ತಿರುವನಂತಪುರಂ : ಮೇ 31 ರ ಶುಕ್ರವಾರದಂದು ಒಂದೇ ದಿನ ಕೇರಳ ಸರ್ಕಾರದ 16,000ಕ್ಕೂ ಹೆಚ್ಚು ನೌಕರರು ನಿವೃತ್ತರಾಗಲಿದ್ದಾರೆ. ನಿವೃತ್ತರಾಗುತ್ತಿರುವವರಲ್ಲಿ ವೈದ್ಯರು, ಪೊಲೀಸ್ ಅಧಿಕಾರಿಗಳು, ಶಿಕ್ಷಕರು, ಗುಮಾಸ್ತರು, ಚಾಲಕರು, ಜವಾನರು ಮತ್ತು ರಾಜ್ಯ ಸಚಿವಾಲಯ ಸೇರಿದಂತೆ ವಿವಿಧ ರಾಜ್ಯ ಸರ್ಕಾರಿ ಕಚೇರಿಗಳಲ್ಲಿ ಕೆಲಸ ಮಾಡುವ ಇತರ ನೌಕರರು ಸೇರಿದ್ದಾರೆ.
ಕೇರಳದಲ್ಲಿ ಎಲ್ಲಾ ರಾಜ್ಯ ಸರ್ಕಾರಿ ನೌಕರರು 56 ನೇ ವಯಸ್ಸಿನಲ್ಲಿ ನಿವೃತ್ತರಾಗುತ್ತಾರೆ. ಕಾನೂನಿನ ಪ್ರಕಾರ ಮೇ ತಿಂಗಳಲ್ಲಿ ಹುಟ್ಟಿದ ಮತ್ತು 56 ವರ್ಷ ವಯಸ್ಸನ್ನು ತಲುಪಿದ ಎಲ್ಲರೂ ಮೇ 31 ರಂದು ನಿವೃತ್ತರಾಗುತ್ತಾರೆ. ಅದರಂತೆ ಈ ಬಾರಿ, 16,000 ಕ್ಕೂ ಹೆಚ್ಚು ಉದ್ಯೋಗಿಗಳು ಒಂದೇ ಸಮಯದಲ್ಲಿ ನಿವೃತ್ತರಾಗುತ್ತಿದ್ದಾರೆ.
ಇಷ್ಟೊಂದು ಜನ ನೌಕರರು ಒಂದೇ ದಿನ ನಿವೃತ್ತರಾಗುತ್ತಿರುವುದು ಏಕೆ ಎಂಬ ವಿಷಯ ಕುತೂಹಲಕಾರಿಯಾಗಿದೆ. ಹಲವಾರು ದಶಕಗಳ ಹಿಂದೆ ಮಕ್ಕಳು ಹುಟ್ಟಿದ ನಿಖರ ದಿನಾಂಕ ಅನೇಕ ಪೋಷಕರಿಗೆ ಗೊತ್ತೇ ಇರುತ್ತಿರಲಿಲ್ಲ. ಹೀಗಾಗಿ ಪೋಷಕರು ತಮ್ಮ ಮಕ್ಕಳನ್ನು ಶಾಲೆಗೆ ಸೇರಿಸುವ ಸಮಯದಲ್ಲಿ ಶಾಲಾ ಸೇರ್ಪಡೆಗೆ ಸೂಕ್ತವಾದ ದಿನಾಂಕವನ್ನೇ ಮಕ್ಕಳ ಹುಟ್ಟಿದ ದಿನವಾಗಿ ನಮೂದಿಸುತ್ತಿದ್ದರು. ಅದರಂತೆ ಈಗ ಜೂನ್ ಹತ್ತಿರಕ್ಕೆ ಮುಂಚಿನ ಜನ್ಮ ದಿನಾಂಕ ಹೊಂದಿರುವ 16 ಸಾವಿರ ನೌಕರರು ಒಂದೇ ದಿನ ನಿವೃತ್ತಿಯಾಗುತ್ತಿದ್ದಾರೆ. ಕಳೆದ ವರ್ಷ ಮೇ 31 ರಂದು 11,800 ಜನ ನೌಕರರು ನಿವೃತ್ತರಾಗಿದ್ದರು.
ಈಗ ಹಲವಾರು ದಶಕಗಳ ಹಿಂದೆ ಜನ್ಮ ದಿನಾಂಕಗಳನ್ನು ಬದಲಾಯಿಸುವ ಪರಿಪಾಠ ನಡೆದುಕೊಂಡು ಬಂದಿತ್ತು. ಆದರೆ ನಂತರದ ವರ್ಷಗಳಲ್ಲಿ ಆಸ್ಪತ್ರೆಯು ಪ್ರತಿ ಜನನವನ್ನು ನೋಂದಾಯಿಸುವುದರಿಂದ ಮತ್ತು ಜನನ ಪ್ರಮಾಣಪತ್ರವನ್ನು ನೀಡುವ ಸ್ಥಳೀಯ ಸಂಸ್ಥೆಯಲ್ಲಿ ಆ ದಿನಾಂಕವನ್ನು ದಾಖಲಿಸುವುದರಿಂದ ಅದು ನಿಂತು ಹೋಯಿತು.
ಶುಕ್ರವಾರ ನಿವೃತ್ತರಾಗುತ್ತಿರುವ ಅನೇಕ ಉದ್ಯೋಗಿಗಳಿಗೆ ಆಯಾ ಕಚೇರಿಗಳಲ್ಲಿ ಅವರ ಸಹೋದ್ಯೋಗಿಗಳು ಕಣ್ಣೀರು ತುಂಬಿದ ವಿದಾಯ ಹೇಳುತ್ತಿದ್ದಾರೆ. ಆದರೆ ಅದೇ ಸಮಯದಲ್ಲಿ ಬಹುನಿರೀಕ್ಷಿತ ಬಡ್ತಿ ಪಡೆಯುವ ಸೇವೆಯಲ್ಲಿರುವ ನೌಕರರಿಗೆ ಇದು ಸಂತೋಷದ ದಿನವಾಗಿದೆ. ಅಂದರೆ ಸಾವಿರಾರು ಸರ್ಕಾರಿ ನೌಕರರು ಬಡ್ತಿ ಪಡೆಯಲಿದ್ದಾರೆ. ಅಲ್ಲದೆ, ತಮ್ಮ ಕನಸಿನ ಸರ್ಕಾರಿ ಉದ್ಯೋಗಕ್ಕಾಗಿ ಕಾಯುತ್ತಿರುವವರಿಗೆ ಹೊಸ ಸರ್ಕಾರಿ ಹುದ್ದೆಗಳು ಕೂಡ ಸೃಷ್ಟಿಯಾಗಲಿವೆ.
ಆದರೆ 16,000 ನಿವೃತ್ತರಿಗೆ ನಿವೃತ್ತಿ ಪ್ರಯೋಜನಗಳಾಗಿ ನೀಡಲು ಹೆಚ್ಚುವರಿ 9,000 ಕೋಟಿ ರೂ.ಗಳನ್ನು ಹೊಂದಿಸುವುದು ಆರ್ಥಿಕ ಬಿಕ್ಕಟ್ಟಿನಲ್ಲಿರುವ ಸಿಎಂ ಪಿಣರಾಯಿ ವಿಜಯನ್ ಸರ್ಕಾರಕ್ಕೆ ಸವಾಲಿನ ವಿಷಯವಾಗಿದೆ.
ಇದನ್ನೂ ಓದಿ : ತೆಲಂಗಾಣ ಫೋನ್ ಟ್ಯಾಪಿಂಗ್ ಪ್ರಕರಣದಲ್ಲಿ ಸ್ಫೋಟಕ ಮಾಹಿತಿ ಬಹಿರಂಗ: 1200 ಜನರ ಫೋನ್ ಕದ್ದಾಲಿಕೆ! - Telangana phone tapping case
