ಬಿಜೆಪಿಗೆ ಆಘಾತ ನೀಡಿದ ವೋಟ್​ ಶೇರ್​​: ಜಸ್ಟ್​ ಶೇ 0.7ರಷ್ಟು ಕಡಿಮೆ, ಬರೋಬ್ಬರಿ 63 ಸ್ಥಾನ ಖೋತಾ, ಕಾಂಗ್ರೆಸ್​​​ಗೆ ಡಬಲ್ ಧಮಾಕಾ! - VOTE SHARE EFFECT ON BJP

ಚುನಾವಣೆಯಲ್ಲಿ ಪಕ್ಷಗಳು ಪಡೆಯುವ ಮತ ಪ್ರಮಾಣದಲ್ಲಿ ಕೂದಲೆಳೆಯಷ್ಟು ವ್ಯತ್ಯಾಸವಾದರೂ ಸ್ಥಾನಗಳಲ್ಲಿ ಯಾವ ರೀತಿಯಲ್ಲಿ ಹೊಡೆತ ಬೀಳುತ್ತದೆ. ಸ್ವಲ್ಪವೇ ಹೆಚ್ಚಾದರೂ ಸ್ಥಾನಗಳಲ್ಲಿ ಯಾವ ಮಟ್ಟಿಗೆ ಏರಿಕೆ ಕಾಣುತ್ತದೆ ಎಂಬುದಕ್ಕೆ 2024ರ ಲೋಕಸಭಾ ಚುನಾವಣೆ ಫಲಿತಾಂಶ ಉತ್ತರ ಕೊಟ್ಟಿದೆ. 2019 ಕ್ಕೆ ಹೋಲಿಸಿದರೆ ಬಿಜೆಪಿಯ ಮತಗಳ ಶೇಕಡಾವಾರು ಪ್ರಮಾಣ ಕಡಿಮೆ ಆಗಿದ್ದು ಕೇವಲ ಶೇಕಡಾ 0.7 ರಷ್ಟು ಮಾತ್ರವೇ. ಆದರೆ ಇದಕ್ಕೆ ಪಕ್ಷ ತೆತ್ತ ಬೆಲೆ ಮಾತ್ರ ಅಸದಳ. ಅಷ್ಟೇ ಏಕೆ ಬರೋಬ್ಬರಿ 63 ಸ್ಥಾನಗಳನ್ನು ಕಳೆದುಕೊಳ್ಳುವ ಮೂಲಕ ಏಕಾಂಗಿಯಾಗಿ ಮ್ಯಾಜಿಕ್​ ನಂಬರ್​ ಮುಟ್ಟಲು ವಿಫಲವಾಯ್ತು. ಅದೇ ಸಮಯದಲ್ಲಿ, ಹಿಂದಿನ ಚುನಾವಣೆಗಳಿಗೆ ಹೋಲಿಸಿದರೆ ಕಾಂಗ್ರೆಸ್ ತನ್ನ ಮತಗಳನ್ನು ಹೆಚ್ಚಿಸಿಕೊಂಡಿದ್ದು, ಶೇಕಡಾ 1.7 ರಷ್ಟನ್ನು ಮಾತ್ರವೇ. ಆದರೆ ತನ್ನ ಸ್ಥಾನಗಳನ್ನು 52 ರಿಂದ 99 ಕ್ಕೆ ಹೆಚ್ಚಿಸಿಕೊಂಡಿದೆ.

ನವದೆಹಲಿ: 2024ರ ಸಾರ್ವತ್ರಿಕ ಚುನಾವಣೆಯಲ್ಲಿ ಬಿಜೆಪಿ ಶೇಕಡಾ 36.6 ಮತಗಳನ್ನು ಪಡೆದುಕೊಂಡಿದೆ. 2019 ರಲ್ಲಿ ದಾಖಲಾದ ಶೇಕಡಾ 37.3 ಕ್ಕೆ ಹೋಲಿಸಿದರೆ, ಇದು ಕೇವಲ ಶೇ 0.7ರಷ್ಟು ಮಾತ್ರವೇ ಕಡಿಮೆಯಾಗಿದೆ. ಆದರೆ, ಸೀಟುಗಳ ವಿಷಯದಲ್ಲಿ ಭಾರಿ ಅಂತರವಿದೆ. ಅದೇ ಸಮಯದಲ್ಲಿ, ಭಾರತೀಯ ಜನತಾ ಪಕ್ಷವು 303 ರಿಂದ 240 ಸ್ಥಾನಗಳಿಗೆ ಕುಸಿದಿದೆ. ಒಟ್ಟು 63 ಸ್ಥಾನಗಳನ್ನ ಭಾರತೀಯ ಜನತಾ ಪಕ್ಷ ಕಳೆದುಕೊಂಡಿದೆ. ಮತ್ತೊಂದೆಡೆ, ಕಾಂಗ್ರೆಸ್‌ನ ಪರಿಸ್ಥಿತಿ ಸಂಪೂರ್ಣ ಭಿನ್ನವಾಗಿದೆ. ಕಳೆದ ಚುನಾವಣೆಯಲ್ಲಿ ಶೇ.19.5ರಷ್ಟು ಮತಗಳನ್ನು ಪಡೆದಿದ್ದ ಪಕ್ಷ ಈ ಬಾರಿ ಶೇ.21.2ರಷ್ಟು ಮತಗಳನ್ನಷ್ಟೇ ಪಡೆದುಕೊಂಡಿದೆ. ಅಂದರೆ ಶೇ.1.7ರಷ್ಟು ಮತಗಳು ಹೆಚ್ಚಿವೆ. ಆದರೆ ಸೀಟುಗಳ ಸಂಖ್ಯೆ 52 ರಿಂದ 99 ಕ್ಕೆ ಜಿಗಿತ ಕಂಡಿವೆ.

ಶೇಕಡಾವಾರು ಮತಗಳು ಹೆಚ್ಚಿದ್ದರೂ ಒಂದೇ ಒಂದು ಸ್ಥಾನವೂ ಸಿಗಲಿಲ್ಲ: ಚುನಾವಣೆಯಲ್ಲಿ ಮತಗಳ ಶೇಕಡಾವಾರು ವ್ಯತ್ಯಾಸಗಳು ಚಿಕ್ಕದಾದರೂ ಸ್ಥಾನಗಳ ವಿಷಯದಲ್ಲಿ ದೊಡ್ಡ ವ್ಯತ್ಯಾಸಗಳಿಗೆ ಕಾರಣವಾಗುತ್ತವೆ. ಈ ಬಾರಿ ಬಿಜೆಪಿ ಮತ್ತು ಕಾಂಗ್ರೆಸ್‌ನಲ್ಲೂ ಆಗಿದ್ದೂ ಇದೆ. 2019ಕ್ಕೆ ಹೋಲಿಸಿದರೆ ತಮಿಳುನಾಡಿನಲ್ಲಿ ಬಿಜೆಪಿಯ ಮತಗಳ ಪ್ರಮಾಣ ಶೇ.3.2ರಿಂದ ಶೇ.11.2ಕ್ಕೆ ಏರಿಕೆಯಾಗಿದೆ. ಆದರೆ, ಹೆಚ್ಚಿದ ಮತಗಳಿಂದ ಒಂದೇ ಒಂದು ಸ್ಥಾನವನ್ನು ಗೆಲ್ಲಲು ಸಾಧ್ಯವಾಗಲಿಲ್ಲ. ಪಂಜಾಬ್‌ನಲ್ಲಿ ಶೇಕಡಾವಾರು ಮತಗಳು ಶೇಕಡಾ 9.6 ರಿಂದ ಶೇಕಡಾ 18.6 ಕ್ಕೆ ಏರಿಕೆ ಆಗಿದೆ. ಯಾವುದೇ ಪಕ್ಷದೊಂದಿಗೆ ಮೈತ್ರಿ ಮಾಡಿಕೊಳ್ಳದ ಕಾರಣ ಭಾರತೀಯ ಜನತಾ ಪಕ್ಷ ಎರಡೂ ಸ್ಥಾನಗಳನ್ನು ಕಳೆದುಕೊಳ್ಳಬೇಕಾಯಿತು. ಬಿಹಾರದಲ್ಲಿ ಶೇ.23.6 ರಿಂದ ಶೇ.20.5ಕ್ಕೆ ಕುಸಿದಿರುವುದು ಬಿಜೆಪಿ ಐದು ಸ್ಥಾನಗಳನ್ನು ಕಳೆದುಕೊಂಡಿದೆ. ಬಂಗಾಳದಲ್ಲಿ ಬಿಜೆಪಿ ಶೇ.1.6ರಷ್ಟು ಮತಗಳನ್ನು ಕಳೆದುಕೊಂಡಿದ್ದರಿಂದ ಆರು ಸ್ಥಾನಗಳನ್ನು ಕಳೆದುಕೊಳ್ಳಬೇಕಾಯಿತು. 2019 ರಲ್ಲಿ ಬಂಗಾಳದಲ್ಲಿ ಬಿಜೆಪಿ 18 ಸ್ಥಾನಗಳನ್ನು ಗೆದ್ದಿತ್ತು, ಆದರೆ ಈ ಬಾರಿ ಅದು 12 ಕ್ಕೆ ಸೀಮಿತವಾಗಿದೆ. ಮಹಾರಾಷ್ಟ್ರದಲ್ಲಿ ಮತಗಳಿಕೆ ಶೇ.1.4ರಷ್ಟಿದ್ದರೂ ಸೀಟುಗಳ ಸಂಖ್ಯೆ 23 ರಿಂದ 9ಕ್ಕೆ ಕುಸಿದಿದೆ.

ದಾಖಲೆ ಮಾಡಿದ ಸಮಾಜವಾದಿ ಪಕ್ಷ : ಕಾಂಗ್ರೆಸ್ಸಿನ ಪರಿಸ್ಥಿತಿ ಸಂಪೂರ್ಣ ಭಿನ್ನವಾಗಿದೆ. ಮಹಾರಾಷ್ಟ್ರದಲ್ಲಿ ಅದು 16.3 ಪ್ರತಿಶತದಿಂದ 17.1 ಕ್ಕೆ ಮತಗಳನ್ನು ಹೆಚ್ಚಿಸಿಕೊಂಡಿದೆ. ಅಷ್ಟೇ ಅಲ್ಲ ಒಂದು ಸ್ಥಾನದಲ್ಲಿದ್ದ ಕಾಂಗ್ರೆಸ್​ ಈ ಬಾರಿ ತನ್ನ ಸಂಖ್ಯೆಯನ್ನ 13ಕ್ಕೆ ಹೆಚ್ಚಿಸಿಕೊಂಡಿದೆ. ರಾಜಸ್ಥಾನದಲ್ಲಿ, ಅದು ಶೇ 3.7ರಷ್ಟು ಮತಗನ್ನ ಪಡೆಯುವ ಮೂಲಕ ಶೂನ್ಯದಿಂದ ಎಂಟು ಸ್ಥಾನಗಳನ್ನು ಗಳಿಸಿತು. ಉತ್ತರಪ್ರದೇಶದಲ್ಲಿ ಶೇಕಡಾ 6.3 ರಿಂದ 9.5 ಕ್ಕೆ ಕಾಂಗ್ರೆಸ್​ ತನ್ನ ವೋಟ್​ ಶೇರ್​ ಹೆಚ್ಚು ಮಾಡಿಕೊಂಡಿದೆ. ಈ ಮೂಲಕ 1ರಿಂದ ಆರಕ್ಕೆ ಏರಿತು. ಇನ್ನು ಸಮಾಜವಾದಿ ಪಕ್ಷದ ಮತಗಳ ಪ್ರಮಾಣವು ಶೇ 18 ರಿಂದ ಶೇ 33.5 ಕ್ಕೆ ಏರಿಕೆ ಮಾಡಿಕೊಂಡಿದೆ. ಈ ಮೂಲಕ ಪಕ್ಷವು ತನ್ನ ಇತಿಹಾಸದಲ್ಲೇ ದಾಖಲೆಯ 37 ಸ್ಥಾನಗಳನ್ನು ಗೆದ್ದು ಬೀಗಿದೆ.

ಇದನ್ನು ಓದಿ: ವಿಪಕ್ಷಗಳ ಮೈತ್ರಿಕೂಟದ ಮಹತ್ವದ ಸಭೆ; ಕೈ ಜೋಡಿಸಲು ಇತರ ಪಕ್ಷಗಳಿಗೆ ಖರ್ಗೆ ಕರೆ - INDIA Bloc Meetingಉತ್ತರಾಖಂಡ್​​ ಮಹಾರಾಷ್ಟ್ರದಲ್ಲಿ ಬಿಜೆಪಿಗೆ ಹೊಡೆತ: ಡಿಸಿಎಂ ಸ್ಥಾನ ತೊರೆಯಲು ಮುಂದಾದ ದೇವೇಂದ್ರ ಫಡ್ನವೀಸ್ - Devendra Fadnavis