ಮಲಬದ್ದತೆ ಎಂಬುದು ಮಕ್ಕಳಲ್ಲಿ ಸಾಮಾನ್ಯ ಸಂಗತಿ. ಮಕ್ಕಳು ಕ್ರಿಯಾಶೀಲರಾಗಿದ್ದು, ಯಾವುದೇ ಸಮಸ್ಯೆ ಇಲ್ಲದಿದ್ದಾಗಲೂ ಕೆಲವು ಬಾರಿ ಈ ಸಮಸ್ಯೆ ಕಾಡುತ್ತದೆ. ಹೊಟ್ಟೆ ಬಿಗಿತನ, ಮಲ ವಿಸರ್ಜನೆಗೆ ಕಷ್ಟ ಅಥವಾ ಕೆಲವೊಮ್ಮೆ ಮಕ್ಕಳು ಮೂರು ದಿನಗಳಾದರೂ ಮಲ ವಿಸರ್ಜನೆ ಮಾಡುವುದಿಲ್ಲ. ಇದರಿಂದ ಮಗು ಕಿರಿ ಕಿರಿ ಅನುಭವಿಸಿ ಪೋಷಕರಲ್ಲೂ ಆತಂಕ ಮೂಡಿಸುತ್ತದೆ. ಈ ವೇಳೆ ಅನೇಕ ಬಾರಿ ತಕ್ಷಣ ವೈದ್ಯರ ಬಳಿ ಓಡಿ ಹೋಗುತ್ತೇವೆ. ಇಂತಹ ಸಮಸ್ಯೆಗೆ ಕೆಲವು ಸರಳ ಪರಿಹಾರಗಳಿವೆ.
ದೊಡ್ಡವರಲ್ಲಿ ಕಾಡುವ ಈ ಮಲಬದ್ಧತೆಗೆ ಕೆಲವು ಬಾರಿ ವ್ಯಾಯಾಮಗಳು ಪರಿಹಾರ ನೀಡುವುದನ್ನು ಕಾಣಬಹುದು. ಅದೇ ಮಕ್ಕಳಲ್ಲಿ ವ್ಯಾಯಾಮ ಹೇಗೆ ಎಂಬ ಚಿಂತೆ ಅನೇಕರಲ್ಲಿ ಕಾಡುತ್ತದೆ. ಮಕ್ಕಳು ಯಾವ ರೀತಿ ವ್ಯಾಯಾಮ ಮಾಡಲು ಸಾಧ್ಯ ಎಂಬ ಪ್ರಶ್ನೆಯೂ ಸಹಜ. ಇದಕ್ಕೆ ಮಾಡಬೇಕಿರುವ ಕೆಲಸವೆಂದರೆ, ಮಗುವನ್ನು ಮಲಗಿಸಿ ಕಾಲನ್ನು ಎರಡು ಕೈಗಳಿಂದ ಹಿಡಿದು ಸೈಕಲ್ ರೀತಿ ಆಡಿಸುವುದಾಗಿದೆ. ಈ ರೀತಿ ಮಾಡುವುದರಿಂದ ಮಗುವಿನ ಹೊಟ್ಟೆಯಲ್ಲಿ ಆಗುವ ಉಬ್ಬರ ಕಡಿಮೆ ಆಗುತ್ತದೆ.
ಮಕ್ಕಳಿಗೆ ಚೆನ್ನಾಗಿ ಬಿಸಿ ನೀರಿನಿಂದ ಸ್ನಾನ ಮಾಡಿಸುವುದರಿಂದಲೂ ಪರಿಹಾರ ಕಂಡು ಕೊಳ್ಳಬಹುದು. ಇದರಿಂದ ದೇಹದ ಎಲ್ಲಾ ಭಾಗಗಳು ಕ್ರಿಯಾಶೀಲವಾಗಿ ಹೊಟ್ಟೆ ಖಾಲಿ ಆಗುತ್ತದೆ. ಇದರಿಂದ ಹೊಟ್ಟೆಯಲ್ಲಿ ಕಾಡುವ ನೋವು ಕೂಡ ಮಾಯವಾಗುತ್ತದೆ.
ಶಿಶುವಿನಲ್ಲಿ ಈ ರೀತಿಯ ಸಮಸ್ಯೆ ಕಾಡುತ್ತಿದ್ದರೆ ಹೊಟ್ಟೆಗೆ ಕೊಬ್ಬರಿ ಎಣ್ಣೆಯನ್ನು ಹಾಕಿ ಚೆನ್ನಾಗಿ ಮಸಾಜ್ ಮಾಡಿ. ಈ ವೇಳೆ ಕೈಯನ್ನು ವೃತ್ತಾಕಾರವಾಗಿ ಮಸಾಜ್ ಮಾಡುವುದೊಳಿತು. ಇದೂ ಕೂಡ ಹೊಟ್ಟೆಯಲ್ಲಿನ ಉಬ್ಬರ ಕಡಿಮೆ ಮಾಡಿ, ಮಲ ವಿಸರ್ಜನೆಗೆ ಸಹಾಯ ಮಾಡುತ್ತದೆ.
ಶಿಶುಗಳು ಸರಿಯಾದ ಸಮಯಕ್ಕೆ ಹಾಲು ಸೇವನೆ ಮಾಡುವುದು ಕೂಡ ಮುಖ್ಯ. ಇನ್ನು ವರ್ಷದ ಮೇಲಿನ ಮಕ್ಕಳು ದೇಹಕ್ಕೆ ಅಗತ್ಯ ಪ್ರಮಾಣದ ನೀರನ್ನು ಕಾಲಕಾಲಕ್ಕೆ ಕುಡಿಯುವಂತೆ ಗಮನಿಸಬೇಕು. ಇದು ಜೀರ್ಣಕ್ರಿಯೆಗೆ ಅತ್ಯವಶ್ಯಕ. ಇದರೊಂದಿಗೆ ಸಮೃದ್ಧ ಪೋಷಕಾಂಶದಿಂದ ಕೂಡಿದ ತರಕಾರಿ ಸೇವನೆಗೆ ಒತ್ತು ನೀಡಿ. ಫೈಬರ್ ಅಂಶ ಹೆಚ್ಚಿರುವ ಮೃದುವಾಗಿ ಬೇಯಿಸಿದ ಬಾರ್ಲಿ, ಗೋಧಿ, ಓಟ್ಸ್ ಕೂಡ ನೀಡಬಹುದು. ಇದೂ ಕೂಡಾ ಮಲಬದ್ಧತೆಯನ್ನು ಕಡಿಮೆ ಮಾಡಬಲ್ಲದು.
ಇದನ್ನೂ ಓದಿ: ಮಗುವಿನಲ್ಲಿ ಏಕಾಗ್ರತೆ ಕೊರತೆಗೆ ಪ್ರಮುಖ ಕಾರಣ ಈ ಸ್ಕ್ರೀನ್ ಟೈಂ; ಬೀ ಕೇರ್ಫುಲ್ ಎಂದ ಸಂಶೋಧಕರು
