ಹೈದರಾಬಾದ್: ಕರ್ನಾಟಕ ಸೇರಿದಂತೆ ದೇಶದ ವಿವಿಧೆಡೆ ₹88.32 ಕೋಟಿ ಮೊತ್ತದ ಸೈಬರ್ ವಂಚನೆಯಲ್ಲಿ ಭಾಗಿಯಾಗಿದ್ದ ಬೃಹತ್ ಸೈಬರ್ ವಂಚನೆ ಜಾಲವನ್ನು ಪತ್ತೆ ಹಚ್ಚಿರುವ ಹೈದರಾಬಾದ್ ಸೈಬರ್ ಕ್ರೈಂ ಪೊಲೀಸರು, ಹಣ ಅಕ್ರಮ ವರ್ಗಾವಣೆಗೆ ವಂಚಕರಿಗೆ ನೆರವು ನೀಡಿದ್ದ ಮೂವರು ಬ್ಯಾಂಕ್ ಅಧಿಕಾರಿಗಳು ಸೇರಿದಂತೆ ಬರೋಬ್ಬರಿ 52 ಜನರನ್ನು ಬಂಧಿಸಿದ್ದಾರೆ. ಬಂಧಿತ ಬ್ಯಾಂಕ್ ಅಧಿಕಾರಿಗಳಲ್ಲಿ ಕರ್ನಾಟಕದವರೂ ಸೇರಿಸಿದ್ದಾರೆ.
ಕರ್ನಾಟಕ, ಆಂಧ್ರಪ್ರದೇಶ, ಗುಜರಾತ್ ಸೇರಿದಂತೆ ದೇಶಾದ್ಯಂತ ಹಲವು ರಾಜ್ಯಗಳಲ್ಲಿ 33 ಸೈಬರ್ ವಂಚನೆ ಪ್ರಕರಣಗಳನ್ನು ಭೇದಿಸಲಾಗಿದ್ದು, ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಮೂವರು ಬ್ಯಾಂಕ್ ಅಧಿಕಾರಿಗಳು ಸೇರಿದಂತೆ ಒಟ್ಟು 55 ಆರೋಪಿಗಳನ್ನು ಇತ್ತೀಚೆಗೆ ಬಂಧಿಸಲಾಗಿದೆ. ಬಂಧಿತರು 88.32 ಕೋಟಿ ರೂ.ಗಳನ್ನು ವಂಚಿಸಿರುವುದು ತನಿಖೆಯಲ್ಲಿ ಬಯಲಾಗಿದೆ ಎಂದು ಹೈದರಾಬಾದ್ ಸೈಬರ್ ಕ್ರೈಮ್ ಪೊಲೀಸರು ತಿಳಿಸಿದ್ದಾರೆ.
ಕಾರ್ಯಾಚರಣೆಯಲ್ಲಿ ಪೊಲೀಸರು ವಶಪಡಿಸಿಕೊಂಡ ಸ್ವತ್ತು: ಬಂಧಿತರಿಂದ 47.90 ಲಕ್ಷ ರೂ. ನಗದು, 40 ಲಕ್ಷ ರೂ. ಮೌಲ್ಯದ ಕ್ರಿಪ್ಟೋ ಕರೆನ್ಸಿ, 39 ಎಟಿಎಂ ಕಾರ್ಡ್‌ಗಳು, 17 ಬ್ಯಾಂಕ್ ಪಾಸ್‌ಬುಕ್‌ಗಳು, 54 ಚೆಕ್‌ಬುಕ್‌ಗಳು ಇತ್ಯಾದಿಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಹೆಚ್ಚುವರಿಯಾಗಿ, ಆರೋಪಿಗಳ ಬ್ಯಾಂಕ್ ಖಾತೆಗಳಲ್ಲಿ 2.87 ಕೋಟಿ ರೂ. ಮೌಲ್ಯದ ನಗದು ವಹಿವಾಟುಗಳನ್ನು ಸ್ಥಗಿತಗೊಳಿಸಲಾಗಿದೆ ಎಂದು ಹೈದರಾಬಾದ್ ಪೊಲೀಸ್ ಆಯುಕ್ತ ಸಿ.ವಿ. ಆನಂದ್ ಮಾಹಿತಿ ನೀಡಿದ್ದಾರೆ.
ಬಂಧಿತ ಬ್ಯಾಂಕ್ ಅಧಿಕಾರಿಗಳು:
- ಶುಭಂ ಕುಮಾರ್ ಝಾ (ಉಪ ವ್ಯವಸ್ಥಾಪಕರು, ಆರ್‌ಬಿಎಲ್ ಬ್ಯಾಂಕ್, ಬೆಂಗಳೂರು)
- ಹರೂನ್ ರಶೀದ್ ಮತ್ತು ಆರ್. ಮೋಹನ್ (ಉಪಾಧ್ಯಕ್ಷರು, ಆಕ್ಸಿಸ್ ಬ್ಯಾಂಕ್, ಮಲ್ಲೇಶ್ವರಂ ಶಾಖೆ)
- ಕೆ. ಶ್ರೀನಿವಾಸ ರಾವ್ (ಮಾರಾಟ ವ್ಯವಸ್ಥಾಪಕ, ಕೋಟಕ್ ಮಹೀಂದ್ರ ಬ್ಯಾಂಕ್, ಹೈದರಾಬಾದ್ JNTU ಶಾಖೆ)
ಬೆಂಗಳೂರಿನ ವಿದ್ಯಾರಣ್ಯಪುರದ ಆರ್‌ಬಿಎಲ್ ಬ್ಯಾಂಕಿನ ಉಪ ವ್ಯವಸ್ಥಾಪಕ ಶುಭಂ ಕುಮಾರ್ ಝಾ ಮತ್ತು ಮಲ್ಲೇಶ್ವರಂ ಶಾಖೆಯ ಆಕ್ಸಿಸ್ ಬ್ಯಾಂಕಿನ ಉಪಾಧ್ಯಕ್ಷ ಹರೂನ್ ರಶೀದ್ ಮತ್ತು ಆರ್. ಮೋಹನ್ ಇಬ್ಬರು ಸೇರಿ ಯಾವುದೇ ದಾಖಲೆಗಳಿಲ್ಲದೇ ನೂರಾರು ಬ್ಯಾಂಕ್ ಖಾತೆಗಳನ್ನು ತೆರೆಯುವ ಮೂಲಕ ಸೈಬರ್ ಅಪರಾಧಿಗಳಿಗೆ ಸಹಾಯ ಮಾಡಿದ್ದಾರೆ. ಅವರು ಪ್ರತಿ ಖಾತೆಗೆ 50,000 ರೂ.ಗಳಿಂದ 80,000 ರೂ.ಗಳವರೆಗೆ ಕಮಿಷನ್ ಸಹ ಪಡೆದಿರುವುದು ತನಿಖೆ ವೇಳೆ ಗೊತ್ತಾಗಿದೆ. ಪ್ರತಿಯೊಬ್ಬರೂ ಇತರ ಬ್ಯಾಂಕ್‌ಗಳಿಂದ ಸುಮಾರು 150 ಖಾತೆಗಳನ್ನು ವಂಚಕರಿಗೆ ನೀಡಿದ್ದಾರೆ. ಕೋಟಕ್ ಮಹೀಂದ್ರ ಬ್ಯಾಂಕಿನ ಹೈದರಾಬಾದ್ ಜೆಎನ್‌ಟಿಯು ಶಾಖೆಯ ಮಾರಾಟ ವ್ಯವಸ್ಥಾಪಕ, ಗುಂಟೂರು ಜಿಲ್ಲೆಯ ಮುಪ್ಪಳ್ಳ ನಿವಾಸಿಯಾದ ಕೆ. ಶ್ರೀನಿವಾಸ ರಾವ್ ಪ್ರಕರಣದಲ್ಲಿ ಭಾಗಿಯಾಗಿರುವುದು ಕೂಡ ಕಂಡು ಬಂದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ನಕಲಿ ಹೆಸರಿನಲ್ಲಿ ಖಾತೆ ತೆರೆದು ವಂಚನೆ: ಬಂಧಿತ ಬ್ಯಾಂಕ್ ಅಧಿಕಾರಿಗಳು ಕಮಿಷನ್ ಆಸೆಗಾಗಿ ನಕಲಿ ಅಥವಾ ಗುಪ್ತ (Mule) ಹೆಸರಿನಲ್ಲಿ ಬ್ಯಾಂಕ್ ಖಾತೆ ತೆರೆದು ವಂಚಕರಿಗೆ ಹಣ ಅಕ್ರಮವಾಗಿ ವರ್ಗಾಯಿಸಲು ಸಹಾಯ ಮಾಡಿರುವುದು ತನಿಖೆ ವೇಳೆ ಗೊತ್ತಾಗಿದೆ. ಕರ್ನಾಟಕ, ಗುಜರಾತ್, ಆಂಧ್ರಪ್ರದೇಶ, ದೆಹಲಿ, ಉತ್ತರ ಪ್ರದೇಶ, ಪಶ್ಚಿಮ ಬಂಗಾಳ, ಬಿಹಾರ ಮತ್ತು ಹೈದರಾಬಾದ್‌ನಾದ್ಯಂತ ವಿಶೇಷ ಪೊಲೀಸ್ ಕಾರ್ಯಾಚರಣೆ ನಡೆಸಿ ವಂಚಕರನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಏನಿದು Mule ಖಾತೆ?:
1ನೇ ಹಂತ: ವಂಚಕರು ಇ-ಮೇಲ್, ಚಾಟ್ ರೂಂ, ಜಾಬ್ ಸೀಕಿಂಗ್ ವೆಬ್ಸೈಟ್ ಅಥವಾ ಬ್ಲಾಗ್ಗಳ ಮೂಲಕ ಸಂಪರ್ಕಿಸಿ, ಅವರನ್ನು ಒಪ್ಪಿಸಿ ಅವರ ಖಾತೆಗಳಿಗೆ ಕಳ್ಳ ಹಣ ಹಾಕಿಸಿಕೊಂಡು, ಆಕರ್ಷಕ ಕಮಿಷನ್ ನೀಡುವ ಮೂಲಕ ಗುಪ್ತ ಖಾತೆಗಳನ್ನು ತೆರೆಯುವುದಾಗಿದೆ.
2ನೇ ಹಂತ: ಇನ್ನೊಂದು ಹಂತ ಎಂದರೆ ಗುಪ್ತ ಖಾತೆ(ಅಂದರೆ mule’s account)ಗಳ ಮುಖಾಂತರ ಅಕ್ರಮವಾಗಿ ಹಣವನ್ನು ವರ್ಗಾವಣೆ ಮಾಡುವುದಾಗಿದೆ.
3ನೇ ಹಂತ: ಒಂದು ಗುಪ್ತ ಖಾತೆ (ಅಂದರೆ mule ಅಕೌಂಟ್) ಮೂಲಕ ಮತ್ತೊಂದು(another money mule’s account) ಗುಪ್ತ ಹೆಸರಿನ ಖಾತೆಗೆ ಹಣ ವರ್ಗಾವಣೆಯಾಗುತ್ತಾ ಸಾಗುತ್ತದೆ. ಅಂತಿಮವಾಗಿ ನಿಗದಿತ ವಂಚಕನ ಖಾತೆಗೆ ಕಳ್ಳ ಹಣ ಟ್ರಾನ್ಸಫರ್ ಆಗುತ್ತದೆ.
4ನೇ ಹಂತ: ಒಂದೊಮ್ಮೆ ಇಂತಹ ಖಾತೆಗಳ ಮೂಲಕ ಹಣ ವರ್ಗಾವಣೆ ಆಗಿ, ದೂರು ದಾಖಲಾದಾಗ ಪೊಲೀಸರು ಇಂತಹ ಖಾತೆಗಳ ಬೆನ್ನು ಬಿದ್ದು ತನಿಖೆ ಮಾಡಬೇಕಾಗುತ್ತದೆ. ಇದು ಚೈನ್ ಲಿಂಕ್ ತರಹ ಕೆಲಸ ಮಾಡುವುದರಿಂದ ಇಂತಹ ಪ್ರಕರಣಗಳನ್ನು ಭೇದಿಸಲು ಪೊಲೀಸರು ಹರಸಾಹಸ ಪಡುತ್ತಾರೆ.
ಮಾಸ್ಟರ್ ಮೈಂಡ್ ಬಂಧನ: ಪಶ್ಚಿಮ ಗೋದಾವರಿ ಜಿಲ್ಲೆಯ ವೇಲ್ಪುರ ನಿವಾಸಿ ರೆಡ್ಡಿ ಪ್ರವೀಣ್ ಮತ್ತು ಮಚಲಿಪಟ್ಟಣ ನಿವಾಸಿ ಮಾಗಂಟಿ ಜಯರಾಮ್ ಈ ಖಾತೆಗಳನ್ನು ತೆರೆಯುವಲ್ಲಿ ಭಾಗಿಯಾಗಿದ್ದಾರೆ. ಅವರೊಂದಿಗೆ, ಗುಪ್ತ ಖಾತೆಗೆ ಜಮಾ ಮಾಡಿದ ಹಣವನ್ನು ಕ್ರಿಪ್ಟೋ ಕರೆನ್ಸಿಯಾಗಿ ಪರಿವರ್ತಿಸಿದ ಹೈದರಾಬಾದ್‌ನ ಬಹದ್ದೂರ್‌ಪುರ ಪ್ರದೇಶದ ಮೊಹಮ್ಮದ್ ಜುನೈದ್ ಮತ್ತು ದುಬೈನಲ್ಲಿ ಮಾಸ್ಟರ್ ಮೈಂಡ್ ಮೊಹಮ್ಮದ್ ಇಸ್ಮಾಯಿಲ್ ಎಂಬುವರನ್ನು ಪೊಲೀಸರು ಬಂಧಿಸಿದ್ದಾರೆ.
ಗುಜರಾತ್‌ನ ಹರ್ಪಾಲ್ ಸಿಂಗ್ (50) ಮತ್ತು ಸೈಯದ್ ಅಯುಭಾಯಿ (50) ವಿವಿಧ ಸರ್ಕಾರಿ ಸಂಸ್ಥೆಗಳ ಹೆಸರಿನಲ್ಲಿ ಹಣ ಇರುವ ವ್ಯಕ್ತಿಗಳಿಗೆ ವಾಟ್ಸಾಪ್, ಸ್ಕೈಪ್ ಮತ್ತು ಇಂಟರ್ನೆಟ್ ಮೂಲಕ ಕರೆ ಮಾಡಿ ಹಣ ಸುಲಿಗೆ ಮಾಡುತ್ತಿದ್ದರು. ಹಣ ವರ್ಗಾವಣೆ, ಮಾದಕವಸ್ತು ಕಳ್ಳಸಾಗಣೆ ಮತ್ತು ಭಯೋತ್ಪಾದನೆಯ ಅಂತಹ ಆರೋಪಗಳನ್ನು ಹೊರಿಸಿ ಬೆದರಿಕೆ ಹಾಕುತ್ತಿದ್ದರು. ದೇಶಾದ್ಯಂತ ಅವರಿಬ್ಬರ ವಿರುದ್ಧ 17 ಪ್ರಕರಣಗಳಿದ್ದು, ಅವರಿಬ್ಬರನ್ನೂ ಇದೀಗ ಬಂಧಿಸಲಾಗಿದೆ ಎಂದು ಪೊಲೀಸ್ ಆಯುಕ್ತ ತಿಳಿಸಿದ್ದಾರೆ.
ಸೈಬರ್ ಅಪರಾಧದ ವಿರುದ್ಧ ಕ್ರಮ: ₹88.32 ಕೋಟಿ ಮೊತ್ತದ ಸೈಬರ್ ವಂಚನೆಯಲ್ಲಿ ಭಾಗಿಯಾಗಿದ್ದ ಗ್ಯಾಂಗ್‌ನ ಮಾಸ್ಟರ್ ಮೈಂಡ್ ಸೇರಿದಂತೆ ಮೂವರು ಬ್ಯಾಂಕ್ ಅಧಿಕಾರಿಗಳು ಮತ್ತು ಮಧ್ಯವರ್ತಿಗಳು ಸೇರಿದಂತೆ 52 ಜನರನ್ನು ಬಂಧಿಸಲಾಗಿದೆ. ಈ ಮೂಲಕ ಬ್ಯಾಂಕಿಂಗ್ ವ್ಯವ್ಯಸ್ಥೆಯನ್ನು ದುರುಪಯೋಗಪಡಿಸಿಕೊಳ್ಳುವ ಸೈಬರ್ ಅಪರಾಧಿಗಳ ಮೇಲೆ ಅಧಿಕಾರಿಗಳು ಹದ್ದಿನ ಕಣ್ಣು ಇಡಲಾಗಿದೆ. ಹಣಕಾಸಿನ ವಹಿವಾಟುಗಳನ್ನು ಪತ್ತೆಹಚ್ಚಲು ಹೆಚ್ಚಿನ ತನಿಖೆ ನಡೆಸಲಾಗುತ್ತಿದೆ ಎಂದು ಅವರು ಹೇಳಿದ್ದಾರೆ.
ಇದನ್ನೂ ಓದಿ: ಸೈಬರ್ ವಂಚನೆ; 10 ಸಾವಿರ ರೂಪಾಯಿ ಹಿಂಪಡೆಯಲು ಹೋಗಿ 20 ಲಕ್ಷ ರೂ. ಕಳೆದುಕೊಂಡ ವ್ಯಕ್ತಿ - CYBER FRAUD
