ಕಾಫಿ ನಾಡಿನಲ್ಲಿ ಅಪರೂಪದ ಕಾಡುಪಾಪ ಪತ್ತೆ

ಚಿಕ್ಕಮಗಳೂರು: ಅಪರೂಪದಲ್ಲಿ ಅಪರೂಪದ ಪ್ರಾಣಿಯಾದ ಕಾಡುಪಾಪ ಚಿಕ್ಕಮಗಳೂರಿನ ನಗರ ಪ್ರದೇಶದಲ್ಲಿ ಕಾಣಿಸಿಕೊಂಡು ಸಾರ್ವಜನಿಕರಲ್ಲಿ ಆಶ್ಚರ್ಯ ಮೂಡಿಸಿದೆ. ಚಿಕ್ಕಮಗಳೂರು ಜಿಲ್ಲೆಯ ಮೂಡಿಗೆರೆ ತಾಲೂಕಿನ ಕೊಟ್ಟಿಗೆಹಾರ ಬಳಿಯಿರುವ ಪೆಟ್ರೋಲ್ ಬಂಕಿಗೆ ಈ ಕಾಡುಪಾಪ ಆಗಮಿಸಿದ್ದು, ಈ ಅಪರೂಪದ ಪ್ರಾಣಿಯನ್ನು ನೋಡಿ ಸ್ಥಳೀಯರು ಒಂದು ಕ್ಷಣ ಪುಳಕಿತರಾಗಿದ್ದಾರೆ. ಪಕ್ಕದಲ್ಲೇ ಚಾರ್ಮಾಡಿ ಘಾಟಿ ಅರಣ್ಯ ಪ್ರದೇಶವಿದ್ದು, ದಾರಿ ಕಾಣದೆ ಈ ಭಾಗಕ್ಕೆ ಈ ಕಾಡುಪಾಪ ಬಂದಿರಬಹುದು ಎನ್ನಲಾಗಿದೆ. ಈ ಕಾಡುಪಾಪವನ್ನು ಸ್ಥಳೀಯ ಸಮಾಜ ಸೇವಕ ಆರಿಫ್ ರಕ್ಷಣೆ ಮಾಡಿದ್ದು, ಒಂದು ಕಡ್ಡಿಯ ಮೇಲೆ ಅದನ್ನು ಕೂರಿಸಿದ್ದಾರೆ. ಇದರ ಜೊತೆ ಸೆಲ್ಫಿ ತೆಗೆದುಕೊಳ್ಳಲು ಸ್ಥಳೀಯರು ಮುಗಿಬೀಳುತ್ತಿದ್ದರು.