ಹೈದರಾಬಾದ್ (ತೆಲಂಗಾಣ) : ಒಂದು ಸಣ್ಣ ಸುಳಿವು ಸಿಕ್ಕರೆ ಸಾಕು ಅದೆಷ್ಟೇ ಜಟಿಲ ಪ್ರಕರಣವಾಗಿದ್ದರೂ ಪೊಲೀಸರು ಭೇದಿಸುತ್ತಾರೆ. ಇದಕ್ಕೆ ಸಾಕ್ಷಿ ಎಂಬಂತೆ ತೆಲಂಗಾಣದ ಪೊಲೀಸರು, ಆರೋಪಿ ಕಾಂಡೋಮ್ ಖರೀದಿಸಿದ ಸುಳಿವಿನ ಆಧಾರದ ಮೇಲೆ ಮಹಿಳೆಯ ನಿಗೂಢ ಕೊಲೆ ಪ್ರಕರಣವನ್ನು ಭೇದಿಸಿದ್ದಾರೆ.
ತೆಲಂಗಾಣದ ಮೆಡ್ಚಲ್ನಲ್ಲಿ ಜ.24 ರಂದು 45 ವರ್ಷದ ಮಹಿಳೆಯ ಕೊಲೆಗೈದ ಆರೋಪಿಯು ಕಾಂಡೋಮ್ ಖರೀದಿಸಿ ಸಿಕ್ಕಿಬಿದ್ದಿದ್ದಾನೆ. ಶೇಖ್ ಇಮಾಮ್ (47) ಬಂಧಿತ ಆರೋಪಿ.
ಘಟನೆಯ ವಿವರ : ನಿಜಾಮಾಬಾದ್ ಜಿಲ್ಲೆಯ ಬೋಧನ್ ಸಮೀಪದ ಸೆಟ್ಟಿಪೇಟ್ ಗ್ರಾಮದ 45 ವರ್ಷದ ಮಹಿಳೆ ಕೌಟುಂಬಿಕ ಕಲಹದಿಂದ ಪತಿಯನ್ನು ತೊರೆದಿದ್ದರು. ಅಂತೆಯೇ ಈ ಮಹಿಳೆಯು ಕುಶಾಯಿಗುಡಾ ಪ್ರದೇಶದಲ್ಲಿ ಕೂಲಿ ಕೆಲಸ ಮಾಡುತ್ತಿದ್ದರು. ಹಾಗಾಗಿ ಕೂಲಿ ಕೆಲಸಕ್ಕೆ ಹೋಗುವಾಗ ಜ.24 ರಂದು ಮೆಡ್ಚಲ್ನಲ್ಲಿ ಬಸ್ಗಾಗಿ ಕಾಯುತ್ತಿದ್ದರು. ಈ ವೇಳೆ ಆರೋಪಿ ಶೇಖ್ ಇಮಾಮ್ ಸ್ಥಳಕ್ಕೆ ಬಂದು ಮಹಿಳೆಯ ಜೊತೆ ಮಾತನಾಡಿ, ತನ್ನ ಜೊತೆ ಒಂಟಿಯಾಗಿ ಸಮಯ ಕಳೆದರೆ 500 ರೂ. ಕೊಡುವುದಾಗಿ ಆಮಿಷವೊಡ್ಡಿದ್ದ. ಇದಕ್ಕೆ ಮಹಿಳೆ ಒಪ್ಪಿದ್ದರಿಂದ ಇಬ್ಬರೂ ಮುನಿರಾಬಾದ್ನ ನಿರ್ಜನ ಪ್ರದೇಶಕ್ಕೆ ತೆರಳಿದ್ದರು.
ಕೆಲ ಸಮಯ ಒಟ್ಟಿಗೆ ಕಳೆದ ಬಳಿಕ ಮಹಿಳೆ ಹೆಚ್ಚು ಹಣ ನೀಡುವಂತೆ ಕೇಳಿದ್ದರು. ಇದರಿಂದ ಕೋಪಗೊಂಡ ಆರೋಪಿಯು ಆ ಮಹಿಳೆಯ ತಲೆಗೆ ಕಲ್ಲಿನಿಂದ ಜಜ್ಜಿ ಕೊಲೆ ಮಾಡಿದ್ದ. ಬಳಿಕ ಯಾರಿಗೂ ಗೊತ್ತಾಗದಂತೆ ಮೃತದೇಹದ ಮೇಲೆ ಪೆಟ್ರೋಲ್ ಸುರಿದು ಬೆಂಕಿ ಹಚ್ಚಿ ಪರಾರಿಯಾಗಿದ್ದ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಬಳಿಕ ಮಹಿಳೆಯ ಶವ ಸುಟ್ಟ ಸ್ಥಿತಿಯಲ್ಲಿ ಪತ್ತೆಯಾದ ಬಗ್ಗೆ ಪೊಲೀಸರಿಗೆ ಸ್ಥಳೀಯರು ಮಾಹಿತಿ ನೀಡಿದ್ದರು. ಸ್ಥಳಕ್ಕಾಗಮಿಸಿದ್ದ ಪೊಲೀಸರು, ಪರಿಶೀಲನೆ ನಡೆಸಿ ಅನುಮಾನಾಸ್ಪದ ಸಾವು ಪ್ರಕರಣ ದಾಖಲಿಸಿಕೊಂಡಿದ್ದರು.
ಕಾಂಡೋಮ್ನಿಂದ ಸಿಕ್ಕಿಬಿದ್ದ ಆರೋಪಿ : ಪೊಲೀಸರು ತನಿಖೆಯ ಭಾಗವಾಗಿ ಮಹಿಳೆಯ ವಿವರಗಳನ್ನು ಸಂಗ್ರಹಿಸಿದ್ದರು. ಆಕೆಯ ಫೋನ್ ನಂಬರ್ ಟ್ರ್ಯಾಕ್ ಮಾಡಿದಾಗ, ಪ್ರಕರಣಕ್ಕೂ ಮುನ್ನ ಮುನಿರಾಬಾದ್ನನಲ್ಲಿ ಸಂಚರಿಸುವುದು ಗೊತ್ತಾಗಿತ್ತು. ಬಳಿಕ ಅಲ್ಲಿನ ಸಿಸಿಟಿವಿ ಪರಿಶೀಲಿಸಿದಾಗ ಮಹಿಳೆ ಮತ್ತು ಆರೋಪಿ ವ್ಯಕ್ತಿ ಮೆಡಿಕಲ್ ಶಾಪ್ ಬಳಿ ಪತ್ತೆಯಾಗಿದ್ದರು. ಜೊತೆಗೆ ಅಲ್ಲಿನ ಮೆಡಿಕಲ್ ಶಾಪ್ನಲ್ಲಿ ಆರೋಪಿ ಕಾಂಡೋಮ್ ಖರೀದಿಸಿ, ಯುಪಿಐ ಮೂಲಕ ಹಣ ಪಾವತಿಸಿದ್ದ. ಇದನ್ನು ಅರಿತ ಪೊಲೀಸರು, ಮೆಡಿಕಲ್ ಶಾಪ್ಗೆ ತೆರಳಿ, ಡಿಜಿಟಲ್ ಹಣ ಪಾವತಿಸಿದ ಆರೋಪಿ ಫೋನ್ ನಂಬರ್ ಪಡೆದಿದ್ದರು. ಬಳಿಕ ಈ ಫೋನ್ ನಂಬರ್ ಬೆನ್ನತ್ತಿ ಆರೋಪಿ ಶೇಖ್ ಇಮಾಮ್ನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದ್ದರು. ಆಗ ಆತ ನಡೆದ ಘಟನೆಯನ್ನು ಬಿಚ್ಚಿಟ್ಟಿದ್ದಾನೆ. ನಂತರ ಆತನನ್ನು ಭಾನುವಾರ ಪೊಲೀಸರು ಬಂಧಿಸಿದ್ದರು.
ಡಿಸಿಪಿ ಕೋಠಿ ರೆಡ್ಡಿ, ಎಡಿಜಿಪಿ ಪುರುಷೋತ್ತಮ್, ಎಸಿಪಿ ಶ್ರೀನಿವಾಸ್ ರೆಡ್ಡಿ ಮತ್ತು ಮೆಡ್ಚಲ್ ಪೊಲೀಸ್ ಠಾಣೆಯ ಇನ್ಸ್ಪೆಕ್ಟರ್ ಸತ್ಯನಾರಾಯಣ್ ಅವರು ಸೋಮವಾರ ಮಾಧ್ಯಮಗೋಷ್ಟಿ ನಡೆಸಿ ಪ್ರಕರಣ ಕುರಿತು ಮಾಹಿತಿ ನೀಡಿದರು.
ಇದನ್ನೂ ಓದಿ: ಪತ್ನಿ ದೇಹ ತುಂಡು ಮಾಡಿ ಕುಕ್ಕರ್ನಲ್ಲಿ ಬೇಯಿಸಿದ ಕೇಸ್: ತನಿಖೆಯಲ್ಲಿ ಸ್ಫೋಟಕ ಸಂಗತಿ ಬಯಲು! ಅದೇನು ಗೊತ್ತಾ?
ಇದನ್ನೂ ಓದಿ: ಹಳೇ ದ್ವೇಷಕ್ಕೆ ಯುವಕನ ಹತ್ಯೆ: ಕೊಲೆ ಆರೋಪಿಗಳ ಕಾಲಿಗೆ ಪೊಲೀಸ್ ಗುಂಡೇಟು
