ನೋಡು ನೋಡು ರಾಮಮಂದಿರ, ಪುರುಷೋತ್ತಮನು ನೆಲೆಸುವ ದಿವ್ಯ ದೇಗುಲ: ವಿಡಿಯೋ

ಅಯೋಧ್ಯೆ: ಶತಮಾನಗಳ ಕನಸು ಸಾಕಾರಗೊಂಡು ಇಲ್ಲಿ ತಲೆಎತ್ತಿರುವ ಭವ್ಯ ರಾಮಮಂದಿರ ಜನವರಿ 22 ರಂದು ಲೋಕಾರ್ಪಣೆಯಾಗಲಿವೆ. ಪ್ರಾಣ ಪ್ರತಿಷ್ಠಾಪನೆ ಕಾರ್ಯಕ್ರಮಕ್ಕೆ ವಿಶ್ವವೇ ಕಾದು ಕೂತಿದೆ. ಮಂದಿರದ ಸೊಬಗಿನ ಬಗ್ಗೆ ಭಕ್ತರಲ್ಲಿ ಇನ್ನಿಲ್ಲದ ಕುತೂಹಲ ಮೂಡಿದೆ. ಅದನ್ನು ತಣಿಸಲು ಶ್ರೀರಾಮಜನ್ಮಭೂಮಿ ತೀರ್ಥಕ್ಷೇತ್ರ ಟ್ರಸ್ಟ್​ ಕೆಲ ಚಿತ್ರಗಳನ್ನು ಹಂಚಿಕೊಂಡಿತ್ತು. ಇದೀಗ ಅದ್ಭುತವಾದ ವಿಡಿಯೋವನ್ನು ಬಿಡುಗಡೆ ಮಾಡಿದೆ.

ಮೊದಲು 55 ಸೆಕೆಂಡುಗಳ ವಿಡಿಯೋವನ್ನು ಹಂಚಿಕೊಂಡ ಬಳಿಕ, ಇನ್ನೊಂದು ಕಿರುಚಿತ್ರವನ್ನು ರಿಲೀಸ್​ ಮಾಡಲಾಗಿದೆ. ಇದರಲ್ಲಿ ರಾಮಮಂದಿರದ ಅತ್ಯದ್ಭುತ ಸೌಂದರ್ಯದ ಅನಾವರಣ ಮಾಡಲಾಗಿದೆ. ಮಂದಿರದಲ್ಲಿ ಕೆತ್ತಲಾಗಿರುವ ಕಲಾಕುಸುರಿ, ಜಟಾಯು, ಸಿಂಹ, ಆನೆಗಳ ವಿಗ್ರಹ, ಶ್ರೀರಾಮ ದರ್ಬಾರ್​, ದೊಡ್ಡ ಪ್ರಾಂಗಣಗಳು ಇಲ್ಲಿವೆ.

ಕತ್ತಲೆಯ ವೇಳೆ ತೆಗೆಯಲಾದ ಈ ವಿಡಿಯೋ ದೀಪದ ಬೆಳಕಿನಲ್ಲಿ ಮಂದಿರದ ಸೌಂದರ್ಯವು ಭಕ್ತರ ಮನದಲ್ಲಿ ತಣ್ಣಗೆ ಮನೆಮಾಡುತ್ತದೆ. ಅದ್ಭುತ ಕಟ್ಟಡದ ಪಕ್ಷಿನೋಟವು ಮನಸೂರೆಗೊಳ್ಳುತ್ತದೆ. ಜನವರಿ 22 ರಂದು ಭಗವಾನ್​ ರಾಮಲಲ್ಲಾ ದೇವಾಲಯದ ಗರ್ಭಗುಡಿಯಲ್ಲಿ ನೆಲೆಸಲಿದ್ದಾನೆ. ಅಂದಿನ ದಿವ್ಯ ಸಮಾರಂಭದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಸೇರಿದಂತೆ ಗಣ್ಯಾತಿಗಣ್ಯರು ಭಾಗವಹಿಸಲಿದ್ದಾರೆ. 7 ಸಾವಿರಕ್ಕೂ ಅಧಿಕ ಗಣ್ಯರಿಗೆ ಟ್ರಸ್ಟ್​ ಮುಖತಃ ಭೇಟಿ ನೀಡಿ ಆಹ್ವಾನ ಪತ್ರ ನೀಡಿದೆ.

ಇದನ್ನೂ ಓದಿ: ಅಬ್ಬಾ..ಎಂತಹ ಮನಮೋಹಕ ಕಲಾಕುಸುರಿ: ದೀಪದ ಬೆಳಕಿನಲ್ಲಿ ಹೊಳೆಯುತ್ತಿರುವ ರಾಮಮಂದಿರ