ವಿಜಯಪುರ: ರಾಜ್ಯದಲ್ಲಿ ಹಲವೆಡೆ ಮಳೆರಾಯನ ಆರ್ಭಟ ಹೆಚ್ಚಾಗಿದ್ದು, ಭಾರಿ ಮಳೆಯಿಂದ ಜನರು ಪ್ರಾಣ ಕಳೆದುಕೊಂಡಿದ್ದ ಘಟನೆಗಳು ವರದಿಯಾಗಿದ್ದವು. ಇನ್ನು ಬಿಸಿಲ ನಾಡು ವಿಜಯಪುರ ಜಿಲ್ಲೆಯಲ್ಲಿ ಮಾತ್ರ ಬಿಸಿಲಿನ ಬೇಗೆ ಹೆಚ್ಚಾಗಿದೆ. ಜಿಲ್ಲೆಯಲ್ಲಿ ತಾಪಮಾನ ಗರಿಷ್ಠ 42 ಡಿಗ್ರಿ ಸೆಲ್ಸಿಯಸ್ಗೆ ತಲುಪಿದೆ. ಇದರಿಂದ ಯುವಕರು ಬಿಸಿಲಿನ ತಾಪ ತಣಿಸಿಕೊಳ್ಳಲು ಗ್ರಾಮೀಣ ಭಾಗದಲ್ಲಿ ನದಿ, ಬಾವಿಗಳಲ್ಲಿಗೆ ಈಜಲು ತೆರಳುತ್ತಿದ್ದರೆ. ಪಟ್ಟಣಗಳಲ್ಲಿ ಈಜುಕೊಳಗಳ ಮೊರೆ ಹೋಗುತ್ತಿದ್ದಾರೆ.
ಬಿಸಿಲಿನ ತಾಪಮಾನದ ದಾಖಲೆ ನೋಡಿದರೆ 2019 ಮೇ 30ರಂದು ಗರಿಷ್ಠ 43 ಡಿಗ್ರಿ ಸೆಲ್ಸಿಯಸ್ ತಲುಪಿತ್ತು. ಅದು ಬಿಟ್ಟರೆ 2020ರ ಮೇ 27ರಂದು 42.5 ಡಿಗ್ರಿ ಸೆಲ್ಸಿಯಸ್ ಹಾಗೂ ಇಂದು 42 ಡಿಗ್ರಿ ಸೆಲ್ಸಿಯಸ್ಗೆ ತಲುಪಿದೆ. ಇನ್ನು ಯಾದಗಿರಿ ಜಿಲ್ಲೆಯಲ್ಲಿ ಭಾನುವಾರ 45 ಡಿಗ್ರಿ ಸೆಲ್ಸಿಯಸ್ ತಲುಪಿತ್ತು. ವಿಜಯಪುರ ಜಿಲ್ಲೆಯಲ್ಲಿ ಇನ್ನೊಂದು ವಾರದಲ್ಲಿ ಗರಿಷ್ಠ ತಾಪಮಾನ ದಾಖಲಾಗಬಹುದು ಎನ್ನುವ ಅಂದಾಜು ಇದೆ ಎಂದು ಹಿಟ್ಟನಹಳ್ಳಿಯ ಕೃಷಿ ಮಹಾವಿದ್ಯಾಲಯದ ಹಮಾಮಾನ ಇಲಾಖೆ ತಜ್ಞರ ಅಭಿಪ್ರಾಯಪಟ್ಟಿದ್ದಾರೆ.
ಈಜುಕೊಳಕ್ಕೆ ಹರಿದು ಬರುತ್ತಿರುವ ಯುವಕರ ದಂಡು: ನಗರದಲ್ಲಿ ಹಲವು ಕಡೆಗಳಲ್ಲಿ ಇರುವ ಸ್ವಿಮ್ಮಿಂಗ್ ಪೂಲ್‌ಗಳಲ್ಲಿ ಈಜಲು ಬಾಲಕರಿಂದ ಹಿಡಿದು ವೃದ್ಧರವರೆಗೆ ಬರುತ್ತಿದ್ದಾರೆ. ಬೆಳಗ್ಗೆ 9 ಗಂಟೆಯಿಂದಲೇ ಬಿಸಿಲಿನ ಬೇಗೆ ಹೆಚ್ಚಾಗುತ್ತಿದ್ದಂತೆ ನೀರಿನಲ್ಲಿ ಈಜಾಡಿ ಬಿಸಿಲಿನ ಝಳ ತಣಿಸಿಕೊಳ್ಳುತ್ತಿದ್ದಾರೆ. ಇನ್ನು ಸ್ವಿಮ್ಮಿಂಗ್ ಪೂಲ್‌ಗಳಲ್ಲಿ ಪ್ರತಿ ಗಂಟೆಗೆ 60 ರೂ.ಗಳಂತೆ ಶುಲ್ಕ ನಿಗದಿ ಮಾಡಲಾಗಿದೆ. ನಗರದ ಕನಕದಾಸ ಬಡಾವಣೆಯಲ್ಲಿರುವ ಈಜುಕೊಳದಲ್ಲಿ ಬಾಲಕರಿಗೆ ತಿಂಗಳಿಗೆ 600 ರೂ. ಯುವಕರಿಗೆ 1200 ಹಾಗೂ ಸರ್ಕಾರಿ ನೌಕರರಿಗೆ 600 ಶುಲ್ಕ ನಿಗದಿ ಮಾಡಲಾಗಿದೆ ಎನ್ನುತ್ತಾರೆ ಈಜುಕೊಳದ ನಿರ್ವಾಹಕಿ ಮುತ್ತವ್ವ ಪಾತ್ರೋಟಿ.
ಸದ್ಯ ಪರೀಕ್ಷೆಗಳು ಮುಗಿದು ಶಾಲಾ, ಕಾಲೇಜುಗಳಿಗೆ ಬೇಸಿಗೆ ರಜೆ ಇರುವ ಕಾರಣ ಬಾಲಕರು, ಯುವಕರು ಹೆಚ್ಚಿನ ಸಂಖ್ಯೆಯಲ್ಲಿ ಈಜುಕೊಳಗಳಿಗೆ ಆಗಮಿಸಿಸುತ್ತಿದ್ದಾರೆ. ಮನೆಯಲ್ಲಿ ಕುಳಿತುಕೊಳ್ಳಲಾಗದಷ್ಟು ಶಕೆ ಇರುವ ಕಾರಣ ಈಜುಕೊಳ ಎಲ್ಲರ ಫೆವರೆಟ್ ಸ್ಥಳವಾಗಿ ಮಾರ್ಪಟ್ಟಿದೆ. ಕೆಲ ಪೋಷಕರು ತಮ್ಮ ಮಕ್ಕಳಿಗೆ ಈಜು ಕಲಿಸಲು ಕರೆದುಕೊಂಡು ಬರುತ್ತಿದ್ದಾರೆ. ವಿಶೇಷ ತರಬೇತಿ ಹೊಂದಿರುವ ಟ್ರೇನರ್‌ಗಳಿಂದ ಮಕ್ಕಳಿಗೆ ಈಜು ಕಲಿಸುವ ಸೌಲಭ್ಯವನ್ನು ಸಹ ಸ್ವಿಮ್ಮಿಂಗ್ ಪೂಲ್ನ ಮಾಲೀಕರು ಒದಗಿಸಿದ್ದಾರೆ. ಬೇಸಿಗೆ ಬಿಸಿಲು 42 ಡಿಗ್ರಿ ಸೆಲ್ಸಿಯಸ್ ತಲುಪಿದ ಕಾರಣ ಜನ ಮನೆಯಿಂದ ಹೊರಗೆ ಬರುತ್ತಿಲ್ಲ. ಸದಾ ಜನಜಂಗುಳಿಯಿಂದ ಕೂಡಿರುತ್ತಿದ್ದ ಗಾಂಧಿ ವೃತ್ತ, ಬಸವೇಶ್ವರ ವೃತ್ತ, ಬಸ್ ನಿಲ್ದಾಣ ರಸ್ತೆಗಳಲ್ಲಿ ವಾಹನ ಸಂಚಾರ ವಿರಳವಾಗಿದೆ.
ಹಿಂದಿನ ಗರಿಷ್ಠ ತಾಪಮಾನದ ಅಂಕಿ ಅಂಶ: ಕಳೆದ 2012ರಿಂದ 2023ರ ಮೇ ತಿಂಗಳವರೆಗೆ ವಿಜಯಪುರ ಜಿಲ್ಲೆಯಲ್ಲಿ ಬಿಸಿಲಿನ ಗರಿಷ್ಠ ತಾಪಮಾನದ ಬಗ್ಗೆ ಒಮ್ಮೆ ಅವಲೋಕಿಸಿದರೆ ಸರಾಸರಿ 43ರಿಂದ 37 ಡಿಗ್ರಿ ಸೆಲ್ಸಿಯಸ್ ತಾಪಮಾನ ದಾಖಲಾಗಿದೆ. 2012ರ ಮೇಯಲ್ಲಿ 41 ಡಿಗ್ರಿ ಸೆಲ್ಸಿಯಸ್, 2013ರ ಮೇ ತಿಂಗಳಲ್ಲಿ 40.8, 2014ರ ಮೇ ತಿಂಗಳಲ್ಲಿ 40.8, 2015ರ ಮೇ ತಿಂಗಳಲ್ಲಿ 42.2, 2016ರ ಮೇ ತಿಂಗಳಲ್ಲಿ 41.6, 2017ರ ಮೇ ತಿಂಗಳಲ್ಲಿ 41.5, 2018ರ ಮೇ ತಿಂಗಳಲ್ಲಿ 42.0, 2019ರ ಮೇ ತಿಂಗಳಲ್ಲಿ 43.0 (10ವರ್ಷದಲ್ಲಿ ಗರಿಷ್ಠ), 2020ರ ಮೇ ತಿಂಗಳಲ್ಲಿ 42.5, 2021ರ ಮೇ ತಿಂಗಳಲ್ಲಿ 37.0, 2022 ರ ಮೇ ತಿಂಗಳಲ್ಲಿ 41.5 ಹಾಗೂ 2023ರ ಮೇ 21ರವರೆಗೆ 42.6 ಗರಿಷ್ಠ ತಾಪಮಾನ ದಾಖಲಾಗಿದೆ.
ಇದನ್ನೂ ಓದಿ:ಬೆಂಗಳೂರು ಮಳೆಗೆ ಮತ್ತೊಂದು ಬಲಿ: ಭಾನುರೇಖಾ ಕುಟುಂಬಸ್ಥರಿಂದ ಬಿಬಿಎಂಪಿ ವಿರುದ್ಧ FIR ದಾಖಲು
