ಸಾರ್ವಜನಿಕರಲ್ಲಿ ದೀರ್ಘಕಾಲಿಕ ಸಾಂಕ್ರಾಮಿಕ ರೋಗವಾದ ಕುಷ್ಠರೋಗದ ಬಗ್ಗೆ ಜಾಗೃತಿ ಮೂಡಿಸಲು ಪ್ರತಿ ವರ್ಷ ಜನವರಿ ತಿಂಗಳ ಕೊನೆಯ ಭಾನುವಾರದಂದು 'ವಿಶ್ವ ಕುಷ್ಠರೋಗ ದಿನ'ವನ್ನಾಗಿ ಆಚರಿಸಲಾಗುತ್ತದೆ.
ಆದರೆ, ಭಾರತದಲ್ಲಿ ಯಾವಾಗಲೂ ಜನವರಿ 30ರಂದೇ ಕುಷ್ಠರೋಗ ದಿನವನ್ನು ಆಚರಿಸಲಾಗುತ್ತದೆ. ಏಕೆಂದರೆ, ಇದು ರಾಷ್ಟ್ರಪಿತ ಮಹಾತ್ಮ ಗಾಂಧಿಯವರ ಪುಣ್ಯತಿಥಿಯನ್ನು ಆಚರಿಸುವ ದಿನವಾಗಿದೆ.
ವಿಶ್ವ ಆರೋಗ್ಯ ಸಂಸ್ಥೆ (WHO) ಪ್ರಕಾರ 2020 ರಲ್ಲಿ 139 ದೇಶಗಳಲ್ಲಿ ಒಟ್ಟು 1,27,558 ಹೊಸ ಕುಷ್ಠರೋಗ ಪ್ರಕರಣಗಳು ಪತ್ತೆಯಾಗಿವೆ. ಇದರಲ್ಲಿ 15 ವರ್ಷದೊಳಗಿನ 8,629 ಮಕ್ಕಳು ಸೇರಿದ್ದಾರೆ. ಮಕ್ಕಳ ಜನಸಂಖ್ಯೆಯಲ್ಲಿ ಹೊಸ ಪ್ರಕರಣ ಪತ್ತೆ ಪ್ರಮಾಣವು ಪ್ರತಿ ಮಿಲಿಯನ್ ಮಕ್ಕಳ ಜನಸಂಖ್ಯೆಗೆ 4.4 ಎಂದು ದಾಖಲಾಗಿದೆ.
ಏನಿದು ಕುಷ್ಠರೋಗ? ಹ್ಯಾನ್ಸೆನ್ಸ್ ಕಾಯಿಲೆ ಎಂದೂ ಕರೆಯಲ್ಪಡುವ ಕುಷ್ಠರೋಗವು ಮೈಕೋಬ್ಯಾಕ್ಟೀರಿಯಂ ಲೆಪ್ರೇ ಎಂಬ ಬ್ಯಾಕ್ಟೀರಿಯಾದಿಂದ ಉಂಟಾಗುತ್ತದೆ, ಇದು ನಿಧಾನಗತಿಯಲ್ಲಿ ಹೆಚ್ಚಾಗುತ್ತದೆ ಮತ್ತು ರೋಗ ಬೆಳವಣಿಗೆ ಹೊಂದುವ ಅವಧಿ 5 ವರ್ಷಗಳು ಎಂದು ಡಬ್ಲ್ಯೂಹೆಚ್ಒ ಹೇಳುತ್ತದೆ. ರೋಗವು ಮುಖ್ಯವಾಗಿ ಚರ್ಮ, ಬಾಹ್ಯ ನರಗಳು, ಮೇಲ್ಭಾಗದ ಶ್ವಾಸೇಂದ್ರಿಯ ಪ್ರದೇಶದ ಮ್ಯೂಕೋಸಲ್ ಮೇಲ್ಮೈಗಳು ಮತ್ತು ಕಣ್ಣುಗಳ ಮೇಲೆ ಪರಿಣಾಮ ಬೀರುತ್ತದೆ.
ಕುಷ್ಠರೋಗವು ಆರಂಭಿಕ ಶೈಶವಾವಸ್ಥೆಯಿಂದ ವೃದ್ಧಾಪ್ಯದವರೆಗೆ ಹೀಗೆ ಎಲ್ಲಾ ವಯಸ್ಸಿನಲ್ಲೂ ಕಂಡು ಬರುತ್ತದೆ. ಕುಷ್ಠರೋಗವನ್ನು ಗುಣಪಡಿಸಬಹುದಾಗಿದೆ ಮತ್ತು ಆರಂಭಿಕ ಹಂತಗಳಲ್ಲಿ ಚಿಕಿತ್ಸೆ ನೀಡುವುದರಿಂದ ಅದರಿಂದುಂಟಾಗುವ ಅಂಗವೈಕಲ್ಯವನ್ನು ತಡೆಯಬಹುದು. ಕುಷ್ಠರೋಗವು ಈಗಾಗಲೇ ರೋಗಕ್ಕೆ ತುತ್ತಾದ ವ್ಯಕ್ತಿಗಳೊಂದಿಗೆ ಹತ್ತಿರದ ಸಂಪರ್ಕ ಹೊಂದಿದ್ದೆರೆ, ಅಂದರೆ ಅವರ ಮೂಗು ಮತ್ತು ಬಾಯಿಂದ ಹೊರ ಬೀಳುವ ಹನಿಗಳ ಮೂಲಕ ಇತರರಿಗೆ ಹರಡುತ್ತದೆ.
ಇದನ್ನು 2 ವರ್ಗಗಳಾಗಿ ವಿಂಗಡಿಸಲಾಗಿದೆ :
1. ಪೌಸಿಬಾಸಿಲ್ಲರಿ (ಪಿಬಿ) - ಇದು ಐದು ವರ್ಷದವರೆಗಿನ ಮಕ್ಕಳಲ್ಲಿ ಕಂಡುಬರುವ ಕೆಲವು ಚರ್ಮದ ಗಾಯವಾಗಿದೆ (ತಿಳಿಗೆಂಪು ಅಥವಾ ಕೆಂಪು ಬಣ್ಣ)
2. ಮಲ್ಟಿಬಾಸಿಲರಿ (ಎಂಬಿ)- ಇದು ಐದಕ್ಕಿಂತ ಹೆಚ್ಚು ವರ್ಷದವರಲ್ಲಿ ಕಂಡುಬರುವ ಚರ್ಮದ ಗಾಯಗಳು, ಗಂಟುಗಳು, ಪ್ಲೇಕ್‌ಗಳು, ದಪ್ಪನಾದ ಒಳಚರ್ಮ ಅಥವಾ ಚರ್ಮದ ಒಳನುಸುಳುವಿಕೆಯಾಗಿದೆ
ಇದನ್ನೂ ಓದಿ: ಹದಿಹರೆಯದವರಿಗೆ ತಮ್ಮ ದೇಹದ ಬಗೆಗಿನ ನಕರಾತ್ಮಕ ಅಂಶಗಳನ್ನು ಫೋಷಕರು ದೂರ ಮಾಡುವುದೇಗೆ?
ರೋಗಲಕ್ಷಣಗಳು ಯಾವುವು?: ರೋಗವು ಚರ್ಮ, ನರಗಳು ಮತ್ತು ಲೋಳೆಯ ಪೊರೆಗಳ ಮೇಲೆ ಪರಿಣಾಮ ಬೀರುವುದರಿಂದ, ರೋಗ ನಿಯಂತ್ರಣ ಮತ್ತು ತಡೆಗಟ್ಟುವಿಕೆ ಕೇಂದ್ರ (CDC) ಕುಷ್ಠರೋಗದ ಸಂಭವನೀಯ ಚಿಹ್ನೆಗಳು ಮತ್ತು ರೋಗಲಕ್ಷಣಗಳನ್ನು ಈ ಕೆಳಗಿನಂತೆ ಪಟ್ಟಿಮಾಡಿದೆ.
ಚರ್ಮದ ಹಾನಿಯಿಂದ ಕಂಡು ಬರುವ ಲಕ್ಷಣಗಳು
- ಚರ್ಮದ ಮೇಲೆ ಬಣ್ಣ ಬಣ್ಣದ ತೇಪೆಗಳು, ಸಾಮಾನ್ಯವಾಗಿ ಚಪ್ಪಟೆಯಾಗಿರುತ್ತವೆ, ಅದು ಕಳೆಗುಂದುವಂತೆ ಕಾಣುತ್ತದೆ
- ಚರ್ಮದ ಮೇಲೆ ಗಂಟುಗಳು
- ದಪ್ಪ, ಗಟ್ಟಿಯಾದ ಅಥವಾ ಒಣ ಚರ್ಮ
- ಪಾದದ ಅಡಿಭಾಗದಲ್ಲಿ ನೋವುರಹಿತ ಹುಣ್ಣುಗಳು
- ಮುಖ ಅಥವಾ ಕಿವಿಯಲ್ಲಿ ನೋವುರಹಿತ ಊತಗಳು
- ಹುಬ್ಬುಗಳು ಅಥವಾ ಕಣ್ರೆಪ್ಪೆಗಳು ಉದುರುವುದು
ನರಗಳ ಹಾನಿಯಿಂದ ಗೋಚರಿಸುವ ಲಕ್ಷಣಗಳು:
- ಹಾನಿಗೊಳಗಾದ ಚರ್ಮದ ಪ್ರದೇಶಗಳಲ್ಲಿ ಮರಗಟ್ಟುವಿಕೆ
- ಸ್ನಾಯು ದೌರ್ಬಲ್ಯ ಅಥವಾ ಪಾರ್ಶ್ವವಾಯು (ವಿಶೇಷವಾಗಿ ಕೈ ಮತ್ತು ಕಾಲುಗಳಲ್ಲಿ)
- ವಿಸ್ತರಿಸಿದ ನರಗಳು (ವಿಶೇಷವಾಗಿ ಮೊಣಕೈ ಮತ್ತು ಮೊಣಕಾಲಿನ ಸುತ್ತಮತ್ತು ಕತ್ತಿನ ಬದಿಗಳಲ್ಲಿ)
- ಕುರುಡುತನಕ್ಕೆ ಕಾರಣವಾಗುವ ಕಣ್ಣಿನ ಸಮಸ್ಯೆಗಳು
ಲೋಳೆಯ ಪೊರೆಗಳಿಂದುಂಟಾದ ಲಕ್ಷಣಗಳು :
- ಉಸಿರುಗಟ್ಟಿದ ಮೂಗು
- ಮೂಗಿನ ರಕ್ತಸ್ರಾವಗಳು
ಕುಷ್ಠರೋಗಕ್ಕೆ ಚಿಕಿತ್ಸೆ ಏನು?
ರೋಗವನ್ನು ವಿವಿಧ ಔಷಧಿಗಳ ಸಂಯೋಜನೆಯೊಂದಿಗೆ ಚಿಕಿತ್ಸೆ ನೀಡಬಹುದು, ಇದನ್ನು ಸಾಮಾನ್ಯವಾಗಿ ಮಲ್ಟಿಡ್ರಗ್ ಥೆರಪಿ (MDT) ಎಂದು ಕರೆಯಲಾಗುತ್ತದೆ. ವೈದ್ಯಕೀಯ ತಜ್ಞರು ಸೂಚಿಸಿದಂತೆ ಮಲ್ಟಿಡ್ರಗ್ ಥೆರಪಿಯ ಸಂಪೂರ್ಣ ಕೋರ್ಸ್ ಅನ್ನು ಪೂರ್ಣಗೊಳಿಸುವುದು ಮುಖ್ಯವಾಗಿದೆ. ಚಿಕಿತ್ಸೆಯು ಒಂದು ವರ್ಷ ಅಥವಾ ಎರಡು ವರ್ಷಗಳವರೆಗೆ ಇರುತ್ತದೆ.
ಆದ್ದರಿಂದ, ಕುಷ್ಠರೋಗವು ಗುಣಪಡಿಸಬಹುದಾದ ರೋಗವಾಗಿದೆ. ಇದರ ಆರಂಭಿಕ ರೋಗನಿರ್ಣಯವು ಮುಖ್ಯವಾಗಿದೆ, ಇಲ್ಲದಿದ್ದರೆ ಇದು ಕೆಲವು ಅಂಗವೈಕಲ್ಯಗಳು, ಪಾರ್ಶ್ವವಾಯು, ಕುರುಡುತನ, ಮುಂತಾದ ಬದಲಾಯಿಸಲಾಗದ ತೊಡಕುಗಳಿಗೆ ಕಾರಣವಾಗಬಹುದು.
ಇಲ್ಲೊಮ್ಮೆ ನೋಡಿ - ನಿಮ್ಮ ಸೂಕ್ತ ಸಂಗಾತಿ ಹುಡುಕುತ್ತಿರುವಿರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ ನೋಂದಣಿ ಉಚಿತ
