ಪ್ರಸ್ತುತ ದಿನಗಳಲ್ಲಿ ಆನ್ಲೈನ್ ವಂಚನೆ ಪ್ರಕರಣಗಳು ಹೆಚ್ಚುತ್ತಿವೆ. ಈ ಹಿನ್ನೆಲೆಯಲ್ಲಿ ಪಿಂಚಣಿ ನಿಧಿ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ (PFRDA) 'ರಾಷ್ಟ್ರೀಯ ಪಿಂಚಣಿ ವ್ಯವಸ್ಥೆ' (NPS) ಖಾತೆಗೆ ಲಾಗಿನ್ ಆಗುವ ಪ್ರಕ್ರಿಯೆಯನ್ನು ಇನ್ನಷ್ಟು ಬಿಗಿಗೊಳಿಸಿದೆ.
ಇನ್ಮುಂದೆ ಗ್ರಾಹಕರು NPS ಖಾತೆಗೆ ಲಾಗಿನ್ ಆಗಲು ಕಡ್ಡಾಯವಾಗಿ ಆಧಾರ್ ಆಧಾರಿತ ಟೂ-ಫ್ಯಾಕ್ಟರ್ ಅಥೆಂಟಿಕೇಷನ್ ಪೂರ್ಣಗೊಳಿಸಬೇಕಿದೆ. ಈ ಹೊಸ ನಿಯಮ ಏಪ್ರಿಲ್ 1ರಿಂದ ಜಾರಿಗೆ ಬರಲಿದೆ. ಗ್ರಾಹಕರನ್ನು ಆನ್ಲೈನ್ ವಂಚನೆಗಳಿಂದ ರಕ್ಷಿಸುವುದು ಹಾಗೂ ಖಾತೆಗಳಿಗೆ ಹೆಚ್ಚುವರಿ ಭದ್ರತೆ ಒದಗಿಸುವುದು ಇದರ ಹಿಂದಿರುವ ಉದ್ದೇಶ.
ಹೊಸ ಲಾಗಿನ್ ನಿಯಮದ ಪ್ರಯೋಜನಗಳೇನು?: PFRDA ಹೊಸ NPS ಲಾಗಿನ್ ಪ್ರಕ್ರಿಯೆಯ ಕುರಿತು ಮಾರ್ಚ್ 15, 2024ರಂದು ಅಧಿಸೂಚನೆ ಹೊರಡಿಸಲಾಗಿದೆ. ಇದರಿಂದ ಗ್ರಾಹಕರ ಖಾತೆಗಳಿಗೆ ಹೆಚ್ಚಿನ ಭದ್ರತೆ ಸಿಗಲಿದೆ. ಇದು ಚಂದಾದಾರರು ಮತ್ತು ಷೇರುದಾರರನ್ನೂ ರಕ್ಷಿಸುತ್ತದೆ. ವಿಶೇಷವಾಗಿ ಎನ್ಪಿಎಸ್ ವಹಿವಾಟುಗಳಲ್ಲಿ ಆಗುವ ವಂಚನೆಯನ್ನು ಈ ಪ್ರಕ್ರಿಯೆಯ ಮೂಲಕ ತಡೆಯಬಹುದು.
ಖಾತೆಗೆ ಲಾಗಿನ್ ಆಗುವುದು ಹೇಗೆ?: PFRDA ಸುತ್ತೋಲೆಯ ಪ್ರಕಾರ, NPS ಸೆಂಟ್ರಲ್ ರೆಕಾರ್ಡ್ ಕೀಪಿಂಗ್ ಏಜೆನ್ಸಿ (CRA) ವ್ಯವಸ್ಥೆಗೆ ಲಾಗ್ ಇನ್ ಮಾಡುವಾಗ ಬಳಕೆದಾರರು ತಮ್ಮ ID ಮತ್ತು ಪಾಸ್ವರ್ಡ್ ನಮೂದಿಸಬೇಕು. ನಂತರ ಆಧಾರ್ ದೃಢೀಕರಣದ ಟೂ-ಫ್ಯಾಕ್ಟರ್ ಅಥೆಂಟಿಕೇಷನ್ ಪ್ರಕ್ರಿಯೆ ಪೂರ್ಣಗೊಳಿಸಬೇಕು. ಇದರ ನಂತರ ಗ್ರಾಹಕರ ನೋಂದಾಯಿತ ಮೊಬೈಲ್ ಸಂಖ್ಯೆಗೆ OTP ಕಳುಹಿಸಲಾಗುತ್ತದೆ. ಅದನ್ನು ನಮೂದಿಸಿದ ನಂತರವೇ ಖಾತೆ ಬಳಕೆಗೆ ಅನುಮತಿ ದೊರೆಯಲಿದೆ.
NPS ಖಾತೆ ಲಾಗಿನ್ ವಿಧಾನ:
- ಮೊದಲಿಗೆ ನೀವು NPS ಅಧಿಕೃತ ವೆಬ್‌ಸೈಟ್ https://enps.nsdl.com/eNPS/NationalPensionSystem.html ಇದಕ್ಕೆ ಭೇಟಿ ನೀಡಿ.
- PRAIN/IPINನೊಂದಿಗೆ ವೆಬ್‌ಸೈಟ್‌ಗೆ ಲಾಗಿನ್ ಮಾಡಿ. ತಕ್ಷಣವೇ ಹೊಸ ವಿಂಡೋ ತೆರೆದುಕೊಳ್ಳುತ್ತದೆ.
- ಹೊಸ ವಿಂಡೋದಲ್ಲಿ ಬಳಕೆದಾರ ಐಡಿ ಮತ್ತು ಪಾಸ್ವರ್ಡ್ ಮತ್ತು ಕ್ಯಾಪ್ಚಾ ನಮೂದಿಸಿ.
- ಟೂ-ಫ್ಯಾಕ್ಟರ್ ಅಥೆಂಟಿಕೇಷನ್ಗಾಗಿ ಕೇಳಲಾಗುತ್ತದೆ, ಇದನ್ನು ಪೂರ್ಣಗೊಳಿಸಿ. ತಕ್ಷಣವೇ ನಿಮ್ಮ ನೋಂದಾಯಿತ ಮೊಬೈಲ್ ಸಂಖ್ಯೆಗೆ OTP ಬರುತ್ತದೆ. ಅದನ್ನು ನಮೂದಿಸಿ.
- ತಕ್ಷಣವೇ ನಿಮ್ಮ NPS ಖಾತೆ ಲಾಗಿನ್ ಆಗುತ್ತದೆ.
ಈ ತಪ್ಪು ಮಾಡಿದರೆ NPS ಖಾತೆ ಪ್ರವೇಶಿಸಲು ಸಾಧ್ಯವಿಲ್ಲ: NPS ಖಾತೆದಾರರು ಸತತವಾಗಿ 5 ಬಾರಿ ಎರಡು ಅಂಶಗಳ ದೃಢೀಕರಣ ಮಾಡಲು ವಿಫಲವಾದರೆ, ಅವನ/ಅವಳ ಖಾತೆಯನ್ನು ಲಾಕ್ ಮಾಡಲಾಗುತ್ತದೆ. ಹೀಗೆ ಆದಾಗ, ಗ್ರಾಹಕರು ತಾವು ಆರಂಭದಲ್ಲಿ ನೀಡಿರುವ ಕೆಲವು ರಹಸ್ಯ ಪ್ರಶ್ನೆಗಳಿಗೆ ಸರಿಯಾದ ಉತ್ತರವನ್ನು ನೀಡುವ ಮೂಲಕ ಪಾಸ್ವರ್ಡ್ ರಿಸೆಟ್ ಮಾಡಬಹುದು. ಗ್ರಾಹಕರು ರಹಸ್ಯ ಪ್ರಶ್ನೆ-ಉತ್ತರವನ್ನೂ ಮರೆತರೆ ಮತ್ತೊಂದು ವಿಧಾನವಿದೆ. ಇದಕ್ಕಾಗಿ ಬಳಕೆದಾರರು IPIN ರಿಇಶ್ಯೂಗಾಗಿ ಅರ್ಜಿ ಸಲ್ಲಿಸಬೇಕು. ಆಗ ಮಾತ್ರ NPS ಖಾತೆ ಲಾಗಿನ್ ಮಾಡಬಹುದು. ಇದೆಲ್ಲವೂ ಬಳಕೆದಾರರ ಸುರಕ್ಷತೆಗಾಗಿ ಇರುವ ನಿಯಮಗಳು ಎಂಬುದನ್ನು ಗ್ರಾಹಕರು ಅರಿತುಕೊಳ್ಳಬೇಕು.
ಇದನ್ನೂ ಓದಿ: ನಿಮ್ಮ ಆಧಾರ್ ಬಳಕೆಯ ಹಿಸ್ಟರಿ ತಿಳಿಯಬೇಕೇ?: ಹಾಗಾದ್ರೆ ಈ ಸರಳ ಹಂತಗಳನ್ನು ಅನುಸರಿಸಿ
