ಜೀನಿವಾ: ಸೂರ್ಯನಿಗೆ ನೇರವಾಗಿ ಮೈಯೊಡ್ಡಿ ಕೆಲಸ ಮಾಡುವ ಪ್ರತಿ ಮೂರರಲ್ಲಿ ಒಬ್ಬರು ಮೆಲೊನೊಮಾ ಚರ್ಮದ ಕ್ಯಾನ್ಸರ್ಗೆ ಬಲಿಯಾಗುತ್ತಿದ್ದಾರೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಮತ್ತು ಅಂತರರಾಷ್ಟ್ರೀಯ ಕಾರ್ಮಿಕ ಸಂಘಟನೆ (ಐಎಲ್ಒ) ಜಂಟಿಯಾಗಿ ಅಂದಾಜಿಸಿದೆ.
ಜರ್ನಲ್ ಎನ್ವರಿನಾಮೆಂಟ್ ಇಂಟರ್ನ್ಯಾಷನಲ್ನಲ್ಲಿ ಪ್ರಕಟವಾದ ಅಧ್ಯಯನದಲ್ಲಿ ಹೊರಾಂಗಣದಲ್ಲಿ ಕೆಲಸ ಮಾಡುವವಲ್ಲಿ ಮೆಲೊನೊಮ ಹೊರತಾದ ಚರ್ಮದ ಕ್ಯಾನ್ಸರ್ ಹೆಚ್ಚಳದ ಅಪಾಯ ಹೆಚ್ಚಿದೆ. ಈ ಹಿನ್ನೆಲೆಯಲ್ಲಿ ಇಂತಹ ಕೆಲಸದ ಸ್ಥಳದಲ್ಲಿ ಕಾರ್ಯನಿರ್ವಹಿಸುವ ಕಾರ್ಮಿಕರ ರಕ್ಷಣೆಗೆ ತುರ್ತು ಕ್ರಮ ನಡೆಸಬೇಕಿದೆ ಎಂದು ತಿಳಿಸಿದೆ.
ಸುಮಾರು 1.6 ಬಿಲಿಯನ್ ಮಂದಿ (15 ವರ್ಷ ಮತ್ತು ಅದಕ್ಕಿಂತ ಮೇಲ್ಪಟ್ಟವರು) ಸೂರ್ಯನ ನೇರಳಾತೀತ ಕಿರಣಗಳಿಗೆ ಒಳಗಾಗಿ ಕೆಲಸ ಮಾಡುತ್ತಿದ್ದಾರೆ. 2019ರಲ್ಲಿ ಈ ಕಿರಣಕ್ಕೆ ಒಳಗಾಗುವಿಕೆ ಸಂಖ್ಯೆ ಹೆಚ್ಚಿದೆ. ಇದೇ ವರ್ಷ 183 ದೇಶದದಲ್ಲಿ ಈ ಮೆಲನೊಮ ಹೊರತಾದ ಚರ್ಮದ ಕ್ಯಾನ್ಸರ್ನಿಂದಾಗಿ 18,960 ಮಂದಿ ಸಾವನ್ನಪ್ಪಿದ್ದಾರೆ. 2000ದಲ್ಲಿ ಈ ಸಾವಿನ ಸಂಖ್ಯೆ 10,088 ಇತ್ತು. ಅಂದರೆ ಶೇ 88ರಷ್ಟು ಅಧಿಕವಾಗಿದೆ ಎಂದು ವರದಿ ತಿಳಿಸಿದೆ.
ಜಾಗತಿಕವಾಗಿ ಕ್ಯಾನ್ಸರ್ ಸಾವಿನಲ್ಲಿ ಸೂರ್ಯನ ನೇರಳಾತೀತ ಕಿರಣದ ಕ್ಯಾನ್ಸರ್ ಪ್ರಕರಣಗಳ ಕೊಡುಗೆ ಮೂರನೇ ಸ್ಥಾನದಲ್ಲಿದೆ. ಕೆಲಸದ ಸ್ಥಳಗಳಲ್ಲಿ ಸೂರ್ಯನ ನೇರಳಾತೀತ ಕಿರಣಗಳಿಂದ ರಕ್ಷಣೆಗೆ ಯಾವುದೇ ಸುರಕ್ಷತೆ ಇಲ್ಲದೇ ಇರುವುದು ಚರ್ಮದ ಕ್ಯಾನ್ಸರ್ ಅಭಿವೃದ್ಧಿಗೆ ಕಾರಣವಾಗುತ್ತಿದೆ ಎಂದು ಡಬ್ಲ್ಯೂಎಚ್ಒ ಪ್ರಧಾನ ನಿರ್ದೇಶಕ ಟೆಡ್ರೋಸ್ ಅಡೊನೊಮ್ ಗೇಬ್ರಿಯಸ್ ಹೇಳಿದ್ದಾರೆ.
ಸೂರ್ಯನ ಕಿರಣಗಳು ಪ್ರಖರವಾಗಿರುವ ಹೊತ್ತಿನಲ್ಲಿ ಹೊರಾಂಗಣ ಕೆಲಸದ ಸಮಯದಲ್ಲಿ ಹೆಚ್ಚಿನ ಹಾನಿಯಾಗದಂತೆ ರಕ್ಷಣೆ ಮಾಡಲು ಕ್ರಮ ನಡೆಸಬೇಕಿದೆ ಎಂದು ಡಬ್ಲ್ಯೂಎಚ್ಒ ಕರೆ ನೀಡಿದೆ. ದೀರ್ಘಕಾಲ ನೇರಳಾತೀತದಂತಹ ಸೂರ್ಯನ ಕಿರಣಗಳಿಗೆ ಮೈಯೊಡ್ಡಿ ಕೆಲಸ ಮಾಡುವುದರಿಂದ ವರ್ಷಗಳ ನಂತರದಲ್ಲಿ ಅಥವಾ ದಶಕಗಳ ಬಳಿಕ ಚರ್ಮದ ಕ್ಯಾನ್ಸರ್ ಉಲ್ಬಣಿಸಬಹುದು. ಈ ಹಿನ್ನೆಲೆಯಲ್ಲಿ ಕೆಲಸಗಾರರು ತಮ್ಮ ಆರಂಭದ ದಿನಗಳಿಂದ ಸೂರ್ಯನ ನೇರಳಾತೀತ ಕಿರಣಗಳಿಂದ ರಕ್ಷಣೆ ಮಾಡಬೇಕಿದೆ.
ಸರ್ಕಾರಗಳು ಈ ಸಂಬಂಧ ನಿಯಮ ಮತ್ತು ನೀತಿಗಳನ್ನು ಜಾರಿಗೆ ತರಬೇಕು. ಹೊರಾಂಗಣ ಕೆಲಸದಲ್ಲಿ ತೊಡಗಿರುವವರ ರಕ್ಷಣೆ ನೆರಳು ಕಲ್ಪಿಸುವ, ಕೆಲಸದ ಅವಧಿ ಬದಲಾಯಿಸುವ, ಮಧ್ಯಾಹ್ನದ ಅವಧಿ ಕೆಲಸದಂತಹ ಸಮಯಗಳನ್ನು ಬದಲಾವಣೆ ಮಾಡಬಹುದು. ಅಲ್ಲದೇ ಕೆಲಸಗಾರರಿಗೆ ಸೂರ್ಯನ ಕಿರಣಗಳು ಬೀರುವ ಪ್ರಭಾವ ಹಿನ್ನೆಲೆಯಲ್ಲಿ ಮತ್ತು ಈ ಸಂಬಂಧ ನಡೆಸಬಹುದಾದ ಮುನ್ನೆಚ್ಚರಿಕೆ ಕ್ರಮಗಳಾದ ದೊಡ್ಡದಾದ ಟೋಪಿ, ಉದ್ದ ಪ್ಯಾಂಟ್ ಮತ್ತು ಕೈ ತುಂಬ ತೋಳಿನ ಉಡುಪು ಧರಿಸುವಂತೆ ಸೂಚನೆ ಸೇರಿದಂತೆ ವೈಯಕ್ತಿಕ ಸುರಕ್ಷತಾ ದಿರಿಸು, ಸಾಧನಗಳು ಮತ್ತು ಈ ಕುರಿತು ಶಿಕ್ಷಣ, ತರಬೇತಿ ನೀಡಬೇಕಿದೆ ಎಂದು ವಿಶ್ವಸಂಸ್ಥೆಯ ಏಜೆನ್ಸಿಗಳು ತಿಳಿಸಿವೆ.
ಸುರಕ್ಷತಾ ಮತ್ತು ಆರೋಗ್ಯಕರ ಕೆಲಸದ ವಾತಾವರಣ ಪ್ರತಿಯೊಬ್ಬರ ಮೂಲಭೂತ ಹಕ್ಕು ಎಂದು ಇದೇ ವೇಳೆ ಐಎಲ್ಒ ಪ್ರಧಾನ ನಿರ್ದೇಶ ಗಿಲ್ಬರ್ಟ್ ಎಫ್ ಹೌಗಬೊ ಹೇಳಿದರು. (ಐಎಎನ್ಎಸ್)
ಇದನ್ನೂ ಓದಿ: 2022ರಲ್ಲಿ ಜಾಗತಿಕವಾಗಿ 7.5 ಮಿಲಿಯನ್ ಜನರಲ್ಲಿ ಕ್ಷಯ ರೋಗ ಪತ್ತೆ: WHO
