ಚೆನ್ನೈ(ತಮಿಳುನಾಡು): ಸರ್ಕಾರಿ ಶಾಲೆಗಳಲ್ಲಿ ಪ್ರಾಥಮಿಕ ಶಿಕ್ಷಣ ಮುಗಿಸಿದ ನಂತರ ಉನ್ನತ ಶಿಕ್ಷಣ ಪಡೆಯುವ ಪುರುಷ ವಿದ್ಯಾರ್ಥಿಗಳಿಗೆ ಮಾಸಿಕ 1,000 ರೂ. ನೀಡುವ ಆರ್ಥಿಕ ಸಹಾಯ ಯೋಜನೆ 'ತಮಿಳು ಪುಢಲ್ವನ್'ಗೆ ಇಂದು ತಮಿಳುನಾಡು ಮುಖ್ಯಮಂತ್ರಿ ಎಂ.ಕೆ.ಸ್ಟಾಲಿನ್ ಕೊಯಮತ್ತೂರಿನಲ್ಲಿ ಚಾಲನೆ ನೀಡಿದರು. ಪ್ರಸಕ್ತ ಆರ್ಥಿಕ ವರ್ಷ ಈ ಕಾರ್ಯಕ್ರಮದ ಅನುಷ್ಠಾನಕ್ಕೆ ಸರ್ಕಾರ 360 ಕೋಟಿ ರೂ. ಮೀಸಲಿಟ್ಟಿದೆ.
ಹೆಣ್ಣು ಮಕ್ಕಳಿಗೆ 'ಪುದುಮೈ ಪೆಣ್' ಯೋಜನೆ: ಈ ಹಿಂದೆ ಹೆಣ್ಣು ಮಕ್ಕಳಿಗಾಗಿ 'ಪುದುಮೈ ಪೆಣ್' ಎಂಬ ಇದೇ ರೀತಿಯ ಆರ್ಥಿಕ ಸಹಾಯ ಕಾರ್ಯಕ್ರಮವನ್ನು ಸರ್ಕಾರ ಪ್ರಾರಂಭಿಸಿತ್ತು. ಈ ಯೋಜನೆಯಡಿ ಉನ್ನತ ಶಿಕ್ಷಣ ಪಡೆಯುವ ಹೆಣ್ಣು ಮಕ್ಕಳು ಸರ್ಕಾರಿ ಶಾಲೆಗಳಲ್ಲಿ ಶಿಕ್ಷಣ ಪೂರ್ಣಗೊಳಿಸಿದ ನಂತರ ತಿಂಗಳಿಗೆ 1,000 ರೂ. ನೀಡಲಾಗುತ್ತಿದೆ. ಇದೀಗ ಕಾರ್ಯಕ್ರಮವನ್ನು ಹುಡುಗರಿಗೂ ಸರ್ಕಾರ ವಿಸ್ತರಿಸಿದೆ.
ಉದ್ದೇಶವೇನು?: ವಿದ್ಯಾರ್ಥಿಗಳನ್ನು ಉನ್ನತ ಶಿಕ್ಷಣಕ್ಕೆ ಪ್ರೋತ್ಸಾಹಿಸುವ ಮತ್ತು ಸಹಾಯ ಮಾಡುವ ಉದ್ದೇಶದಿಂದ 'ತಮಿಳು ಪುಢಲ್ವನ್' ಮತ್ತು 'ಪುದುಮೈ ಪೆಣ್' ಯೋಜನೆಗಳನ್ನು ರೂಪಿಸಿ ಪ್ರಾರಂಭಿಸಲಾಗಿದೆ ಎಂದು ಮುಖ್ಯಮಂತ್ರಿಗಳ ಕಚೇರಿ ಪ್ರಕಟಣೆ ತಿಳಿಸಿದೆ.
ಯೋಜನೆಗೆ ಚಾಲನೆ ನೀಡಿ ಮಾತನಾಡಿದ ಸಿಎಂ ಸ್ಟಾಲಿನ್, ''ರಾಜ್ಯ ಸರ್ಕಾರದಿಂದ ಯುವ ವಿದ್ಯಾರ್ಥಿಗಳಿಗಾಗಿ 'ತಮಿಳು ಪುಢಲ್ವನ್' ಯೋಜನೆ ಜಾರಿಗೆ ತರಲಾಗಿದೆ. 2024-2025ರ ಆರ್ಥಿಕ ವರ್ಷದಿಂದ ಸರ್ಕಾರಿ ಶಾಲೆಗಳು ಮತ್ತು ಸರ್ಕಾರಿ ಅನುದಾನಿತ ಶಾಲೆಗಳಲ್ಲಿ 6ರಿಂದ 12ನೇ ತರಗತಿಯವರೆಗೆ ತಮಿಳು ಮಾದರಿಯಲ್ಲಿ ಉನ್ನತ ಶಿಕ್ಷಣ ಪಡೆಯುವ ಯುವ ವಿದ್ಯಾರ್ಥಿಗಳು 'ತಮಿಳು ಪುಢಲ್ವನ್' ಯೋಜನೆಯಡಿ 1,000 ರೂ. ಮಾಸಿಕ ಆರ್ಥಿಕ ಸಹಾಯ ಪಡೆಯಬಹುದು'' ಎಂದರು.
ಇವು ಅರ್ಹತೆಗಳು: ಫಲಾನುಭವಿಗಳು ಯೋಜನೆ ಪಡೆಯಲು 6ರಿಂದ 12ನೇ ತರಗತಿಯವರೆಗೆ ರಾಜ್ಯದ ಸರ್ಕಾರಿ ಶಾಲೆಗಳಲ್ಲಿಯೇ ಓದಿರಬೇಕು. ಸರ್ಕಾರವೇ ಗುರುತಿಸಿದ ಶಿಕ್ಷಣ ಸಂಸ್ಥೆಯಲ್ಲಿ ಉನ್ನತ ಶಿಕ್ಷಣ ಪಡೆಯಬೇಕು ಎಂದು ಅನುದಾನ ವಿತರಣೆಯ ಜೊತೆಗೆ ಕಾರ್ಯಕ್ರಮದ ಅನುಷ್ಠಾನಕ್ಕಾಗಿ ಸರ್ಕಾರ ಸಮಗ್ರ ನಿಯಮಗಳನ್ನು ಬಿಡುಗಡೆ ಮಾಡಿದೆ.
ಸರ್ಕಾರಿ ಶಾಲೆ ಮತ್ತು ಸರ್ಕಾರಿ ಅನುದಾನಿತ ಶಾಲೆಗಳಲ್ಲಿ 12ನೇ ತರಗತಿ ತೇರ್ಗಡೆಯಾಗಿ ಕಾಲೇಜು ಸೇರುವ ಅಥವಾ ಉನ್ನತ ಶಿಕ್ಷಣ ಪಡೆಯಲು ಇಚ್ಛಿಸುವ ಸುಮಾರು 3 ಲಕ್ಷದ 28 ಸಾವಿರ ವಿದ್ಯಾರ್ಥಿಗಳಿಗೆ ಮಾಸಿಕ 1,000 ರೂ. ಆರ್ಥಿಕ ನೆರವು ನೀಡಲು ಉದ್ದೇಶಿಸಿದೆ. ಈ ಯೋಜನೆ ಇಂದಿನಿಂದಲೇ (ಆಗಸ್ಟ್ 9) ಪ್ರಾರಂಭವಾಗಿದೆ.
ಸೆಪ್ಟೆಂಬರ್ 5, 2022ರಂದು 'ಪುದುಮೈ ಪೆಣ್' ಯೋಜನೆಯನ್ನು ಪ್ರಾರಂಭಿಸಿದಾಗಿನಿಂದ, 2022-2023 ರಲ್ಲಿ 2.09 ಲಕ್ಷಕ್ಕೂ ಹೆಚ್ಚು ವಿದ್ಯಾರ್ಥಿನಿಯರು ಈ ಪ್ರಯೋಜನೆಯ ಫಲಾನುಭವಿಗಳಾದರೆ, 2024 ರಲ್ಲಿ ಹೆಚ್ಚುವರಿ 64,231 ವಿದ್ಯಾರ್ಥಿಗಳು ಈ ಯೋಜನೆಯ ಪ್ರಯೋಜನ ಪಡೆದಿರುವ ಮಾಹಿತಿಯನ್ನು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ. ಇಲ್ಲಿಯವರೆಗೆ, ರಾಜ್ಯ ಸರ್ಕಾರವು 'ಪುದುಮೈ ಪೆಣ್ ಯೋಜನೆ'ಗೆ 371.77 ಕೋಟಿ ರೂ. ಖರ್ಚು ಮಾಡಿದೆ.
