ಯಾದಗಿರಿ: ಆತ ಓರ್ವ ವಿಶೇಷಚೇತನ ರೈತ. ಜೀವನದಲ್ಲಿ ಕಷ್ಟಪಟ್ಟು ಕೆಲಸ ಮಾಡಬೇಕು, ನಾಲ್ಕು ಕಾಸು ಸಂಪಾದನೆ ಮಾಡಬೇಕು, ತನ್ನ ಮನೆಯವರನ್ನು ಚೆನ್ನಾಗಿ ನೋಡಿಕೊಳ್ಳಬೇಕು ಎಂಬ ಹಂಬಲ ಆತನಲ್ಲಿತ್ತು. ಹೀಗಾಗಿ ತನ್ನ ಬರಡು ಭೂಮಿಯನ್ನು ಹದಗೊಳಿಸಿ ಭತ್ತ ಬೆಳೆದಿದ್ದ. ಇನ್ನೇನು ಫಸಲು ಕೈಗೆ ಬಂತು ಅನ್ನುವಷ್ಟರಲ್ಲಿ ಫಸಲು ಭೀಮಾ ನದಿ ಪ್ರವಾಹಕ್ಕೆ ತುತ್ತಾಗಿದೆ. ಇದರಿಂದ ಬಡ ರೈತ ಕಣ್ಣೀರಲ್ಲಿ ಕೈ ತೊಳೆಯುವಂತಾಗಿದೆ.
ನಾವು ಹೇಳುತ್ತಿರುವುದು ಯಾದಗಿರಿ ಪಟ್ಟಣದ ಲಾಡಸ್ ಗಲ್ಲಿಯ ರೈತ ಮಲ್ಲಯ್ಯ ಪೂಜಾರ್ ಕಥೆ. ಒಂದು ಕಾಲಿನ ಸ್ವಾಧೀನ ಕಳೆದುಕೊಂಡು ಕೋಲಿನ ಸಹಾಯದಿಂದಲೇ ನಡೆದಾಡುವ ಈತ, ಕಷ್ಟಪಟ್ಟು ದುಡಿದು ತಿನ್ನುವ ಸ್ವಾವಲಂಬಿ. ಈ ವರ್ಷ ಉತ್ತಮ ಬೆಳೆ ಬರುತ್ತೆ ಎಂದು ತನ್ನ ಐದು ಎಕರೆ ಜಮೀನಿನಲ್ಲಿ ಸಾಲ ಮಾಡಿ ಭತ್ತ ನಾಟಿ ಮಾಡಿದ್ದ. ಅದರಂತೆ, ಉತ್ತಮ ಫಸಲು ಕೂಡಾ ಬಂದಿತ್ತು. ಇನ್ನೇನು ಹದಿನೈದು ದಿನ ಕಳೆದ್ರೆ ಕಷ್ಟಪಟ್ಟಿದ್ದಕ್ಕೆ ಪ್ರತಿಫಲ ಸಿಗುತ್ತೆ ಎಂದು ಮಲ್ಲಯ್ಯ ಖುಷಿಯಲ್ಲಿದ್ದ. ಆದರೆ, ರಾತ್ರೋರಾತ್ರಿ ಉಕ್ಕಿ ಬಂದ ಭೀಮಾ ನದಿಯ ಪ್ರವಾಹ ಬಡ ರೈತನ ಕನಸು ನುಚ್ಚು ನೂರು ಮಾಡಿದೆ.
ಮಹಾರಾಷ್ಟ್ರದ ಜಲಾಶಯಗಳಿಂದ ಭೀಮಾ ನದಿಗೆ ನೀರು ಹರಿಸಿದ್ದರಿಂದ, ಪ್ರವಾಹ ಉಂಟಾಗಿ ಮಲ್ಲಯ್ಯ ಪೂಜಾರ್ ಜಮೀನಿನಲ್ಲಿ ನೀರು ನಿಂತು ಭತ್ತದ ಬೆಳೆ ಸಂಪೂರ್ಣ ಹಾಳಾಗಿದೆ. ಇತ್ತ ಹಾಕಿದ ದುಡ್ಡೂ ಇಲ್ಲದೆ, ಬೆಳೆದ ಬೆಳೆ ಕೈಗೆ ಸಿಗದೆ ತನ್ನ ಕುಟುಂಬ ನಿರ್ವಹಣೆ ಹೇಗೆ ಮಾಡುವುದು? ಪಡೆದ ಸಾಲ ಹೇಗೆ ತೀರಿಸುವುದು ಎಂಬ ಚಿಂತೆಯಿಂದ ಮಲ್ಲಯ್ಯ ಕಂಗಾಲಾಗಿದ್ದಾರೆ. ಸರ್ಕಾರದಿಂದ ಸೂಕ್ತ ಪರಿಹಾರದ ನಿರೀಕ್ಷೆಯಲ್ಲಿದ್ದಾರೆ.
