ಶ್ರೀನಗರ (ಜಮ್ಮು ಮತ್ತು ಕಾಶ್ಮೀರ): ಭಾರತ - ಚೀನಾ ಗಡಿಯಲ್ಲಿ ಉಲ್ಬಣಗೊಳ್ಳುತ್ತಿರುವ ಉದ್ವಿಗ್ನತೆಯ ನಡುವೆ, ಲಡಾಖ್‌ನ ಹೊಟಾನ್ ಏರ್‌ಬೇಸ್‌ನಲ್ಲಿ ಹೊಸ ರನ್ವೇ ನಿರ್ಮಾಣದೊಂದಿಗೆ ಚೀನಾ ತನ್ನ ಮೂಲಸೌಕರ್ಯವನ್ನು ಮತ್ತಷ್ಟು ಬಲಪಡಿಸಿದೆ ಎಂದು ಉಪಗ್ರಹ ತಜ್ಞರು ಹೇಳಿದ್ದಾರೆ. 3700-ಮೀಟರ್ ಉದ್ದದ ರನ್ವೇ, ಈಗ ಕಾರ್ಯನಿರ್ವಹಿಸುತ್ತಿದೆ. ಈ ಪ್ರದೇಶದಲ್ಲಿ ಚೀನಾದ ಮಿಲಿಟರಿ ತನ್ನ ಸಾಮರ್ಥ್ಯವನ್ನು ಗಮನಾರ್ಹವಾಗಿ ವರ್ಧನೆ ಮಾಡಿಕೊಂಡಿದೆ.
ಉಪಗ್ರಹ ಚಿತ್ರಣ ತಜ್ಞ ಡೇಮಿಯನ್ ಸೈಮನ್ ಈ ಬೆಳವಣಿಗೆಯನ್ನು ಸಾರ್ವಜನಿಕರ ಗಮನಕ್ಕೆ ತಂದಿದ್ದಾರೆ. ಸುಮಾರು ನಾಲ್ಕು ವರ್ಷಗಳ ಹಿಂದೆ ಪ್ರಾರಂಭವಾದ ಹೊಸ ರನ್ವೇ ಈಗ ಕಾರ್ಯನಿರ್ವಹಿಸುತ್ತಿದೆ. ಲಡಾಖ್ ಬಳಿ ತನ್ನ ಕಾರ್ಯಾಚರಣೆಯ ಸಾಮರ್ಥ್ಯವನ್ನು ಚೀನಾ ಹೆಚ್ಚಿಸಿಕೊಂಡಿದೆ.
ಹೋಟಾನ್ ಏರ್‌ಬೇಸ್, ಆಯಕಟ್ಟಿನ ದೃಷ್ಟಿಯಿಂದ ಭಾರತದ ಗಡಿಗೆ ಸಮೀಪದಲ್ಲಿದೆ. ಈ ಹಿಂದೆ 3,200 ಮೀಟರ್ ಉದ್ದದ ರನ್ವೇ ಹೊಂದಿತ್ತು. ಆದಾಗ್ಯೂ, ಹೊಸ ರನ್ವೇ ಕಾರ್ಯಾರಂಭ ಮಾಡುವುದರೊಂದಿಗೆ, ಹೆಚ್ಚುವರಿ 500 ಮೀಟರ್‌ಗಳಷ್ಟು ವ್ಯಾಪಿಸಿದೆ. ಇದನ್ನು ಮಿಲಿಟರಿ ಬಳಕೆಗಾಗಿ ಪ್ರತ್ಯೇಕವಾಗಿ ಗೊತ್ತುಪಡಿಸಲಾಗಿದೆ ಎಂಬುದಾಗಿ ತಿಳಿದು ಬಂದಿದೆ. ವಿಸ್ತೃತ ಉದ್ದವು ಸಣ್ಣ ಫೈಟರ್ ಜೆಟ್‌ಗಳು ಮತ್ತು ದೊಡ್ಡ ಮಿಲಿಟರಿ ವಿಮಾನಗಳ ನಿಯೋಜನೆಗೆ ಅನುವು ಮಾಡಿಕೊಡುತ್ತದೆ. ಇದು ಗಡಿ ಉದ್ದಕ್ಕೂ ಚೀನಾಕ್ಕೆ ಉತ್ತುಂಗಕ್ಕೇರಿದ ಚುರುಕುತನ ಮತ್ತು ಬಲವರ್ಧನೆ ಸಾಮರ್ಥ್ಯಗಳನ್ನು ಒದಗಿಸುತ್ತದೆ.
ಲೇಹ್‌ಗೆ ಕೇವಲ 382 ಕಿಲೋಮೀಟರ್‌ಗಳಷ್ಟು ದೂರದಲ್ಲಿರುವ ಹೋಟಾನ್ ಏರ್‌ಬೇಸ್‌ನ ಸಾಮೀಪ್ಯವು ಅದರ ಕಾರ್ಯತಂತ್ರದ ಮಹತ್ವ ಒತ್ತಿ ಹೇಳುತ್ತಿದೆ. ಇದು ದ್ವಿ - ಉದ್ದೇಶದ ವಾಯುನೆಲೆಯಾಗಿ ಕಾರ್ಯನಿರ್ವಹಿಸುತ್ತದೆ. ಇದನ್ನು ಚೀನಾವು ಮಿಲಿಟರಿ ಮತ್ತು ನಾಗರಿಕ ಕಾರ್ಯಾಚರಣೆಗಳಿಗೆ ಬಳಸಿಕೊಳ್ಳುತ್ತಿದೆ. ಹೊಸ ರನ್ವೇ ಜೊತೆಗೆ, ಚೀನಾ J-20, ಶೆನ್ಯಾಂಗ್ J-8 ನಂತಹ ಇಂಟರ್‌ಸೆಪ್ಟರ್ ಏರ್‌ಕ್ರಾಫ್ಟ್, ಶಾಂಕ್ಸಿ Y-8 ನಂತಹ ತ್ವರಿತ ಎಚ್ಚರಿಕೆಯ ವಿಮಾನ ಮತ್ತು KJ-500 ವಾಯುಗಾಮಿ ತ್ವರಿತ ಎಚ್ಚರಿಕೆ ವ್ಯವಸ್ಥೆ ಸೇರಿದಂತೆ ಹಲವಾರು ಯುದ್ಧ ವಿಮಾನಗಳನ್ನು ಹೋಟಾನ್‌ನಲ್ಲಿ ನಿಯೋಜಿಸಿದೆ.
ಹೊಸ ರನ್ವೇ ಕಾರ್ಯಾಚರಣೆಯು ಈ ಪ್ರದೇಶದಲ್ಲಿ ಚೀನಾದ ವೈಮಾನಿಕ ಉಪಸ್ಥಿತಿಯನ್ನು ಮತ್ತಷ್ಟು ಬಲಪಡಿಸುತ್ತದೆ. ಇದು ಲೈನ್ ಆಫ್ ಆಕ್ಚುವಲ್ ಕಂಟ್ರೋಲ್ (LAC) ಸುತ್ತಲೂ ತ್ವರಿತ ವೈಮಾನಿಕ ಕುಶಲತೆಯನ್ನು ಸಕ್ರಿಯಗೊಳಿಸುತ್ತದೆ. ಹೋಟಾನ್ ಏರ್‌ಬೇಸ್‌ನ ಕಾರ್ಯತಂತ್ರದ ಸ್ಥಳ ಮತ್ತು ವರ್ಧಿತ ಮೂಲಸೌಕರ್ಯವು ಭಾರತ ಮತ್ತು ಚೀನಾ ನಡುವೆ ನಡೆಯುತ್ತಿರುವ ಗಡಿ ಬಿಕ್ಕಟ್ಟಿನ ನಡುವೆ ಪ್ರಾದೇಶಿಕ ಭದ್ರತಾ ಡೈನಾಮಿಕ್ಸ್‌ ಮೇಲೆ ಗಮನಾರ್ಹ ಪರಿಣಾಮಗಳನ್ನು ಉಂಟುಮಾಡುತ್ತದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಇದನ್ನೂ ಓದಿ : ಬದಲಾಗದ ಚೀನಾ ಬುದ್ಧಿ; ಅರುಣಾಚಲದ 30 ಪ್ರದೇಶಗಳಿಗೆ ಹೊಸ ಹೆಸರುಗಳನ್ನಿಟ್ಟ ಡ್ರ್ಯಾಗನ್! - Border Issue
