ಮುದ್ದೇಬಿಹಾಳ (ವಿಜಯಪುರ): ಕಬ್ಬಿನ ಜಮೀನೊಂದಕ್ಕೆ ವಿದ್ಯುತ್ ಶಾರ್ಟ್ ಸರ್ಕ್ಯೂಟ್ನಿಂದಾಗಿ ಬೆಂಕಿ ತಗುಲಿ ಕಬ್ಬು ಬೆಳೆ ಹಾಗೂ ಸಾಗಿಸಲು ಬಂದಿದ್ದ ಟ್ರ್ಯಾಕ್ಟರ್ ಕೂಡಾ ಸುಟ್ಟು ಭಸ್ಮಗೊಂಡ ಘಟನೆ ತಾಲೂಕಿನ ಬಾಚಿಹಾಳ ಗ್ರಾಮದಲ್ಲಿ ನಡೆದಿದೆ.
ತಾಲೂಕಿನ ನಾಲತವಾಡ ಹೋಬಳಿ ವ್ಯಾಪ್ತಿಯಲ್ಲಿ ಈ ಘಟನೆ ನಡೆದಿದೆ. ಕಬ್ಬು ಕಟಾವು ಮಾಡುವ ವೇಳೆ ಕಬ್ಬಿನ ಮೇಲ್ಭಾಗದಲ್ಲಿ ಹಾಯ್ದು ಹೋಗಿರುವ ವಿದ್ಯುತ್ ತಂತಿಗಳ ಘರ್ಷಣೆಯಿಂದ ಹಾರಿದ ಬೆಂಕಿಯ ಕಿಡಿಗಳು ಈ ಅನಾಹುತಕ್ಕೆ ಕಾರಣವಾಗಿದೆ ಎನ್ನಲಾಗಿದೆ.
ರೈತ ಹನಮಂತ ನಾಗಪ್ಪ ತೊಗರಿ ಅವರಿಗೆ ಸೇರಿದ ಹೊಲಕ್ಕೆ ಬೆಂಕಿ ತಗುಲಿದ್ದು, ಅಪಾರ ಹಾನಿ ಸಂಭವಿಸಿದೆ. ಘಟನಾ ಸ್ಥಳಕ್ಕೆ ಆಗಮಿಸಿದ ಅಗ್ನಿ ಶಾಮಕ ಸಿಬ್ಬಂದಿ ಬೆಂಹಿ ನಂದಿಸಿದ್ದಾರೆ.
ಕಣ್ಣೀರು ಹಾಕಿದ ಟ್ರ್ಯಾಕ್ಟರ್ ಮಾಲೀಕ : ಕಡಿದ ಕಬ್ಬನ್ನು ಕಾರ್ಖಾನೆಗೆ ಸಾಗಿಸಲು ಟ್ರ್ಯಾಕ್ಟರ್ ತಂದಿದ್ದ ಮಾಲೀಕ ಶೇಖಪ್ಪ ಮಾನಪ್ಪ ಪತ್ತಾರ ಕಣ್ಣೆದುರಿಗೆ ಟ್ರ್ಯಾಕ್ಟರ್ ಭಸ್ಮವಾಗುತ್ತಿರುವುದನ್ನು ಕಂಡು ಕಣ್ಣೀರು ಸುರಿಸಿ ಗೋಳಾಡಿದ ದೃಶ್ಯ ಮನಕಲಕುವಂತಿತ್ತು.
