'ಮೇಡ್ ಇನ್ ಚೀನಾ' ಬಹಿಷ್ಕಾರ 'ಮೇಕ್​​​ ಇನ್ ಇಂಡಿಯಾ' ಮೇಲೆ ಪ್ರಭಾವ ಬೀರಬಹುದು: ಸಂಜಯ್​ ಜೋಶಿ

ಚೀನಾದ 59 ಮೊಬೈಲ್ ಅಪ್ಲಿಕೇಶನ್‌ಗಳನ್ನು ನಿಷೇಧಿಸಿರುವುದು ಭಾರತ ಸರ್ಕಾರದ ಪ್ರಮುಖ ಕಾರ್ಯವಾಗಿದೆ. ಆದರೆ ಚೀನಾ ವಿರುದ್ಧ ಪ್ರತೀಕಾರ ತೀರಿಸಿಕೊಳ್ಳಲು ಇದೊಂದೇ ಮಾರ್ಗವಲ್ಲ. ಇದಕ್ಕಾಗಿ ದೀರ್ಘಾವಧಿಯ ಕಾರ್ಯತಂತ್ರದ ದೃಷ್ಟಿಕೋನವನ್ನು ಬೆಳೆಸಿಕೊಳ್ಳಬೇಕಿದೆ ಎಂದು ಅಬ್ಸರ್ವರ್ ರಿಸರ್ಚ್ ಫೌಂಡೇಶನ್ (ಒಆರ್​ಎಫ್) ಅಧ್ಯಕ್ಷ ಸಂಜಯ್​ ಜೋಶಿ ಹೇಳಿದರು. ಹಿರಿಯ ಪತ್ರಕರ್ತೆ ಸ್ಮಿತಾ ಶರ್ಮಾ ಅವರೊಂದಿಗಿನ ವಿಶೇಷ ಸಂದರ್ಶನದಲ್ಲಿ ಮಾತನಾಡಿದ ಅವರು, ಆ್ಯಪ್​ಗಳ ಬ್ಯಾನ್​ ಮೂಲಕ ರಾತ್ರೋರಾತ್ರಿ ಚೀನಾದೊಂದಿಗಿನ ಪೂರೈಕೆ ಸರಪಳಿ ಬಿಡಿಸುವುದು ಅಸಾಧ್ಯ. 'ಮೇಡ್ ಇನ್ ಚೀನಾ' ಉತ್ಪನ್ನಗಳ ಬಹಿಷ್ಕಾರ 'ಮೇಕ್​​​ ಇನ್ ಇಂಡಿಯಾ' ಕಾರ್ಯಕ್ರಮದ ಮೇಲೆ ಪರಿಣಾಮ ಬೀರಬಹುದು. ಕೋವಿಡ್​ ಬಿಕ್ಕಟ್ಟಿನ ಸಂದರ್ಭದಲ್ಲಿ ಭಾರತವು ಚೀನಾದ ಕಡೆಗೆ ವಾಸ್ತವಿಕ ದೃಷ್ಟಿಕೋನವನ್ನು ಅಳವಡಿಸಿಕೊಳ್ಳಬೇಕು, ಇಲ್ಲದಿದ್ದರೆ ಭಾರತದ ಆರ್ಥಿಕತೆಗೆ ಹಾನಿಯುಂಟಾಗಬಹುದು ಎಂದು ಅಭಿಪ್ರಾಯಪಟ್ಟರು.