'ನನ್ನ ತಂದೆಗೆ ಕನಿಷ್ಠ ಸಂತಾಪ ಸಭೆ ನಡೆಸಲಿಲ್ಲ': ಕಾಂಗ್ರೆಸ್​ ವಿರುದ್ಧ ಪ್ರಣಬ್​​ ಮುಖರ್ಜಿ ಪುತ್ರಿ ಕಿಡಿ

ಮಾಜಿ ರಾಷ್ಟ್ರಪತಿ ಪ್ರಣಬ್​ ಮುಖರ್ಜಿ ಅವರ ಪುತ್ರಿ ಶರ್ಮಿಷ್ಠಾ ಮುಖರ್ಜಿ ಅವರು ಕಾಂಗ್ರೆಸ್​ ವಿರುದ್ಧ ಕಿಡಿಕಾರಿದ್ದಾರೆ. ತನ್ನ ತಂದೆಗೆ ಪಕ್ಷವು ಗೌರವಿಸಲಿಲ್ಲ ಎಂದಿದ್ದಾರೆ.

ನವದೆಹಲಿ: ಮಾಜಿ ಪ್ರಧಾನಿ ಮನಮೋಹನ್​ ಸಿಂಗ್​ ಅವರ ಸ್ಮಾರಕ ನಿರ್ಮಾಣ ಮಾಡುವ ಕುರಿತು ಬಿಜೆಪಿ ಮತ್ತು ಕಾಂಗ್ರೆಸ್ ಮಧ್ಯೆ ಮಾತಿನ ಯುದ್ಧ ನಡೆಯುತ್ತಿದ್ದರೆ, ಇತ್ತ ಮಾಜಿ ರಾಷ್ಟ್ರಪತಿ ಪ್ರಣಬ್​ ಮುಖರ್ಜಿ ಅವರ ಪುತ್ರಿ ಕಾಂಗ್ರೆಸ್​​ನ ಇಬ್ಬಗೆ ನೀತಿಯ ವಿರುದ್ಧ ಕಿಡಿಕಾರಿದ್ದಾರೆ.

ಡಾ.ಸಿಂಗ್​ ಅವರ ಸ್ಮಾರಕವನ್ನು ಅಂತ್ಯಕ್ರಿಯೆ ನಡೆಸಲಾದ ನಿಗಮ್​ ಬೋಧ್ ಘಾಟ್‌ನಲ್ಲಿ ನಿರ್ಮಿಸಬೇಕು ಎಂದು ಕಾಂಗ್ರೆಸ್​ ಕೋರಿದೆ. ಕುಟುಂಬಸ್ಥರ ಜೊತೆ ಮಾತುಕತೆ ನಡೆಸಿ ಮುಂದಿನ ನಿರ್ಧಾರ ಕೈಗೊಳ್ಳುವುದಾಗಿ ಕೇಂದ್ರ ಸರ್ಕಾರ ಹೇಳಿದೆ.

ಸಂತಾಪ ಸಭೆ ಕೂಡ ನಡೆಸಲಿಲ್ಲ: ಮಾಜಿ ಪ್ರಧಾನಿ ಡಾ. ಮನಮೋಹನ್ ಸಿಂಗ್ ಅವರಿಗೆ ಪ್ರತ್ಯೇಕ ಸ್ಮಾರಕ ನಿರ್ಮಾಣ ಕೋರಿ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರು ಬರೆದಿರುವ ಪತ್ರವನ್ನ ಟೀಕಿಸಿ ಎಕ್ಸ್​ ಖಾತೆಯಲ್ಲಿ ಬರೆದುಕೊಂಡಿರುವ ಪ್ರಣಬ್​​ ಮುಖರ್ಜಿ ಅವರ ಪುತ್ರಿ ಶರ್ಮಿಷ್ಠಾ ಮುಖರ್ಜಿ ಅವರು, ನನ್ನ ತಂದೆ ಮತ್ತು ಭಾರತದ ಮಾಜಿ ರಾಷ್ಟ್ರಪತಿ ಪ್ರಣಬ್​​ ಮುಖರ್ಜಿ ಅವರು 2020ರ ಆಗಸ್ಟ್​ನಲ್ಲಿ ನಿಧನರಾದಾಗ, ಕಾಂಗ್ರೆಸ್ ಪಕ್ಷವು ಕನಿಷ್ಠ ತನ್ನ ಕಾರ್ಯಕಾರಿ ಸಮಿತಿಯಲ್ಲಿ (CWC) ಸಂತಾಪ ಸೂಚಕ ಸಭೆಯನ್ನೂ ನಡೆಸಲಿಲ್ಲ ಎಂದು ಬೇಸರಿಸಿದ್ದಾರೆ.

When baba passed away, Congress didnt even bother 2 call CWC 4 condolence meeting. A senior leader told me it’s not done 4 Presidents. Thats utter rubbish as I learned later from baba’s diaries that on KR Narayanan’s death, CWC was called & condolence msg was drafted by baba only https://t.co/nbYCF7NsMB

— Sharmistha Mukherjee (@Sharmistha_GK) December 27, 2024

ತಮ್ಮ ತಂದೆಯವರ ಸ್ಮಾರಕಕ್ಕಾಗಿ ಕಾಂಗ್ರೆಸ್​ ಎಂದೂ ಧ್ವನಿ ಎತ್ತಿಲಿಲ್ಲ ಯಾಕೆ?. ಈ ಬಗ್ಗೆ ಆ ಪಕ್ಷದ ನಾಯಕರು ನನ್ನ ದಾರಿ ತಪ್ಪಿಸಿದರು. ರಾಷ್ಟ್ರಪತಿಗಳಿಗೆ ಸಂತಾಪ ಸೂಚಕ ಸಭೆ ಮತ್ತು ಸ್ಮಾರಕ ನಿರ್ಮಾಣದ ಪದ್ಧತಿ ಇಲ್ಲ ಎಂದು ಹೇಳಿದ್ದರು ಎಂದು ಆರೋಪಿಸಿದ್ದಾರೆ.

ಇನ್ನೊಬ್ಬ ಮಾಜಿ ರಾಷ್ಟ್ರಪತಿ ಕೆ.ಆರ್​. ನಾರಾಯಣನ್​ ಅವರು ನಿಧನ ಹೊಂದಿದಾಗ, ಸಿಡಬ್ಲ್ಯೂಸಿ ಸಭೆ ಕರೆದು ಸಂತಾಪ ಸೂಚಿಸಲಾಗಿತ್ತು. ಅದನ್ನು ನಾನು ನನ್ನ ತಂದೆಯ ಡೈರಿಯಿಂದ ತಿಳಿದುಕೊಂಡಿದ್ದೇನೆ. ಈ ಸತ್ಯವನ್ನು ಸ್ವತಃ ಪ್ರಣಬ್​​ ಮುಖರ್ಜಿ ಅವರೇ ಬರೆದುಕೊಂಡಿದ್ದರು. ಈ ಬಗ್ಗೆ ಕಾಂಗ್ರೆಸ್​ ನಾಯಕರು ನನಗೆ ಸುಳ್ಳು ಹೇಳಿದ್ದರು ಎಂದು ಕಿಡಿಕಾರಿದ್ದಾರೆ.

ಕಾಂಗ್ರೆಸ್​​ನದ್ದು ದ್ವಿಮುಖ ನೀತಿ: ಡಾ.ಸಿಂಗ್​ ಸ್ಮಾರಕಕ್ಕಾಗಿ ಧ್ವನಿ ಎತ್ತುತ್ತಿರುವ ಕಾಂಗ್ರೆಸ್​​ ವಿರುದ್ಧ ಬಿಜೆಪಿ ಕಿಡಿಕಾರಿದೆ. ಮಾಜಿ ಪ್ರಧಾನಿ ನರಸಿಂಹರಾವ್​ ಅವರ ನಿಧನದ ಬಳಿಕ ಅವರಿಗೆ ದೆಹಲಿಯಲ್ಲಿ ಅಂತಿಮ ವಿದಾಯ ಹೇಳಲೂ ಸಹ ಕಾಂಗ್ರೆಸ್​ ಬಯಸಲಿಲ್ಲ. ಹೈದರಾಬಾದ್​​ನಲ್ಲಿ ಅವರ ಅಂತ್ಯಕ್ರಿಯೆ ನಡೆಸಲಾಯಿತು. ಯುಪಿಎ ಸರ್ಕಾರವಿದ್ದರೂ ರಾವ್​ ಅವರ ಸ್ಮಾರಕವನ್ನು ನಿರ್ಮಿಸಿರಲಿಲ್ಲ.

2015 ರಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ನರಸಿಂಹರಾವ್​ ಅವರ ಸ್ಮಾರಕ ನಿರ್ಮಿಸಿ, 2024 ರಲ್ಲಿ ಅವರಿಗೆ ಭಾರತ ರತ್ನ ಪ್ರಶಸ್ತಿಯನ್ನು ಘೋಷಿಸಿದರು. ಇದು ಕಾಂಗ್ರೆಸ್​​ನ ದ್ವಿಮುಖ ನೀತಿಯಾಗಿದೆ. ತತ್ವರಹಿತ ಕಾಂಗ್ರೆಸ್‌ನ ಐತಿಹಾಸಿಕ ಪಾಪಗಳನ್ನು ರಾಷ್ಟ್ರವು ಎಂದಿಗೂ ಮರೆಯುವುದಿಲ್ಲ ಅಥವಾ ಕ್ಷಮಿಸುವುದಿಲ್ಲ ಎಂದು ಕಿಡಿಕಾರಿದೆ.

ಇದನ್ನೂ ಓದಿ: ಮನಮೋಹನ್​ ಸಿಂಗ್​ ಸ್ಮಾರಕಕ್ಕಾಗಿ ಬಿಜೆಪಿ- ಕಾಂಗ್ರೆಸ್​ ಮಧ್ಯೆ ಟಾಕ್​​ ಫೈಟ್​