ಮುಂಬೈ: ಮೀನುಗಾರರು, ರೈತರು ಮತ್ತು ಪರಿಸರವಾದಿಗಳ ತೀವ್ರ ವಿರೋಧದ ನಡುವೆ ಇಂದು ಪ್ರಧಾನಿ ನರೇಂದ್ರ ಮೋದಿ ಪಾಲ್ಘಾರ್ ಜಿಲ್ಲೆಯಲ್ಲಿ ವಧವನ್ ಬಂದರಿಗೆ ಭೂಮಿ ಪೂಜೆ ನಡೆಸಲಿದ್ದಾರೆ. 76,200 ಕೋಟಿ ವೆಚ್ಚದಲ್ಲಿ ನಿರ್ಮಾಣವಾಗಲಿರುವ ಈ ಬಂದರಿನಿಂದ ಪರಿಸರಕ್ಕೆ ಹಾನಿಯಾಗುತ್ತದೆ ಎಂಬ ಕೂಗು ಜೋರಾಗಿತ್ತು. ಈ ಹಿನ್ನೆಲೆಯಲ್ಲಿ ಕಾರ್ಯಕ್ರಮಕ್ಕೆ ಬಿಗಿ ಭದ್ರತೆ ಒದಗಿಸಲಾಗಿದ್ದು, 7 ಸಾವಿರ ಪೊಲೀಸರನ್ನು ನಿಯೋಜಿಸಲಾಗಿದೆ.
ಕಾರ್ಯಕ್ರಮವೂ ಪಾಲ್ಘಾರ್ನ ಸಿಐಡಿಸಿಒ ಮೈದಾನದಲ್ಲಿ ನಡೆಯಲಿದ್ದು, ಮಹಾರಾಷ್ಟ್ರ ರಾಜ್ಯಪಾಲರಾದ ಸಿಪಿ ರಾಧಾಕೃಷ್ಣನ್, ಮುಖ್ಯಮಂತ್ರಿ ಏಕನಾಥ್ ಶಿಂಧೆ, ಉಪ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್, ಅಜಿತ್ ಪವಾರ್, ಕೇಂದ್ರ ಬಂದರು ಸಚಿವರಾದ ಸರ್ಬಾನಂದ ಸೊನೊವಾಲ್, ಕೇಂದ್ರ ಮೀನುಗಾರಿಕೆ ಮತ್ತು ಪಶು ಸಂಗೋಪನೆ ಸಚಿವ ಎಸ್ಪಿ ಸಿಂಗ್ ಬಘೇಲ್ ಮತ್ತು ಜಾರ್ಜ್ ಕುರಿಯನ್ ಭಾಗಿಯಾಗಲಿದ್ದಾರೆ.
ಮಹಾರಾಷ್ಟ್ರದ ಪಶ್ಚಿಮ ಕರಾವಳಿಯಲ್ಲಿ ಉತ್ತರ ಮುಂಬೈನಿಂದ 130 ಕಿ.ಮೀ ದೂರದಲ್ಲಿನ ದಹನು ಬಳಿ ಈ ಬಂದರಿದೆ. ಅರಬ್ಬಿ ಸಮುದ್ರದ ಈ ತೀರ ಸರ್ವಋತುಗಳಲ್ಲೂ ಹಚ್ಚು ಹಸಿರಿನಿಂದ ಕೂಡಿರುತ್ತದೆ. ಇಲ್ಲಿ ಬಂದರು ನಿರ್ಮಾಣದ ಕುರಿತು ಜೂನ್ನಲ್ಲಿ ಕೇಂದ್ರ ಕ್ಯಾಬಿನೆಟ್ನ ಅನುಮತಿ ಪಡೆಯಲಾಗಿದ್ದು, ದೇಶದ ಬೃಹತ್ ಬಂದರನ್ನು ಇಲ್ಲಿ ನಿರ್ಮಾಣ ಮಾಡುವ ಯೋಜನೆ ಸಿದ್ಧವಾಗಿದೆ. ಇದು ಭಾರತದ 13ನೇ ಬಂದರಾಗಿದ್ದು, ಇದರ ಸಾಮರ್ಥ್ಯ 298 ಮಿಲಿಯನ್ ಟನ್ ಆಗಿದೆ.
ಈ ಬಂದರನ್ನು ವಧವನ್ ಪೋರ್ಟ್ ಪ್ರಾಜೆಕ್ಟ್ ಲಿಮಿಟೆಡ್ (ವಿಪಿಪಿಎಲ್) ಮತ್ತು ಮಹಾರಾಷ್ಟ್ರ ಸಾಗರ ಮಂಡಳಿ (ಎಂಎಂಬಿ) ಸಹಯೋಗದಲ್ಲಿ ಶೇ 74 ಮತ್ತು ಶೇ 26ರಷ್ಟು ಪಾಲುದಾರಿಕೆಯಲ್ಲಿ ನಿರ್ಮಾಣ ಮಾಡಲಾಗುವುದು. ಈ ಯೋಜನೆಯು ಸಮುದ್ರದಲ್ಲಿ 1,448 ಹೆಕ್ಟೇರ್ ಪ್ರದೇಶವನ್ನು ಪುನಶ್ಚೇತನಗೊಳಿಸಲಾಗುವುದು. 10.14 ಕಿಮೀ ಕಡಲ ತೀರದಲ್ಲಿ ಬ್ರೇಕ್‌ವಾಟರ್ ಮತ್ತು ಕಂಟೈನರ್ ಪ್ರದೇಶ ಹೊಂದಿರಲಿದೆ ಎಂದು ಮೂಲಗಳು ತಿಳಿಸಿದೆ.
ಪ್ರಧಾನಮಂತ್ರಿ ಗತಿ ಶಕ್ತಿ ಕಾರ್ಯಕ್ರಮದ ಉದ್ದೇಶವನ್ನು ಈ ಯೋಜನೆ ಪ್ರತಿಧ್ವನಿಸಲಿದ್ದು, ಇದು ಆರ್ಥಿಕತೆ ವೃದ್ಧಿಗೆ ಮತ್ತು 12 ಲಕ್ಷ ಉದ್ಯೋಗ ಸೃಷ್ಟಿಗೆ ಅವಕಾಶ ನೀಡಲಿದೆ. ಮೊದಲ ಹಂತ 2029ರೊಳಗೆ ನಿರ್ಮಾಣವಾಗಲಿದ್ದು, ಎರಡು ಮತ್ತು ಅಂತಿಮ ಹಂತ 2039 ರೊಳಗೆ ಪೂರ್ಣಗೊಳ್ಳುವ ನಿರೀಕ್ಷೆ ಇದೆ.
ಮೀನುಗಾರರು ಮತ್ತು ರೈತರ ವಿರೋಧ: ವಧವನ್ ಬಂದರ್ ವಿರೋಧಿ ಸಂಘರ್ಷ ಸಮಿತಿ (ವಿಬಿವಿಎಸ್ಎಸ್) ಅಡಿ ಸ್ಥಳೀಯ ಗ್ರಾಮಸ್ಥರು ಮತ್ತು ಮೀನುಗಾರರು ಒಟ್ಟಾಗಿ ಸೇರಿ ಈ ಯೋಜನೆ ವಿರೋಧಿಸಿದ್ದಾರೆ. ಈ ಯೋಜನೆಯು ಜನಜೀವನ ಮತ್ತು ಪರಿಸರದ ಮೇಲೆ ಹಾನಿ ಮಾಡುತ್ತದೆ. ಈ ಯೋಜನೆಯಿಂದ ತಮ್ಮನ್ನು ಒಕ್ಕಲೆಬ್ಬಿಸುವ ಕಾರ್ಯ ನಡೆಯುತ್ತದೆ ಎಂಬ ಆತಂಕ ಅವರಲ್ಲಿದೆ.
ಕೇಂದ್ರ ಪರಿಸರ ಮತ್ತು ಅರಣ್ಯ ಸಚಿವಾಲಯವೂ ಇದನ್ನು ಪರಿಸರ ಸೂಕ್ಷ್ಮ ವಲಯ ಎಂದು ಘೋಷಿಸಿದ್ದು, ಇಲ್ಲಿ ಪರಿಸರ ಹಾನಿ ಮಾಡುವಂತಹ ಕೈಗಾರಿಕೆಗಳ ಸ್ಥಾಪನೆಗೆ ನಿರ್ಬಂಧ ವಿಧಿಸಲಾಗಿದೆ ಎಂದು ಇಲ್ಲಿನ ಜನ ವಾದಿಸಿದ್ದಾರೆ.
ಇಲ್ಲಿ ಬಂದರು ನಿರ್ಮಾಣಕ್ಕೆ ಈ ಹಿಂದಿನಿಂದಲೂ ವಿರೋಧ ವ್ಯಕ್ತವಾಗುತ್ತಿದೆ. 1997ರಲ್ಲಿ ಮೊದಲ ಬಾರಿಗೆ ಆಸ್ಟ್ರೇಲಿಯಾದ ಕಂಪನಿಯೊಂದು ಬಂದರು ನಿರ್ಮಾಣಕ್ಕೆ ಪ್ರಸ್ತಾಪ ಇಟ್ಟಿತ್ತು. ಈ ವೇಳೆ ಯುಪಿಎ ಸರ್ಕಾರದ ವಿರುದ್ಧ ಪರಿಸರ ವಾದಿಗಳು ಸ್ಥಳೀಯರಿಂದ ಆಕ್ರೋಶ ವ್ಯಕ್ತವಾದ ಹಿನ್ನಲೆ ಈ ಯೋಜನೆಯನ್ನು ನಿಲ್ಲಿಸಲಾಗಿತ್ತು.
ಇದನ್ನೂ ಓದಿ: ಎನ್‌ಕೌಂಟರ್‌ನಲ್ಲಿ ಸಾವನ್ನಪ್ಪಿದ ಮಹಿಳಾ ನಕ್ಸಲಿಯರು: ಇನ್ನೂ ಹಲವರು ಮೃತಪಟ್ಟಿರುವ ಶಂಕೆ
