ಹೈದರಾಬಾದ್: ವರ್ಷಗಳು ಉರುಳಿದರೂ ಮಕ್ಕಳ ಭಾಗ್ಯದಿಂದ ವಂಚಿತವಾಗಿದ್ದ ಆ ದಂಪತಿ ಪ್ರಾರ್ಥನೆ ಕಡೆಗೂ ಫಲಿಸಿದೆ. ಐವಿಎಫ್ ಮೂಲಕ ಅವಳಿ ಮಕ್ಕಳ ಪೋಷಕರಾಗಿದ್ದಾರೆ. ಆದರೆ ದುರದೃಷ್ಟವಶಾತ್ ಒಂದು ಮಗುವು ಅನಾರೋಗ್ಯದಿಂದ ಅಸುನೀಗಿದೆ. ಬದುಕಿದ ಮತ್ತೊಂದು ಮಗು ಕಡಿಮೆ ತೂಕದ ಆರೋಗ್ಯ ಸಮಸ್ಯೆಯಿಂದ ಆಸ್ಪತ್ರೆಗೆ ದಾಖಲಾಯಿತು. 80 ದಿನಗಳ ಸುದೀರ್ಘ ಚಿಕಿತ್ಸೆಯ ಬಳಿಕ ವೈದ್ಯರು ಹೊಸ ಜೀವನವನ್ನು ಮಗುವಿಗೆ ನೀಡಿದ್ದಾರೆ.
ಈ ಕ್ಷಣ ಆ ಪೋಷಕರ ಖುಷಿಗೆ ಪಾರವೇ ಇರಲಿಲ್ಲ. ಈ 80 ದಿನಗಳ ಹೋರಾಟ ಪೋಷಕರಿಗೆ ಮಾತ್ರವಲ್ಲ, ಅಲ್ಲಿನ ವೈದ್ಯಕೀಯ ಸಿಬ್ಬಂದಿಗೂ ಸವಾಲುದಾಯಕವಾಗಿತ್ತು. ಕಾರಣ ಆ ಪೋಷಕರಿಗೆ, ಕಿವಿ ಕೇಳದು ಮತ್ತು ಮಾತುಗಳೂ ಬಾರದು. ಇದರಿಂದ ಪರಿಸ್ಥಿತಿ ಅರ್ಥೈಸುವುದು ಸುಲಭವಾಗಿರಲಿಲ್ಲ. ಇದಕ್ಕೆ ಅಲ್ಲಿನ ಸಿಬ್ಬಂದಿ ಕೂಡ ಸನ್ನೆ ಭಾಷೆಯನ್ನು (ಕಿವುಡ ಮತ್ತು ಮೂಗರ ಸಂಪರ್ಕಕ್ಕೆ ಬಳಕೆ ಮಾಡುವ ಅಂಗಿಂಕ ಚಿಹ್ನೆಗಳು) ಕಲಿತರು. ಈ ಅಪರೂಪದ ಘಟನೆ ನಡೆದಿದ್ದು ಹೈದರಾಬಾದ್ನ ಕೆಐಎಂನ ಕುಡಲ್ಸ್ ಆಸ್ಪತ್ರೆಯಲ್ಲಿ. ಈ ಕುರಿತು ಅಲ್ಲಿನ ನವಜಾತ ಶಿಶುಗಳ ವಿಭಾಗದ ಕ್ಲಿನಿಕಲ್ ಡೈರೆಕ್ಟರ್ ಡಾ ಸಿ ಅಪರ್ಣಾ ಮಾಧ್ಯಮಗಳಿಗೆ ಈ ಬಗ್ಗೆ ಮಾಹಿತಿ ನೀಡಿದರು.
ಮಾರಿ ಭಾಗ್ಯಮ್ಮ ಮತ್ತು ರಾಜಶೇಖರ್ ದಂಪತಿಗಳಿಬ್ಬರಿಗೂ ಮಾತು ಬಾರದು. ಈ ಹಿಂದೆ ಮಗು ಕಳೆದುಕೊಂಡಿದ್ದ ಈ ಜೋಡಿ ಇತ್ತೀಚಿಗೆ ಅವಳಿ ಮಕ್ಕಳ ಪೋಷಕರಾದರು. ಇದರಲ್ಲಿ ಒಂದು ಗಂಡು ಮತ್ತೊಂದು ಹೆಣ್ಣು. ಗಂಡು ಮಗು ಅನಾರೋಗ್ಯದಿಂದ ಸಾವನ್ನಪ್ಪಿತು. ಉಳಿದ ಹೆಣ್ಣು ಮಗುವಿನ ತೂಕ ಕೇವಲ 540 ಗ್ರಾಂ ಇದ್ದು, ಹೆಚ್ಚಿನ ಚಿಕಿತ್ಸೆಗೆ ಕಿಮ್ಸ್ ಕುಡಲ್ಸ್ಗೆ ದಾಖಲು ಮಾಡಲಾಯಿತು. ಅಲ್ಲಿ ವೈದ್ಯರು 80 ದಿನಗಳು ನಡೆಸಿದ ಚಿಕಿತ್ಸೆಯಿಂದಾಗಿ 540 ಗ್ರಾಂ ಇದ್ದ ಮಗುವು 1642 ಗ್ರಾಂ ತೂಗಿತು. ಈ ವೇಳೆ, ಪೋಷಕರ ಖಷಿಗೆ ಪಾರಾವೇ ಇಲ್ಲದಂತೆ ಆಗಿ ವೈದ್ಯರಿಗೆ ಕೃತಜ್ಞತೆ ತೋರಿದರು.
ಯಾಗ ನಡೆಸಿದ ವೈದ್ಯಕೀಯ ಸಿಬ್ಬಂದಿ:ಈ ಪ್ರಯಾಣವೂ ಪೋಷಕರಿಗೆ ಮಾತ್ರವಲ್ಲ, ವೈದ್ಯಕೀಯ ಸಿಬ್ಬಂದಿಗೂ ಒಂದು ಯಜ್ಞ ಮಾಡಿದಂತಹ ಅನುಭವ. ಕಾರಣ ಮಗುವಿಗೆ ಯಾವ ರೀತಿ ಚಿಕಿತ್ಸೆ ನಡೆಸಲಾಗುತ್ತಿದೆ. ಇದರಿಂದ ಆಗುವ ಪರಿಣಾಮ ಕುರಿತು ಪೋಷಕರಿಗೆ ಹೇಳುವುದು ಬಲು ಕಷ್ಟವಾಗಿತ್ತು. ಮೂಗ - ಕಿವುಡ ದಂಪತಿಗಳಿಗೆ ಈ ಕುರಿತು ಪೇಪರ್ನಲ್ಲಿ ಬರೆದು ಹೇಳಿ ಅರ್ಥೈಸುವ ಪ್ರಯತ್ನವೂ ನಡೆಯಿತು. ಈ ಸಮಯದಲ್ಲಿ ಅವರ ಸಹಾಯಕರೊಬ್ಬರು ಅವರ ಜೊತೆಗೆ ಬಂದು ವೈದ್ಯರ ಹೇಳುತ್ತಿದ್ದನ್ನು ತಿಳಿಸಿ ಹೇಳುವ ಪ್ರಯತ್ನ ಮಾಡುತ್ತಿದ್ದರು. ಅವರು ಬರದೆ ಇದ್ದಾಗ ಸಮಸ್ಯೆ ಆಗುತ್ತಿತ್ತು. ಇದಕ್ಕಾಗಿ ವೈದ್ಯರು ಮತ್ತು ಸಿಬ್ಬಂದಿಗಳು 16 ಚಿಹ್ನೆಯನ್ನು ಕಲಿತರು. ಈ ಮೂಲಕ ಅವರ ಸಂಭಾಷಣೆ ಸಾಗಿತು. ಇದೀಗ ವೈದ್ಯರ ಶ್ರಮಕ್ಕೆ ತಕ್ಕ ಫಲ ಸಿಕ್ಕಿದ್ದು, ಮಗು ಜೀವಂತವಾಗಿದೆ ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ: ಗರ್ಭಿಣಿಯರಿಗೆ ಆರಂಭಿಕ ಗರ್ಭಾವಸ್ಥೆಯಲ್ಲಿ ವಾಂತಿಯಾಗುವುದೇಕೆ?
