ಮುದ್ದೇಬಿಹಾಳ(ವಿಜಯಪುರ): ಪಟ್ಟಣದಲ್ಲಿ ಡಬ್ಬಾ ಅಂಗಡಿಯನ್ನು ಹಾಕಲು ಮುಂದಾಗುತ್ತಿದ್ದ ಇಬ್ಬರನ್ನು ಪೊಲೀಸರು ವಿನಾಕಾರಣ ವಶಕ್ಕೆ ತೆಗೆದುಕೊಂಡು ಬಂಧನದಲ್ಲಿರಿಸಿದ್ದಾರೆ ಎಂದು ಆರೋಪಿಸಿದ ಮಾಜಿ ಶಾಸಕ ಸಿ.ಎಸ್. ನಾಡಗೌಡ ಅಪ್ಪಾಜಿ, ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಗುರು ತಾರನಾಳ, ಕೆಲವು ಪುರಸಭೆ ಸದಸ್ಯರು ಹಾಗೂ ಕಾರ್ಯಕರ್ತರು ಪೊಲೀಸ್ ಠಾಣೆಗೆ ಮುತ್ತಿಗೆ ಹಾಕಿ ಸಿಪಿಐ ಹಾಗೂ ಪಿಎಸ್ಐ ವಿರುದ್ಧ ಹರಿಹಾಯ್ದ ಘಟನೆ ಶನಿವಾರ ರಾತ್ರಿ ನಡೆದಿದೆ.
ಆಗಿದ್ದೇನು?: ಪಟ್ಟಣದ ಮಹಾಂತೇಶ ನಗರದ ಹುಡ್ಕೋಗೆ ಹೋಗುವ ಕಿತ್ತೂರು ರಾಣಿ ಚೆನ್ನಮ್ಮ ವೃತ್ತದ ಎದುರಿಗೆ ಇರುವ ಬೆಂಗಳೂರು ಬೇಕರಿ ಅಂಗಡಿ ಪಕ್ಕದಲ್ಲಿ ಖಾಸಗಿ ವ್ಯಕ್ತಿಗಳು ಹಾಕುತ್ತಿದ್ದ ಶೆಡ್ ವಿಷಯವಾಗಿ ಜಾಗದ ಮಾಲೀಕ ಹಾಗೂ ಶೆಡ್ ಹಾಕುವವರು, ಅಂಗಡಿಯವರ ಮಧ್ಯೆ ಮಾತಿನ ಚಕಮಕಿ ನಡೆದಿದೆ ಎನ್ನಲಾಗ್ತಿದೆ. ಈ ಹಿನ್ನೆಲೆಯಲ್ಲಿ ಸಿಪಿಐ ಆನಂದ ವಾಘಮೋಡೆ ಅವರು ಇಬ್ಬರು ಯುವಕರನ್ನು ಠಾಣೆಗೆ ಕರೆತಂದು ಬಂಧನದಲ್ಲಿರಿಸಿದ್ದಾರೆ ಎಂಬ ವಿಷಯ ತಿಳಿಯುತ್ತಿದ್ದಂತೆ ಠಾಣೆಗೆ ಆಗಮಿಸಿದ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಗುರು ತಾರನಾಳ, ಪುರಸಭೆ ಸದಸ್ಯ ವೀರೇಶ ಹಡಲಗೇರಿ, ಮಹೆಬೂಬ ಗೊಳಸಂಗಿ ಮೊದಲಾದವರು ದಿಢೀರ್ ಠಾಣೆಯ ಎದುರಿಗೆ ಪ್ರತಿಭಟನೆಗೆ ಮುಂದಾದರು.
ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಗುರು ತಾರನಾಳ ಮಾತನಾಡಿ, ಯುವಕರಾದ ಮುತ್ತು ಢವಳಗಿ ಮತ್ತು ಅಶೋಕ ಪಾಟೀಲ ಎನ್ನುವ ಇಬ್ಬರು ವ್ಯಕ್ತಿಗಳನ್ನು ಪೊಲೀಸರು ಬೆಳಗ್ಗೆಯಿಂದ ಠಾಣೆಯಲ್ಲಿ ಇಟ್ಟುಕೊಂಡಿದ್ದಾರೆ. ಯಾವುದೇ ದೂರು ಇಲ್ಲದಿದ್ದರೂ ಇವರನ್ನು ಕರೆತಂದಿಟ್ಟುಕೊಂಡಿರುವುದು ಕಾನೂನು ಬಾಹಿರವಾಗಿದೆ. ಈ ಬಗ್ಗೆ ಕೇಳಿದರೆ ಅವರಿಬ್ಬರೂ ಯಾವುದೋ ಅಧಿಕಾರಿಗೆ ಬೈದಿದ್ದಾರೆ. ಪುರಸಭೆ ಮುಖ್ಯಾಧಿಕಾರಿ ಹೇಳಿದ್ದರಿಂದ ಠಾಣೆಗೆ ಕರೆತಂದಿದ್ದೇವೆ ಎನ್ನುತ್ತಾರೆ.
ಮುಖ್ಯಾಧಿಕಾರಿಯನ್ನು ಕೇಳಿದರೆ ನಾನು ವಿಜಯಪುರದಲ್ಲಿದ್ದು ನನಗೇನೂ ಗೊತ್ತಿಲ್ಲ ಎನ್ನುತ್ತಿದ್ದಾರೆ. ಒಂದು ವೇಳೆ ಇವರಿಬ್ಬರ ವಿರುದ್ಧ ಎಫ್‌ಐಆರ್ ಆಗಿದ್ದರೆ ಅವರನ್ನು ಜೈಲಿಗೆ ಕಳಿಸಲಿ, ನಮ್ಮದೇನೂ ತಕರಾರು ಇಲ್ಲ. ಆದರೆ ಯಾವುದೇ ದೂರು ಇಲ್ಲದೆ ಠಾಣೆಗೆ ಕರೆತಂದಿರುವುದು ತಪ್ಪು. ಅವರನ್ನು ಬಿಟ್ಟು ಕಳಿಸದಿದ್ದರೆ ಠಾಣೆಯ ಮುಂದೆಯೇ ಉಪವಾಸ ಸತ್ಯಾಗ್ರಹ ಕುಳಿತುಕೊಳ್ಳುತ್ತೇವೆ ಎಂದು ಎಚ್ಚರಿಸಿದರು.
ಕಾಂಗ್ರೆಸ್ ಮುಖಂಡ ಸುರೇಶ ಪಾಟೀಲ ಮಾತನಾಡಿ, ಉದ್ಯಮಿ ರಾವಸಾಬ ದೇಸಾಯಿ ಅವರ ಬಿಲ್ಡಿಂಗ್ ಬಳಿ ಇವರಿಬ್ಬರು ಡಬ್ಬಾ ಅಂಗಡಿ ಇಡಲು ಹೋಗಿದ್ದರಿಂದ ಕರೆತಂದಿದ್ದೇವೆ ಎಂದು ಪೊಲೀಸರು ಹೇಳುತ್ತಾರೆ. ದೇಸಾಯಿ ಅವರನ್ನು ಕೇಳಿದರೆ ನಮಗೇನೂ ಸಂಬಂಧ ಇಲ್ಲ, ಅಲ್ಲಿ ಯಾವುದೇ ಡಬ್ಬಾ ಅಂಗಡಿ ಇಟ್ಟಿಲ್ಲ. ಸುಮ್ಮನೆ ನಮ್ಮನ್ನು ಇದರಲ್ಲಿ ಎಳೆದು ತರಬೇಡಿ ಎನ್ನುತ್ತಿದ್ದಾರೆ. ಯಾವುದೇ ಎಫ್‌ಐಆರ್ ಇಲ್ಲದೆ ಸಾರ್ವಜನಿಕರನ್ನು ಠಾಣೆಯಲ್ಲಿ ಇರಿಸಿಕೊಂಡಿದ್ದು ಸರಿ ಅಲ್ಲ. ಕೂಡಲೇ ಅವರನ್ನು ಬಿಟ್ಟು ಕಳಿಸಬೇಕು ಎಂದು ಆಗ್ರಹಿಸಿದರು.
ಇದನ್ನೂ ಓದಿ: ಬೆಂಗಳೂರು : ರಸ್ತೆ ಗುಂಡಿ ಮುಚ್ಚದ ಸರ್ಕಾರದ ವಿರುದ್ಧ ಟೆಕ್ಕಿ ಸಮೂಹದಿಂದ ಭಾರೀ ಆಕ್ರೋಶ
ಕಾರ್ಯಕರ್ತರ ಧರಣಿ ವಿಷಯ ತಿಳಿದು ಠಾಣೆಗೆ ಆಗಮಿಸಿದ ಮಾಜಿ ಶಾಸಕ ಸಿ.ಎಸ್. ನಾಡಗೌಡ ಅಪ್ಪಾಜಿ ಅವರು, ಖುದ್ದು ತಾವೇ ಪೊಲೀಸ್ ಠಾಣೆಗೆ ಆಗಮಿಸಿ ಸಿಪಿಐ, ಪಿಎಸ್ಐ ಜೊತೆ ಚರ್ಚಿಸಿದರು. ಸುಳ್ಳು ಕೇಸ್ ಕೊಟ್ಟಲ್ಲಿ ಪುರಸಭೆ ಮುಖ್ಯಾಧಿಕಾರಿ ಸಸ್ಪೆಂಡ್ ಆಗುತ್ತಾರೆ. ಪಟ್ಟಣದಲ್ಲಿ ಬಹಳಷ್ಟು ಅತಿಕ್ರಮಣ ಇದೆ. ಸುಮ್ಮನೆ ಏನೇನೋ ಮಾಡಬೇಡಿ. ಕೇಸ್ ಇಲ್ಲದೇ ಬಂಧನದಲ್ಲಿರಿಸುವುದು ಮಾನವ ಹಕ್ಕುಗಳ ಉಲ್ಲಂಘನೆಯಾಗುತ್ತದೆ ಎಂದು ತರಾಟೆಗೆ ತೆಗೆದುಕೊಂಡರು.
ಠಾಣೆ ಎದುರು ಉಂಟಾದ ಗೊಂದಲವನ್ನು ಸರಿಪಡಿಸಲು ಕರ್ತವ್ಯದಲ್ಲಿದ್ದ ಎಎಸ್ಐ ಮತ್ತು ಪೊಲೀಸ್ ಸಿಬ್ಬಂದಿ ಸಾಕಷ್ಟು ಹೆಣಗಬೇಕಾಯಿತು. ಕೆಲ ಸಮಯ ಪ್ರತಿಭಟನಾಕಾರರು ಮತ್ತು ಪೊಲೀಸರ ನಡುವೆ ವಾಗ್ವಾದವೂ ನಡೆಯಿತು. ಪುರಸಭೆ ಅಧ್ಯಕ್ಷೆ ಪ್ರತಿಭಾ ಅಂಗಡಗೇರಿ ಅವರ ಪತಿ, ಗುತ್ತಿಗೆದಾರ ರುದ್ರಗೌಡ ಅಂಗಡಗೇರಿ, ಪುರಸಭೆ ಮಾಜಿ ಸದಸ್ಯ ಕಾಮರಾಜ ಬಿರಾದಾರ, ವಕೀಲ ಬಿ.ಎ. ನಾಡಗೌಡ, ಹರೀಶ ಬೇವೂರ ಮತ್ತಿತರರು ಇದ್ದರು.
