ಉದಲಗುರಿ (ಅಸ್ಸೋಂ): ಅಸ್ಸೋಂನಲ್ಲಿ ಆಡಳಿತಾರೂಢ ಬಿಜೆಪಿಯ ಮೈತ್ರಿಪಕ್ಷದ ನಾಯಕನೊಬ್ಬ ಕಂತೆ-ಕಂತೆ 500 ರೂಪಾಯಿ ಮುಖ ಬೆಲೆಯ ನೋಟುಗಳೊಂದಿಗೆ ಮಂಚದ ಮೇಲೆ ಮಲಗಿರುವ ಫೋಟೋವೊಂದು ವೈರಲ್ ಆಗಿದೆ. ಇದು ರಾಜಕೀಯ ವಲಯದಲ್ಲಿ ಭಾರಿ ಸಂಚಲನ ಸೃಷ್ಟಿಸಿದೆ. ಜೊತೆಗೆ ಇದೇ ವಿಷಯವಾಗಿ ಬಿಜೆಪಿ ವಿರುದ್ಧ ಕಾಂಗ್ರೆಸ್ ವಾಗ್ದಾಳಿ ನಡೆಸಿದೆ.
ಅಸ್ಸೋಂನ ಯುನೈಟೆಡ್ ಪೀಪಲ್ಸ್ ಪಾರ್ಟಿ ಲಿಬರಲ್ (ಯುಪಿಪಿಎಲ್) ಮುಖಂಡ ಬೆಂಜಮಿನ್ ಬಾಸುಮತರಿ ಎಂಬುವರೇ ನೋಟುಗಳ ಕಂತೆಗಳೊಂದಿಗೆ ಮಲಗಿಕೊಂಡಿದ್ದಾರೆ. ಬೆಂಜಮಿನ್ ಭೈರಗುರಿ ಗ್ರಾಮದ ವಿಲೇಜ್ ಕೌನ್ಸಿಲ್, ಡೆವಲಪ್‌ಮೆಂಟ್ ಕೌನ್ಸಿಲ್ (ವಿಸಿಡಿಸಿ) ಅಧ್ಯಕ್ಷರಾಗಿದ್ದಾರೆ. ಭೈರಗುರಿ ಗ್ರಾಮವು ಬೋಡೋಲ್ಯಾಂಡ್ ಪ್ರಾದೇಶಿಕ ಪ್ರದೇಶದ ವ್ಯಾಪ್ತಿಯ ಉದಲ್‌ಗುರಿ ಜಿಲ್ಲೆಯಲ್ಲಿ ಬರುತ್ತದೆ. ಗಮನಾರ್ಹ ಅಂಶವೆಂದರೆ, ಯುಪಿಪಿಎಲ್ ಪಕ್ಷವು ಬೋಡೋಲ್ಯಾಂಡ್ ಪ್ರಾದೇಶಿಕ ಕೌನ್ಸಿಲ್‌ನ ಆಡಳಿತ ಪಕ್ಷವಾಗಿದೆ. ಅಲ್ಲದೇ, ರಾಜ್ಯದಲ್ಲಿ ಬಿಜೆಪಿಯ ಮಿತ್ರಪಕ್ಷವಾಗಿದೆ.
ಪ್ರಮುಖ ರಾಜಕೀಯ ಪಕ್ಷವೊಂದರ ಮುಖಂಡರಾಗಿ ಬೆಂಜಮಿನ್ ಅರೆ ಬೆತ್ತಲೆಯಲ್ಲಿ 500 ರೂಪಾಯಿ ನೋಟುಗಳ ರಾಶಿಯೊಂದಿಗೆ ಹಾಸಿಗೆಯ ಮೇಲೆ ಮಲಗಿರುವ ದೃಶ್ಯವು ಚರ್ಚೆಗೆ ಗ್ರಾಸವಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಇದರ ಫೋಟೋ ವೈರಲ್ ಆಗಿದ್ದು, ಸಾಕಷ್ಟು ಟೀಕೆಗೂ ಗುರಿಯಾಗಿದೆ. ಭೈರಗುರಿ ವಿಸಿಡಿಸಿ ಅಧ್ಯಕ್ಷರಾದ ಈ ಬೆಂಜಮಿನ್ ತಮ್ಮ ವ್ಯಾಪ್ತಿಯಲ್ಲಿ ಬರುವ ಪ್ರಧಾನ ಮಂತ್ರಿ ಆವಾಸ್ ಯೋಜನೆ (ಪಿಎಂಎವೈ) ಯೋಜನೆ ಮತ್ತು ಮನರೇಗಾ ಯೋಜನೆಯ ಬಡ ಫಲಾನುಭವಿಗಳಿಂದ ಲಂಚ ಸ್ವೀಕರಿಸಿದ ಆರೋಪವನ್ನು ಎದುರಿಸುತ್ತಿದ್ದಾರೆ.
ಬೆಂಜಮಿನ್ ಬಾಸುಮತರಿ ಸೃಷ್ಟಿಸಿದ ವಿವಾದಿಂದ ಯುಪಿಪಿಎಲ್ ಪಕ್ಷ ಅಂತರ ಕಾಯ್ದುಕೊಳ್ಳುವ ಪ್ರಯತ್ನ ಮಾಡಿದೆ. ಯುಪಿಪಿಎಲ್ ಜೊತೆ ಬೆಂಜಮಿನ್ ಯಾವುದೇ ಸಂಬಂಧ ಹೊಂದಿಲ್ಲ ಎಂದು ಪಕ್ಷದ ಅಧ್ಯಕ್ಷ ಪ್ರಮೋದ್ ಬೋಡೊ ಹೇಳಿದ್ದಾರೆ. ''ಬೆಂಜಮಿನ್ ಬಾಸುಮತರಿ ಅವರ ಫೋಟೋ ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕವಾಗಿ ಹರಡುತ್ತಿದೆ. 2024ರ ಜನವರಿ 10ರಂದು ಅವರನ್ನು ಪಕ್ಷದಿಂದ ಅಮಾನತುಗೊಳಿಸಲಾಗಿದೆ. ಹರಿಸಿಂಗ ಬ್ಲಾಕ್ ಸಮಿತಿಯ ದೂರಿನ ಆಧಾರದ ಮೇಲೆ ಶಿಸ್ತು ಕ್ರಮವನ್ನು ತೆಗೆದುಕೊಳ್ಳಲಾಗಿದೆ. ಅಲ್ಲದೇ, ಬಿಟಿಸಿ ಸರ್ಕಾರವು ಫೆಬ್ರವರಿ 10ರಂದು ವಿಸಿಡಿಸಿ ಅಧ್ಯಕ್ಷ ಸ್ಥಾನದಿಂದ ಅವರನ್ನು ಅಮಾನತುಗೊಳಿಸಿ ತೆಗೆದುಹಾಕಿದೆ ಎಂದು ಅವರು ಸಾಮಾಜಿಕ ಜಾಲತಾಣ 'ಎಕ್ಸ್'ನಲ್ಲಿ ಪೋಸ್ಟ್ ಮಾಡಿದ್ದಾರೆ.
ಮತ್ತೊಂದೆಡೆ, ಇದೇ ವಿಷಯವಾಗಿ ಬಿಜೆಪಿ ವಿರುದ್ಧ ಕಾಂಗ್ರೆಸ್ ವಾಗ್ದಾಳಿ ನಡೆಸಿದೆ. ನೋಟುಗಳ ನಡುವೆ ಮಲಗಿರುವ ವ್ಯಕ್ತಿಯ ಹೆಸರು ಬೆಂಜಮಿನ್ ಬಸುಮತರಿ. ಈತ ಯುಪಿಪಿಎಲ್ ಪಕ್ಷದ ಸಕ್ರಿಯ ನಾಯಕ. ಯುಪಿಪಿಎಲ್ ಅಸ್ಸೋಂನಲ್ಲಿ ಬಿಜೆಪಿಯ ಪ್ರಮುಖ ಮಿತ್ರ ಪಕ್ಷವಾಗಿದೆ. ಚುನಾವಣೆಯ ನಡುವೆ ಬಂದ ಈ ಚಿತ್ರವು ಬಿಜೆಪಿ ಮತ್ತು ಅದರ ಮಿತ್ರಪಕ್ಷಗಳು ಭ್ರಷ್ಟಾಚಾರದ ಕೂಪದಲ್ಲಿ ಮುಳುಗಿರುವುದನ್ನು ತೋರಿಸುತ್ತದೆ. ಬಿಜೆಪಿ ತನ್ನಂತೆ ದೇಶವನ್ನು ಲೂಟಿ ಮಾಡುವ ಜನರೊಂದಿಗೆ ಆಯ್ಕೆಯಾಗಿ ಮೈತ್ರಿ ಮಾಡಿಕೊಂಡಿದೆ ಎಂದು ಕಾಂಗ್ರೆಸ್ ತನ್ನ 'ಎಕ್ಸ್' ಖಾತೆಯಲ್ಲಿ ಪೋಸ್ಟ್ ಮಾಡಿ ದೂರಿದೆ.
ಇದನ್ನೂ ಓದಿ: ಬಿಜೆಪಿ ಅಭ್ಯರ್ಥಿಯಾಗಿರುವ ಸಂದೇಶ್‌ಖಾಲಿ ಸಂತ್ರಸ್ತೆ ರೇಖಾ ಪಾತ್ರ 'ಶಕ್ತಿ ಸ್ವರೂಪ' ಎಂದ ಮೋದಿ
