ದೇಶದಲ್ಲಿ ತುಪ್ಪಕ್ಕೆ ಇನ್ನಿಲ್ಲದ ಮಹತ್ವ. ಆರೋಗ್ಯ ಹಾಗೂ ಬುದ್ದಿ ಶಕ್ತಿ ಹೆಚ್ಚಳಕ್ಕೆ ತುಪ್ಪ ಇರಲೇಬೇಕು. ಹಾಗಾಗಿ ತುಪ್ಪ ಆಹಾರದ ಅವಿಭಾಜ್ಯ ಅಂಗವೂ ಹೌದು. ಶುದ್ಧ ದೇಸಿ ತುಪ್ಪವು ಸ್ಮರಣಶಕ್ತಿ ಮತ್ತು ಶಕ್ತಿಯನ್ನು ಹೆಚ್ಚಿಸುತ್ತದೆ. ದೇಹದಲ್ಲಿನ ವಾತ ಮತ್ತು ಪಿತ್ತ ದೋಷಗಳು ಮತ್ತು ಇತರ ವಿಷಕಾರಿ ಪದಾರ್ಥಗಳ ಪರಿಣಾಮವನ್ನು ಪರಿಶುದ್ಧ ತುಪ್ಪ ಕಡಿಮೆ ಮಾಡುತ್ತದೆ ಎಂದು ಚರಕ ಸಂಹಿತಾ ಉಲ್ಲೇಖಿಸುತ್ತದೆ. ಆದ್ದರಿಂದ, ಆಯುರ್ವೇದದಲ್ಲಿ ಶುದ್ಧ ತುಪ್ಪವನ್ನು ಔಷಧವೆಂದು ಪರಿಗಣಿಸಲಾಗುತ್ತದೆ. ಅಷ್ಟೇ ಏಕೆ ಅನೇಕ ರೀತಿಯ ಚಿಕಿತ್ಸೆಗಳಲ್ಲಿ ತುಪ್ಪವನ್ನು ಬಳಕೆ ಮಾಡಲಾಗುತ್ತದೆ.
ಆಯುರ್ವೇದ ವೈದ್ಯರು ಹೇಳೋದೇನು?: ತುಪ್ಪವನ್ನು ಕೇವಲ ಖಾದ್ಯ ಔಷಧವಾಗಿ ಬಳಸಲಾಗುವುದಿಲ್ಲ. ಆದರೆ, ಅದರ ಬಾಹ್ಯ ಬಳಕೆಯನ್ನು ಪಂಚಕರ್ಮ ಸೇರಿದಂತೆ ವಿವಿಧ ಚಿಕಿತ್ಸೆಗಳಿಗೆ ಆಯುರ್ವೇದದಲ್ಲಿ ಉಲ್ಲೇಖಿಸಲಾಗಿದೆ ಎಂದು ಮುಂಬೈ ಮೂಲದ ಆಯುರ್ವೇದ ವೈದ್ಯ ಡಾ.ಮನೀಷ್ ಕಾಳೆ ಹೇಳಿದ್ದಾರೆ.
ಆಯುರ್ವೇದದಲ್ಲಿ ಹೇಳುವ ಪ್ರಕಾರ ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಶುದ್ಧ ಹಸುವಿನ ತುಪ್ಪವನ್ನು ಸೇವಿಸಿದರೇ ಭಾರಿ ಪ್ರಯೋಜನವುಂಟು ಅಂತಾರಾ ಕಾಳೆ. ಏಕೆಂದರೆ ಇದು ಅನೇಕ ಆರೋಗ್ಯ ಸಮಸ್ಯೆಗಳನ್ನು ನಿವಾರಿಸಲು ಸಹಾಯ ಮಾಡುತ್ತದೆ. ಜೀರ್ಣಕಾರಿ ಮತ್ತು ಮೂಳೆಗಳ ಆರೋಗ್ಯವನ್ನು ಕಾಪಾಡುತ್ತದೆ. ನರಮಂಡಲವನ್ನು ಆರೋಗ್ಯವಾಗಿಡುತ್ತದೆ ಮತ್ತು ಕೂದಲು ಮತ್ತು ಚರ್ಮಕ್ಕೂ ತುಪ್ಪ ಸೇವನೆಯಿಂದ ಒಳ್ಳೆಯದಾಗುತ್ತದೆ.
ಮೆದುಳಿನ ಟಾನಿಕ್ ಈ ತುಪ್ಪ: ತುಪ್ಪವನ್ನು ಮೆದುಳಿನ ಟಾನಿಕ್ ಎಂದೂ ಕರೆಯುತ್ತಾರೆ. ಏಕೆಂದರೆ ಅದರ ನಿಯಮಿತ ಸೇವನೆಯಿಂದ ಸ್ಮರಣ ಶಕ್ತಿ ಸುಧಾರಿಸುತ್ತದೆ. ನರಮಂಡಲ ಸಂಬಂಧಿತ ಸಮಸ್ಯೆಗಳಿಗೆ ಸಹಾಯ ಮಾಡುತ್ತದೆ ಎನ್ನುತ್ತಾರೆ ತಜ್ಞ ವೈದ್ಯ ಕಾಳೆ ಅವರು. ತುಪ್ಪ ತಲೆಯ ಮಸಾಜ್ಗೆ ಸಹಕರಿಸುತ್ತದೆ. ಮಾನಸಿಕ ಆರೋಗ್ಯ ಸಮಸ್ಯೆಗಳಾದ ಆತಂಕ, ಉದ್ವೇಗ, ಕೋಪ ಮತ್ತು ಚಡಪಡಿಕೆಯಿಂದ ಪರಿಹಾರ ನೀಡುತ್ತದೆ. ಗಾಯಗಳು ಮತ್ತು ಪೈಲ್ಸ್ ಸಮಸ್ಯೆ ಪರಿಹರಿಸಲು ಹಾಗೂ ಚಿಕಿತ್ಸೆಗೆ ತುಪ್ಪವನ್ನ ಬಳಕೆ ಮಾಡಲಾಗುತ್ತದೆ.
ಪೌಷ್ಟಿಕತಜ್ಞರು ಏನು ಹೇಳುತ್ತಾರೆ?: ಇಂದೋರ್ ಮೂಲದ ಡಯೆಟಿಷಿಯನ್ ಮತ್ತು ಪೌಷ್ಟಿಕತಜ್ಞ ಡಾ. ಸಂಗೀತಾ ಮಾಲು ಅವರು ಶುದ್ಧ ದೇಸಿ ತುಪ್ಪವನ್ನು ಮಿತವಾಗಿ ನಿಯಮಿತವಾಗಿ ಸೇವಿಸುವುದು ನಮ್ಮ ಆರೋಗ್ಯಕ್ಕೆ ಪ್ರಯೋಜನಕಾರಿ ಎಂದು ಹೇಳಿದ್ದಾರೆ. ಆಹಾರದಲ್ಲಿ ನಿತ್ಯ 2-3 ಚಮಚ ತುಪ್ಪ ಬಳಕೆ ಮಾಡುವುದು ಸೂಕ್ತ. ಆದರೆ, ಅಧಿಕವಾಗಿ ತುಪ್ಪ ಸೇವನೆ ಮಾಡುವುದು ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗಬಹುದು. ಮೊದಲೇ ಅಸ್ತಿತ್ವದಲ್ಲಿರುವ ರೋಗಗಳಿರುವ ಜನರಿಗೆ ಪರಿಸ್ಥಿತಿಯನ್ನು ಇನ್ನಷ್ಟು ಹದಗೆಡಿಸಲೂಬಹುದು.
ದೇಸಿ ತುಪ್ಪದಲ್ಲಿ ಕ್ಯಾಲ್ಸಿಯಂ, ರಂಜಕ, ಖನಿಜಗಳು, ಪೊಟ್ಯಾಸಿಯಮ್, ಹಾಲಿನ ಪ್ರೋಟೀನ್, ವಿಟಮಿನ್ ಎ, ಕೆ, ಇ, ಡಿ, ಒಮೆಗಾ 3 ಮತ್ತು ಒಮೆಗಾ 9 ಕೊಬ್ಬಿನಾಮ್ಲಗಳಂತಹ ಪೋಷಕಾಂಶಗಳಿವೆ. ಪೌಷ್ಟಿಕಾಂಶವನ್ನು ಒದಗಿಸುವುದರ ಜೊತೆಗೆ, ದೇಹವು ಹಲವಾರು ಸೋಂಕುಗಳ ವಿರುದ್ಧ ಹೋರಾಡಲು ಸಹಾಯ ಮಾಡುತ್ತದೆ.
ದೇಸಿ ತುಪ್ಪದ ಕೆಲವು ಇತರ ಪ್ರಯೋಜನಗಳು ಹೀಗಿವೆ:
- ತುಪ್ಪ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ.
- ಜೀರ್ಣಕ್ರಿಯೆಯನ್ನು ಸುಧಾರಿಸುತ್ತದೆ ಮತ್ತು ಕರುಳಿನ ಆರೋಗ್ಯವನ್ನು ಸುಧಾರಿಸುತ್ತದೆ.
- ಇದು ದೇಹದಲ್ಲಿನ ಕೆಟ್ಟ ಕೊಲೆಸ್ಟ್ರಾಲ್ ಮಟ್ಟವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯವನ್ನು ಕಡಿಮೆ ಮಾಡುತ್ತದೆ.
- ಸ್ಥೂಲಕಾಯವನ್ನು ತಡೆಯುವುದರ ಜೊತೆಗೆ ದೇಹದ ಕೊಬ್ಬನ್ನು ಕಡಿಮೆ ಮಾಡಲು ತುಪ್ಪ ಸಹಾಯ ಮಾಡುತ್ತದೆ.
- ತುಪ್ಪದ ಸೇವನೆಯು ಕೀಲುಗಳನ್ನು ನಯಗೊಳಿಸಲು ಸಹಾಯ ಮಾಡುತ್ತದೆ ಮತ್ತು ಮೂಳೆಗಳು ಕ್ಯಾಲ್ಸಿಯಂ ಹೀರಿಕೊಳ್ಳುವ ಸಾಮರ್ಥ್ಯವನ್ನು ಹೆಚ್ಚಿಸುತ್ತದೆ.
- ಇದು ಕೂದಲು ಮತ್ತು ಚರ್ಮದ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಸಹಾಯ ಮಾಡುತ್ತದೆ.
ಸಂಶೋಧನೆಗಳು ಹೇಳುವುದೇನು?: ತುಪ್ಪದ ಪ್ರಯೋಜನಗಳ ಕುರಿತು ರಾಷ್ಟ್ರೀಯ ಡೈರಿ ರಿಸರ್ಚ್ ಇನ್ಸ್ಟಿಟ್ಯೂಟ್ ಅಧ್ಯಯನ ನಡೆಸಿದೆ. ಶುದ್ಧ ತುಪ್ಪವು ದೇಹದಲ್ಲಿ ಕಿಣ್ವಗಳನ್ನು ತಯಾರಿಸುತ್ತದೆ ಎಂಬ ಅಂಶವನ್ನು ಕಂಡು ಹಿಡಿದಿದೆ. ಇದು ಕ್ಯಾನ್ಸರ್ ಬೆಳವಣಿಗೆಯನ್ನು ವೇಗಗೊಳಿಸುವ ವೈರಸ್ ಅನ್ನು ತೊಡೆದು ಹಾಕಲು ಸಹಾಯ ಮಾಡುತ್ತದೆ.
ಅಲ್ಲದೇ, ನ್ಯಾಷನಲ್ ಸೆಂಟರ್ ಫಾರ್ ಬಯೋಟೆಕ್ನಾಲಜಿ ಇನ್ಫರ್ಮೇಷನ್ (NCBI) ನಲ್ಲಿ ಪ್ರಕಟವಾದ ಮತ್ತೊಂದು ಸಂಶೋಧನೆಯು ತುಪ್ಪವು ಕ್ಯಾನ್ಸರ್ ಪರಿಣಾಮವನ್ನು ಕಡಿಮೆ ಮಾಡುವ ಸಾಮರ್ಥ್ಯ ಹೊಂದಿದೆ ಎಂದು ಹೇಳುತ್ತದೆ. ಇದಲ್ಲದೇ, ತುಪ್ಪದಲ್ಲಿ ಕಂಡುಬರುವ ಲಿನೋಲಿಕ್ ಆಮ್ಲವು ಕರುಳಿನ ಕ್ಯಾನ್ಸರ್ ತಡೆಗಟ್ಟುವಲ್ಲಿ ಸಹಾಯ ಮಾಡುತ್ತದೆ ಎಂಬ ಅಂಶವನ್ನು ಒತ್ತಿ ಹೇಳುತ್ತದೆ.
ತುಪ್ಪದಲ್ಲಿರುವ ಆಂಟಿ ಆಕ್ಸಿಡೆಂಟ್‌ಗಳು ಕೆಟ್ಟ ಕೊಲೆಸ್ಟ್ರಾಲ್ ಮಟ್ಟವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಚಯಾಪಚಯ ಕ್ರಿಯೆಗಳನ್ನು ಸುಧಾರಿಸುತ್ತದೆ. ಜೀರ್ಣಕ್ರಿಯೆ, ಮಲಬದ್ಧತೆ, ವಾಂತಿ ಮತ್ತು ವಾಕರಿಕೆ ಮುಂತಾದ ಸಮಸ್ಯೆಗಳು ಮತ್ತು ಮೂಳೆಗಳನ್ನು ಬಲಪಡಿಸುತ್ತದೆ. ಕೊಬ್ಬಿನಲ್ಲಿ ಕರಗುವ ಜೀವಸತ್ವಗಳು ತುಪ್ಪದಲ್ಲಿ ಕಂಡು ಬರುತ್ತವೆ. ಇದು ಗರ್ಭಾವಸ್ಥೆಯಲ್ಲಿ ಮುಖ್ಯವಾದ ಥೈರಾಯ್ಡ್ ಗ್ರಂಥಿಯನ್ನು ನಿಯಂತ್ರಿಸುತ್ತದೆ. ಗರ್ಭಿಣಿ ಮಹಿಳೆಯರಲ್ಲಿ, ಇದರ ಔಷಧೀಯ ಗುಣಗಳು ತಾಯಿ ಮತ್ತು ಹುಟ್ಟುವ ಮಗುವಿಗೆ ಪ್ರಯೋಜನವನ್ನು ನೀಡುತ್ತದೆ.
ಶುದ್ಧ ದೇಸಿ ತುಪ್ಪದ ಬಳಕೆಯು ನಿಸ್ಸಂದೇಹವಾಗಿ ದೇಹಕ್ಕೆ ಸಾಕಷ್ಟು ಪ್ರಯೋಜನವನ್ನು ನೀಡುತ್ತದೆ. ಆದರೆ, ಅದನ್ನು ಸೇವಿಸುವ ಪ್ರಮಾಣದಲ್ಲಿ ಕಾಳಜಿ ವಹಿಸುವುದು ಬಹಳ ಮುಖ್ಯ ಎಂದು ಡಾ.ಸಂಗೀತಾ ಹೇಳುತ್ತಾರೆ. ವಿಶೇಷವಾಗಿ ಈಗಾಗಲೇ ಆರೋಗ್ಯ ಸ್ಥಿತಿಯಿಂದ ಬಳಲುತ್ತಿರುವವರು ತಮ್ಮ ಆಹಾರದಲ್ಲಿ ಸೇವಿಸಬಹುದಾದ ಯಾವುದೇ ರೀತಿಯ ಕೊಬ್ಬಿನ ಪ್ರಮಾಣವನ್ನು ಕುರಿತು ಒಮ್ಮೆ ವೈದ್ಯರು ಅಥವಾ ಆಹಾರ ತಜ್ಞರನ್ನು ಸಂಪರ್ಕಿಸುವುದು ಒಳಿತು.
ಇದನ್ನು ಓದಿ:ಬಿಸಿಲಿನ ಹೊಡೆತ ಮಾರಣಾಂತಿಕವಾಗಬಹುದು.. ಸೆಕೆ ನಿಯಂತ್ರಿಸಲು ಹೀಗೆ ಮಾಡಿ!
