಾ ಅವರು ಪ್ರಜಾಪ್ರಭುತ್ವದ ಹೆಸರಿನಲ್ಲಿ ಕೋಮು ಬಣ್ಣವನ್ನು ತೋರಿಸಿದ್ದಾರೆ. ಪಕ್ಷದ ಮುಂದಿನ ನಾಯಕಿ ಎಂದು ಭಾವಿಸಿದ್ದ ಕಾಂಗ್ರೆಸ್​ ನಾಯಕರು, ಸಂಸತ್​ ಅಧಿವೇಶನದ ಕೊನೆಯಲ್ಲಿ ಎರಡು ನಿಮಿಷ ಮೌನಾಚಾರಣೆ ಮಾಡಬೇಕು. ಪ್ಯಾಲೆಸ್ಟೈನ್​ ಬ್ಯಾಗ್​ ಭಾರತದ ಸಂಸತ್ತಿನಲ್ಲಿ ತಂದಿದ್ದು ಕ್ರೂರ ಕೋಮುವಾದಿ ನಿಲುವು. ಕಾಂಗ್ರೆಸ್​​ ಹೊಸ ಮುಸ್ಲಿಂ ಲೀಗ್​ ಪಕ್ಷವಾಗಿ ಬದಲಾಗಿದೆ ಎಂದು ಹೇಳಿದ್ದಾರೆ.

ಇದನ್ನೂ ಓದಿ: EVM ಹ್ಯಾಕ್​ ಆರೋಪ ಮಾಡಿದ ಕಾಂಗ್ರೆಸ್​ ವಿರುದ್ಧ ಮುಗಿಬಿದ್ದ I.N.D.I.A ಮಿತ್ರಪಕ್ಷಗಳು