'ನನ್ನ ನಗರ ನನ್ನ ಬಜೆಟ್' ಅಭಿಯಾನದಲ್ಲಿ ಭಾಗವಹಿಸಿ: ನಾಗರಿಕರಲ್ಲಿ ಮೇಯರ್ ಮನವಿ

ಮಂಗಳೂರು: ಮನಪಾ ಬಜೆಟ್ ಸಿದ್ಧಪಡಿಸುವ ನಿಮಿತ್ತ ನನ್ನ ನಗರ ನನ್ನ ಬಜೆಟ್ ಅಭಿಯಾನದ ಸಾರ್ವಜನಿಕರ ಸಲಹೆಗಳನ್ನು ಆಹ್ವಾನಿಸಲಾಗಿದೆ. ಆನ್​ಲೈನ್ ನಲ್ಲಿ www.janaagraha.org/mangaluru ಲಿಂಕ್ ಮೂಲಕ ಸಲಹೆಗಳನ್ನು ನೀಡಬಹುದು ಎಂದು ಮಂಗಳೂರು ಮನಪಾ ಮೇಯರ್ ದಿವಾಕರ ಪಾಂಡೇಶ್ವರ ಮನವಿ ಮಾಡಿದ್ದಾರೆ. ಸಾರ್ವಜನಿಕರು ಇಂದು ಮಧ್ಯಾಹ್ನ 12ರ ಒಳಗೆ ಆನ್ ಲೈನ್ ಮೂಲಕ ಅಥವಾ ಈ ಕಾರ್ಯದ ನೇತೃತ್ವ ವಹಿಸಿರುವ ಜನಾಗ್ರಹ ಸಂಸ್ಥೆಯ ಮೂಲಕ ಅಭಿಪ್ರಾಯ ತಿಳಿಸಲು ಅವಕಾಶ ಕಲ್ಪಿಸಲಾಗಿದೆ. ನಾಗರಿಕರು ಘನತ್ಯಾಜ್ಯ ವಿಲೇವಾರಿ, ರಸ್ತೆ, ಫುಟ್ ಪಾತ್, ಕುಡಿಯುವ ನೀರು, ಒಳಚರಂಡಿ ವ್ಯವಸ್ಥೆ ಮುಂತಾದ ಆದ್ಯತಾ ಕ್ಷೇತ್ರಗಳ ಬಗ್ಗೆ ತಮ್ಮ ಅಭಿಪ್ರಾಯ ತಿಳಿಸಬಹುದು. ಈ ನಿಟ್ಟಿನಲ್ಲಿ ಜನಾಗ್ರಹವೇ ನಾಗರಿಕರ ಬಳಿಗೆ ಬರುತ್ತಿದ್ದು, ಎಲ್ಲರೂ ಇದರಲ್ಲಿ ಭಾಗವಹಿಸಬೇಕೆಂದು ಮೇಯರ್ ವಿನಂತಿಸಿಕೊಂಡರು.