ಸುರಪುರ: ನಗರದಲ್ಲಿ ವಾಸವಾಗಿರುವ ಚಮ್ಮಾರಿಕೆ ಕಾಯಕದ ಕುಟುಂಬಗಳಿಗೆ ಲಾಕ್‌ಡೌನ್‌ನಿಂದ ತೀವ್ರ ಸ್ವರೂಪದ ತೊಂದರೆಗೆ ಸಿಲುಕಿವೆ.
ಪಾದರಕ್ಷೆಗಳನ್ನು ಸರಿಪಡಿಸಿ ಕೈಗೆ ಬಂದ ಆದಾಯದಲ್ಲಿ ಜೀವನ ನಡೆಸುವ ಈ ಕುಟುಂಬಗಳಿಗೆ ಈಗ ಕೆಲಸವಿಲ್ಲದಂತಾಗಿದೆ. ಸಂಘ ಸಂಸ್ಥೆಗಳು ಕೊಡುವ ಆಹಾರ ದಿನಸಿ ಮೇಲೆ ಜೀವನ ಸಾಗಿಸುತ್ತಿದ್ದಾರೆ. ಕೊರೊನಾದಿಂದಾಗಿ ಜನರು ಹೊರಗೆ ಬರದಿರುವುದರಿಂದ ಪಾದರಕ್ಷೆ ದುರಸ್ತಿ ಕೆಲಸ ನಿಂತುಹೋಗಿದೆ. ಇದರಿಂದ ಚಮ್ಮಾರರ ಬದುಕೂ ನಿಂತು ಹೋಗಿದೆ. ದಿನಕ್ಕೆ 50 ರೂಪಾಯಿ ದುಡಿಯಲಾಗದೆ ಕಷ್ಟಪಡುವಂತಾಗಿದೆ ಎಂದು ಚಮ್ಮಾರಿಕೆ ಮಾಡುವ ಅಂಬ್ಲಯ್ಯ ಗೋಳು ತೋಡಿಕೊಂಡರು.
ಹೀಗಾಗಿ ಕುಟುಂಬಗಳಿಗೆ ತಿಂಗಳಿಗೆ ಕನಿಷ್ಠ 10 ಸಾವಿರ ರೂ ಪಿಂಚಣಿ ಹಾಗೂ ಚಮ್ಮಾರಿಕೆ ಕಿಟ್‌ಗಳನ್ನು ಸರ್ಕಾರ ನೀಡಬೇಕೆಂದು ಅನೇಕರು ಆಗ್ರಹಿಸುತ್ತಿದ್ದಾರೆ.
