ಲೇಹ್(ಲಡಾಖ್): ಪೂರ್ವ ಲಡಾಖ್ನ ಮುಧ್ ಗ್ರಾಮವು ಸ್ಥಳೀಯ ಗ್ರಾಮ ಮಟ್ಟದ ಸ್ವಯಂಸೇವಾ ಗುಂಪಾದ ಚಾ ತ್ಸೋಗ್ಸ್ಪಾ(ಬರ್ಡ್ ಅಸೋಸಿಯೇಷನ್) ನೇತೃತ್ವದಲ್ಲಿ ಪಕ್ಷಿ ಸಂರಕ್ಷಣಾ ಉಪಕ್ರಮದ ಕೇಂದ್ರವಾಗಿ ಹೆಸರುವಾಸಿಯಾಗಿದೆ. ಚಾ ತ್ಸೋಗ್ಸ್ಪಾ ಗುಂಪನ್ನು 2003ರಲ್ಲಿ ರಚಿಸಲಾಯಿತು. ಈ ಗುಂಪಿನ ಎಲ್ಲ ಸದಸ್ಯರು 50 ರಿಂದ 70 ವರ್ಷ ವಯಸ್ಸಿನವರಾಗಿದ್ದಾರೆ. 20ಕ್ಕಿಂತ ಹೆಚ್ಚು ವರ್ಷಗಳಿಂದ ಗುಂಪಿನ ಸದಸ್ಯರು ವಲಸೆ ಪಕ್ಷಿಗಳ ಸಂರಕ್ಷಣೆಯಲ್ಲಿ ತೊಡಗಿದ್ದಾರೆ.
ವಿಶೇಷವಾಗಿ ರಡ್ಡಿ ಶೆಲ್ಡಕ್ (ಲಡಾಖಿ ಭಾಷೆಯಲ್ಲಿ ಚಾ ಮುರು) ಮತ್ತು ಬಾರ್ ಹೆಡೆಡ್ ಗೂಸ್ (ಚಾ ನಂಗ್ಪಾ) ಎಂಬ ಎರಡು ಪ್ರಭೇದದ ಪಕ್ಷಿಗಳು ಗಂಭೀರ ಸವಾಲುಗಳನ್ನು ಎದುರಿಸುತ್ತಿವೆ. ಹಿಮನದಿ ತೊರೆಗಳಿಂದ ಉಂಟಾಗಿರುವ ಜೌಗು ಪ್ರದೇಶಗಳು ಈ ವಲಸೆ ಪಕ್ಷಿಗಳ ಸಂತಾನೋತ್ಪತ್ತಿಗೆ ಮತ್ತು ಅವುಗಳ ಆಹಾರ ಒದಗಿಸುವ ನಿರ್ಣಾಯಕ ತಾಣಗಳಾಗಿ ಕಾರ್ಯನಿರ್ವಹಿಸುತ್ತವೆ. ಆದರೆ, ಅವುಗಳ ಆವಾಸ ಸ್ಥಾನದ ನಾಶ, ಮಾನವ ಹಸ್ತಕ್ಷೇಪ ಮತ್ತು ಹವಾಮಾನ ಬದಲಾವಣೆಯೂ ಚಾ ತ್ಸೊಗ್ಸ್ಪಾ ಗುಂಪಿಗೆ ಈ ಕುರಿತು ಅಗತ್ಯ ಕ್ರಮ ತೆಗೆದುಕೊಳ್ಳಲು ಪ್ರೇರೇಪಿಸಿದೆ.
ಗುಂಪಿನ ಸದಸ್ಯರು ಎರಡು ತಿಂಗಳ ಕಾಲ ಜೌಗು ಪ್ರದೇಶಗಳ ಮೇಲ್ವಿಚಾರಣೆ ಮಾಡುವ ಜೊತೆಗೆ ಪಕ್ಷಿಗಳು ಗೂಡುಕಟ್ಟುವಾಗ ಮತ್ತು ಸಂತಾನೋತ್ಪತ್ತಿ ಋತುಗಳಲ್ಲಿ ಅವುಗಳಿಗೆ ಯಾವುದೇ ರೀತಿಯ ತೊಂದರೆಯಾಗದಂತೆ ನೋಡಿಕೊಳ್ಳುತ್ತಾರೆ.
ಮುಧ್ ಗ್ರಾಮದ ನಿವಾಸಿ ಮತ್ತು ಚಾ ತ್ಸೊಗ್ಸ್ಪಾ ಗುಂಪಿನ ಸದಸ್ಯ ನವಾಂಗ್ ಚೋಸ್ಡುಪ್ ಪ್ರತಿಕ್ರಿಯಿಸಿ, ನಮ್ಮ ಗುಂಪಿನಲ್ಲಿ 12 ಜನ ಸದಸ್ಯರಿದ್ದಾರೆ. ನಾವು 14 ನೇ ದಲೈ ಲಾಮಾ ಅವರ ಆಶಯದಿಂದ ಪ್ರೇರಿತರಾಗಿ ರಡ್ಡಿ ಶೆಲ್ಡಕ್ ಅನ್ನು ಸಂರಕ್ಷಿಸುವ ಪ್ರಯತ್ನ ಮಾಡುತ್ತಿದ್ದೇವೆ. 14ನೇ ದಲೈ ಲಾಮಾ ಅವರು 2003ರಲ್ಲಿ ಚಾಂಗ್ಥಾಂಗ್ಗೆ ಭೇಟಿ ನೀಡಿ ರಡ್ಡಿ ಶೆಲ್ಡಕ್ ಪಕ್ಷಿ ಬಗ್ಗೆ ಮಾಹಿತಿ ನೀಡಿದ್ದರು. ಟಿಬೆಟ್ನಲ್ಲಿ ಆಗಾಗ್ಗೆ ಕಂಡುಬರುವ ಈ ಪಕ್ಷಿಗಳು ಈಗ ಪೂರ್ವ ಲಡಾಖ್ನಲ್ಲಿ ಅದರಲ್ಲೂ ವಿಶೇಷವಾಗಿ ಮುಧ್ನಲ್ಲಿ ಕಂಡು ಬರುತ್ತಿವೆ ಎಂದು ತಿಳಿಸಿದರು.
ಜೀವನದುದ್ದಕ್ಕೂ ಪಕ್ಷಿಗಳಿಗೆ ನೆರವು ನೀಡಲು ಬದ್ಧ: ಈ ಪಕ್ಷಿಗಳಿಗೆ ಸುಮಾರು ಎರಡು ತಿಂಗಳವರೆಗೆ ನಮ್ಮ ನೆರವು ಅಗತ್ಯವಿರುತ್ತದೆ. ನಂತರ ಪಕ್ಷಿಗಳು ತಮ್ಮ ಮರಿಗಳನ್ನು ನೋಡಿಕೊಳ್ಳುತ್ತವೆ. ನಾವು ಸರದಿ ಪ್ರಕಾರ ಕಾರ್ಯನಿರ್ವಹಿಸುತ್ತೇವೆ. ಪ್ರತಿದಿನ ಇಬ್ಬರು ಸದಸ್ಯರು ಕರ್ತವ್ಯದಲ್ಲಿರುತ್ತಾರೆ. ಬೆಳಿಗ್ಗೆ 5:30 ರಿಂದ ಸಂಜೆ 6:00 ರವರೆಗೆ, ನಾವು ಹಳ್ಳಿಯಿಂದ ದೂರದಲ್ಲಿರುವ ಕಣಿವೆಯಿಂದ ಪಕ್ಷಿಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತೇವೆ. ಕಳೆದ 20 ವರ್ಷಗಳಿಂದ ಈ ಕೆಲಸ ಮಾಡುತ್ತಿರುವುದಕ್ಕೆ ನಾವು ಅದೃಷ್ಟವಂತರು ಎಂದು ಭಾವಿಸುತ್ತೇವೆ ಮತ್ತು ನಮ್ಮ ಜೀವನದುದ್ದಕ್ಕೂ ಈ ಪಕ್ಷಿಗಳಿಗೆ ನೆರವು ನೀಡಲು ಬದ್ಧರಾಗಿದ್ದೇವೆ ಎಂದರು.
ಲಡಾಖ್ನಲ್ಲಿ ಮಾತ್ರ ಸಂತಾನೋತ್ಪತ್ತಿ: ಲಡಾಖ್ನ ಪಕ್ಷಿ ಪ್ರೇಮಿ ಪದ್ಮಾ ಗ್ಯಾಲ್ಪೋ ಮಾತನಾಡಿ, ರಡ್ಡಿ ಶೆಲ್ಡಕ್ ಮತ್ತು ಬಾರ್ ಹೆಡ್ ಗೂಸ್ ಲಡಾಖ್, ಟಿಬೆಟ್, ರಷ್ಯಾ, ಮಂಗೋಲಿಯಾ ಮತ್ತು ಕಝಾಕಿಸ್ತಾನ ದೇಶಗಳಲ್ಲಿ ಕಂಡು ಬರುತ್ತವೆ. ಈ ಪಕ್ಷಿಗಳು ಹೆಚ್ಚಾಗಿ ಟಿಬೆಟ್ನಲ್ಲಿ ಕಂಡುಬರುತ್ತವೆ, ಏಕೆಂದರೆ ಈ ಪ್ರದೇಶದಲ್ಲಿ ಪಕ್ಷಿಗಳು ಸಂತಾನೋತ್ಪತ್ತಿ ಮಾಡಲು ಅನೇಕ ಸರೋವರಗಳಿವೆ. ಚಳಿಗಾಲದ ತಿಂಗಳುಗಳಲ್ಲಿ ಈ ಪಕ್ಷಿಗಳು ಜಮ್ಮು, ದೆಹಲಿ, ದಕ್ಷಿಣ ಭಾರತ, ಪಶ್ಚಿಮ ಬಂಗಾಳ ಮತ್ತು ಭಾರತದ ಪೂರ್ವ ಮತ್ತು ಪಶ್ಚಿಮ ಕರಾವಳಿ ಪ್ರದೇಶಗಳಿಗೆ ವಲಸೆ ಹೋಗುತ್ತವೆ. ಭಾರತದಲ್ಲಿ ಈ ಪಕ್ಷಿಗಳು ಲಡಾಖ್ನಲ್ಲಿ ಮಾತ್ರ ಸಂತಾನೋತ್ಪತ್ತಿ ಮಾಡುತ್ತವೆ ಎಂದು ಮಾಹಿತಿ ನೀಡಿದರು.
ಪ್ರತಿ ವರ್ಷ, ಸ್ಥಳೀಯವಾಗಿ (ಚಾ ನಂಗ್ಪಾ ಖಮರ್) ಎಂದು ಕರೆಯಲ್ಪಡುವ ಎರಡರಿಂದ ಮೂರು ಗ್ರೇಲಾಗ್ ಹೆಬ್ಬಾತುಗಳು ಲಡಾಖ್ನ ಶೇ ಗ್ರಾಮಕ್ಕೆ ಬರುತ್ತವೆ. ಗ್ರಾಮಸ್ಥರು ಈ ಪಕ್ಷಿಗಳನ್ನು ಪ್ರೀತಿಯಿಂದ ಸ್ವಾಗತಿಸುತ್ತಾರೆ ಮತ್ತು ಪಕ್ಷಿಗಳಿಗಾಗಿ ಸುತ್ತಮುತ್ತಲಿನ ಪ್ರದೇಶಗಳು ಸ್ವಚ್ಛವಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳುತ್ತಾರೆ ಎಂದರು.
ಸಮುದಾಯ ನೇತೃತ್ವದ ಪಕ್ಷಿ ಸಂರಕ್ಷಣಾ ಉಪಕ್ರಮದ ಕುರಿತು ಮಾತನಾಡಿದ ಡಬ್ಲ್ಯುಡಬ್ಲ್ಯುಎಫ್ ಇಂಡಿಯಾದ ಹಿರಿಯ ಕಾರ್ಯಕ್ರಮ ಅಧಿಕಾರಿ ರಿಗ್ಜಿನ್ ದಾವಾ, "ಸ್ಥಳೀಯ ವನ್ಯಜೀವಿಗಳನ್ನು ರಕ್ಷಿಸುವಲ್ಲಿ ಇಂತಹ ಪ್ರಯತ್ನಗಳು ನಿರ್ಣಾಯಕ ಪಾತ್ರ ವಹಿಸುತ್ತವೆ. ಈಗ ಪಕ್ಷಿಗಳ ಸಂರಕ್ಷಣೆಗೆ ಡಾರ್ವಿನ್ ಉಪಕ್ರಮದ ಅಡಿ 'ರಿವೈವಿಂಗ್ ಟ್ರಾನ್ಸ್ ಹಿಮಾಲಯನ್ ರೇಂಜ್‌ಲ್ಯಾಂಡ್ ಪ್ರಾಜೆಕ್ಟ್' ಪ್ರಾರಂಭಿಸುವ ಮೂಲಕ ನಾವು ಬಾಟಮ್ ಅಪ್ ವಿಧಾನಕ್ಕೆ ಬದಲಾಯಿಸಲು ಯೋಜಿಸುತ್ತಿದ್ದೇವೆ. ಸಮುದಾಯ ನೇತೃತ್ವದ ಸಂರಕ್ಷಣೆಗೆ ಒತ್ತು ನೀಡುವುದು ಏಕೈಕ ಸುಸ್ಥಿರ ಪರಿಹಾರವಾಗಿದೆ" ಎಂದು ಹೇಳಿದರು.
ವಿಶ್ವದಲ್ಲೇ ಅತಿ ಎತ್ತರಕ್ಕೆ ಹಾರುವ ಪಕ್ಷಿ ಎಂದು ಕರೆಯಲ್ಪಡುವ ಬಾರ್ ಹೆಡೆಡ್ ಗೂಸ್, ಮೌಂಟ್ ಎವರೆಸ್ಟ್ ಮೇಲೆ ಹಾರುವುದನ್ನು ಪರ್ವತಾರೋಹಿಗಳು ಸಹ ನೋಡಿದ್ದಾರೆ. ರಡ್ಡಿ ಶೆಲ್ಡಕ್ ಬೇಸಿಗೆಯ ತಿಂಗಳುಗಳಲ್ಲಿ ಎತ್ತರದ ಪರ್ವತಗಳಲ್ಲಿ ಸಂತಾನೋತ್ಪತ್ತಿ ಮಾಡಲು ಲಡಾಖ್‌ಗೆ ವಲಸೆ ಬರುತ್ತವೆ. ಏಕೆಂದರೆ ಈ ಪ್ರದೇಶ ಅವುಗಳನ್ನು ಪರಭಕ್ಷಕಗಳಿಂದ ರಕ್ಷಿಸುತ್ತವೆ.
ಇದನ್ನೂ ಓದಿ: ಇದೇ ಮೊದಲ ಬಾರಿಗೆ 2 ಗ್ರೇಟರ್ ಫ್ಲೆಮಿಂಗೋಗಳಿಗೆ ಟ್ಯಾಗ್‌ ಅಳವಡಿಕೆ: ಪ್ರತಿ 10 ನಿಮಿಷಗಳಿಗೊಮ್ಮೆ ಟ್ರ್ಯಾಕಿಂಗ್
ಇದನ್ನೂ ಓದಿ: ಇಲ್ಲಿವೆ ಮನುಷ್ಯರಂತೆ ರಕ್ತದಾನ ಮಾಡುವ ನಾಯಿಗಳು; ಇದು ಹೇಗೆ ಸಾಧ್ಯ ಅನ್ನೋದು ನಿಮ್ಮ ಪ್ರಶ್ನೆಯೇ?
