ನವದೆಹಲಿ: ದೆಹಲಿ ವಿಧಾನಸಭಾ ಚುನಾವಣೆ ಮತದಾನಕ್ಕೆ ದಿನಗಣನೆ ಆರಂಭವಾಗಿದ್ದು, ಈ ನಡುವೆ ಸಪ್ತ ಗ್ಯಾರಂಟಿಗಳನ್ನು ಎಎಪಿ ರಾಷ್ಟ್ರೀಯ ಸಂಚಾಲಕ, ಮಾಜಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಘೋಷಣೆ ಮಾಡಿದ್ದಾರೆ. ಆರ್ಥಿಕ ದುರ್ಬಲ ವರ್ಗದವರಿಗೆ (EWS) ಫ್ಲಾಟ್, ಸಂಸದರು, ಸಚಿವರು ಮತ್ತು ಸರ್ಕಾರಿ ಅಧಿಕಾರಿಗಳ ನಿವಾಸದಲ್ಲಿ ಕಾರ್ಯ ನಿರ್ವಹಿಸುವ ಸೇವಕರ (ಮನೆಗೆಲಸದವರ) ಕೆಲಸದ ಗಂಟೆಗಳ ನಿಯಮ ಸೇರಿದಂತೆ ಹಲವು ಗ್ಯಾರಂಟಿಗಳನ್ನು ನೀಡಿದ್ದಾರೆ.
ಪೋರ್ಟಲ್ನಲ್ಲಿ ನೋಂದಣಿಯಾಗಿರುವ ಸೇವಕರಿಗೆ ವೇತನ ನಿಯಮಾವಳಿ, 10 ಲಕ್ಷ ವಿಮೆ ಮತ್ತು ಅವರ ಮಕ್ಕಳಿಗೆ ವಿಮೆ ಕೂಡ ಇದರಲ್ಲಿ ಸೇರಿದೆ.
ಈ ಕುರಿತು ಇಂದು ಮಾಧ್ಯಮಗೋಷ್ಟಿಯಲ್ಲಿ ಮಾತನಾಡಿದ ಕೇಜ್ರಿವಾಲ್ ಅವರು, ಶೇ 70-80ರಷ್ಟು ಮನೆಗೆಲಸದ ಸೇವಕರಿಗೆ ವೇತನವನ್ನು ನೀಡಲಾಗುತ್ತಿಲ್ಲ. ಅವರಿಗೆ ಕೇವಲ ಕ್ವಾಟ್ರಸ್ ಮಾತ್ರ ನೀಡಲಾಗಿದ್ದು, ಜೀತ ಕಾರ್ಮಿಕರಂತೆ ಪರಿಗಣಿಸಲಾಗುತ್ತಿದೆ. ಈ ಮನೆಗೆಲಸದವರಿಗೆ ನೀಡುತ್ತಿರುವ ಮನೆಯನ್ನು ಕೆಲವು ಸಂಸದರು ಬಾಡಿಗೆಗೆ ನೀಡಿದ್ದಾರೆ ಎಂದು ಕೂಡ ಆರೋಪಿಸಿದರು.
ಮೊದಲಿಗೆ ನಾವು ಸೇವಕರು, ಹಾಗಾಗಿ ಹೆಸರು ನೋಂದಣಿಗೆ ಪ್ರತ್ಯೇಕ ಪೋರ್ಟಲ್ ಸೃಷ್ಟಿಸಲಾಗುವುದು. ಈ ಮೂಲಕ ಕೆಲಸಗಾರರು ಉದ್ಯೋಗದ ಅವಕಾಶವನ್ನು ಹುಡುಕಬಹುದು. ಎರಡನೇಯದು ಈ ಉದ್ಯೋಗಿಗಳಿಗೆ ಹಾಸ್ಟೆಲ್ ನಿರ್ಮಾಣ ಮಾಡಲಾಗುವುದು. ಮೂರನೇಯದು ಮೊಬೈಲ್ ಮೊಹಲ್ಲಾ ಕ್ಲಿನಿಕ್ ಅನ್ನು ನಿಯೋಜಿಸಲಾಗುವುದು ಎಂದು ಆಪ್ ನಾಯಕ ಭರವಸೆ ನೀಡಿದರು.
ನಾಲ್ಕನೆಯದು ಅವರ ವೇತನ ಮತ್ತು ಕೆಲಸದ ಸಮಯವನ್ನು ನಿಯಂತ್ರಿಸಲು ಕಾನೂನುಗಳನ್ನು ಜಾರಿಗೊಳಿಸಲಾಗುವುದು. ಐದನೆಯದಾಗಿ, ಅವರಿಗೆ 10 ಲಕ್ಷ ರೂಪಾಯಿಗಳ ವಿಮಾ ರಕ್ಷಣೆ. ಆರನೇಯದಾಗಿ ಅವರ ಹೆಣ್ಣು ಮಕ್ಕಳ ಮದುವೆಗೆ 1 ಲಕ್ಷ ರೂ. ನೆರವು ನೀಡಲಾಗುವುದು ಮತ್ತು ಏಳನೆಯದಾಗಿ ಅವರ ಮಕ್ಕಳು ಉಚಿತ ಶಿಕ್ಷಣವನ್ನು ಪಡೆಯುತ್ತಾರೆ ಎಂದು ಕೇಜ್ರಿವಾಲ್ ಹೇಳಿದರು.
ಕಳೆದೊಂದು ದಶಕದಿಂದ ದೆಹಲಿಯಲ್ಲಿ ಅಧಿಕಾರ ಹೊಂದಿರುವ ಎಎಪಿ ಈ ಬಾರಿ ಕೂಡ ಗೆಲುವು ಸಾಧಿಸಲು ನಿರಂತರ ಪ್ರಚಾರ, ಗ್ಯಾರಂಟಿ ಭರವಸೆ ನೀಡುತ್ತಿದೆ. ಈ ನಡುವೆ ಬಿಜೆಪಿ ಹಾಗೂ ಕಾಂಗ್ರೆಸ್ ಕೂಡ ಮತದಾರರನ್ನು ಸೆಳೆಯಲು ನಾನಾ ಕಸರತ್ತು ನಡೆಸಿವೆ.
ಇದೇ ಫೆ. 5ರಂದು ದೆಹಲಿ ವಿಧಾನಸಭಾ ಚುನಾವಣೆ ಮತದಾನ ನಡೆಯಲಿದ್ದು, ಫೆಬ್ರವರಿ 8ರಂದು ಫಲಿತಾಂಶ ಹೊರಬೀಳಲಿದೆ.
ಇದನ್ನೂ ಓದಿ: ದೆಹಲಿ ಚುನಾವಣೆ: ಹಣ, ಮದ್ಯವಿದ್ದ ಕಾರು ವಶಕ್ಕೆ; ನಂಬರ್ ಪ್ಲೇಟ್ ನಕಲಿ ಎಂದ ಎಎಪಿ
