ಧಾರವಾಡದ ವಿಶೇಷ ಚೇತನ ಅಭಿಮಾನಿಗೂ ಬಂತು ಅಭಿಷೇಕ್ ಅಂಬಿ​ ಆರತಕ್ಷತೆ ಆಮಂತ್ರಣ

ಧಾರವಾಡ: ದಿವಂಗತ ರೆಬಲ್​ ಸ್ಟಾರ್​ ಅಂಬರೀಶ್​ ಪುತ್ರ ಅಭಿಷೇಕ್​ ವಿವಾಹವು ಪ್ರೀತಿಸಿದ ಹುಡುಗಿ, ಖ್ಯಾತ ಫ್ಯಾಷನ್​ ಡಿಸೈನರ್​ ಅವಿವಾ ಬಿದ್ದಪ್ಪ ಜೊತೆಗೆ ನಿನ್ನೆ ನಡೆದಿದೆ. ನಾಳೆ ನವದಂಪತಿಯ ಆರತಕ್ಷತೆ ಕಾರ್ಯಕ್ರಮವು ಬೆಂಗಳೂರಿನ ಅರಮನೆ ಮೈದಾನದಲ್ಲಿ ನಡೆಯಲಿದೆ. ಸಮಾರಂಭಕ್ಕೆ ಸುಮಲತಾ ಅಂಬರೀಶ್​ ಅವರು ಧಾರವಾಡ ವಿಶೇಷ ಚೇತನ ಅಭಿಮಾನಿಗೆ ಆಮಂತ್ರಣ ಪತ್ರಿಕೆ ಕಳುಹಿಸಿ ದೂರವಾಣಿ ಕರೆ ಮೂಲಕ ಆಮಂತ್ರಿಸಿದ್ದಾರೆ.

ಧಾರವಾಡದ ವಿಶೇಷ ಚೇತನ ಯುವತಿಯ ಹೆಸರು ಸೌಭಾಗ್ಯ ಯಮನೂರ. ಈಕೆ ಸುಮಲತಾ ಅಂಬರೀಶ್​ ಅವರ ಅಪ್ಪಟ ಅಭಿಮಾನಿ. ಅಂಬರೀಶ್​ ಅವರು ನಿಧನರಾದ ಸಮಯದಲ್ಲಿ ಸುಮಲತಾ ಕಣ್ಣೀರಿಟ್ಟಿದ್ದನ್ನು ಕಂಡು ಸೌಭಾಗ್ಯ ಕೂಡ ಕಂಬನಿ ಮಿಡಿದಿದ್ದರು. ಅಲ್ಲದೇ ಪತ್ರಿಕೆಗಳಲ್ಲಿ ಬರುವ ಸುಮಲತಾ ಅವರ ಫೋಟೋಗಳನ್ನು ಕತ್ತರಿಸಿ ಬುಕ್​ನಲ್ಲಿ ಅಂಟಿಸುವ ಹವ್ಯಾಸವೂ ಈಕೆಗಿದೆ. ಇದೇ ಅಭಿಮಾನಕ್ಕೆ ಸುಮಲತಾ ಅಂಬರೀಷ್​ ಕೂಡ ಮನಸೋತಿದ್ದಾರೆ. 

ಹೀಗಾಗಿಯೇ ಸೌಭಾಗ್ಯ ಕುಟುಂಬವನ್ನು ತಮ್ಮ ಮಗ ಅಭಿಷೇಕ್​ ಅಂಬರೀಶ್​ ಆರತಕ್ಷತೆಗೆ ಬರುವಂತೆ ಆಮಂತ್ರಣ ಪತ್ರಿಕೆ ಜೊತೆಗೆ ದೂರವಾಣಿ ಕರೆಯ ಮೂಲಕ ತಿಳಿಸಿದ್ದಾರೆ. ನಾಳೆ ಬೆಂಗಳೂರಿನ ಅರಮನೆಯ ತ್ರಿಪುರವಾಸಿನಿಯಲ್ಲಿ ನಡೆಯಲಿರುವ ಅಭಿಷೇಕ್​ ಅವರ ಆರತಕ್ಷತೆಗೆ ಸೌಭಾಗ್ಯ ತಮ್ಮ ತಂದೆ ತಾಯಿ ಜೊತೆ ಹೊರಟಿದ್ದಾರೆ. ಜೊತೆಗೆ ಸುಮಲತಾರಿಗಾಗಿ ಧಾರವಾಡ ಸೀರೆ ಮತ್ತು ಪೇಡವನ್ನು ಉಡುಗೊರೆಯಾಗಿ ನೀಡಲು ಜೊತೆಗೆ ಕೊಂಡೊಯ್ದಿದ್ದಾರೆ. ಈ ಮೂಲಕ ಸುಮಲತಾರನ್ನು ನೋಡಬೇಕೆಂಬ ಸೌಭಾಗ್ಯ ಕನಸು ಕೂಡ ನನಸಾಗಲಿದೆ. 

ಇದನ್ನೂ ಓದಿ: ಪ್ರೀತಿಸಿದ ಹುಡುಗಿ ಜೊತೆ ಹಸೆಮಣೆ ಏರಿದ ಅಭಿಷೇಕ್​ ಅಂಬರೀಶ್​: ಜೂ.7ರಂದು ಆರತಕ್ಷತೆ