ವಿಜಯಪುರ : ಕೃಷಿ ವಲಯದಲ್ಲಿ ಕೆಲಸಗಾರರು ಸಿಗದೇ ರೈತರು ಜಮೀನು ಕೆಲಸಗಳಿಗೆ ಯಂತ್ರಗಳ ಮೊರೆ ಹೋಗಿದ್ದಾರೆ. ಆದರೆ, ಸಣ್ಣ ಮತ್ತು ಮಧ್ಯಮ ರೈತರಿಗೆ ಈ ಯಂತ್ರಗಳ ಬಳಕೆಯೂ ಸಹ ಹೆಚ್ಚು ಹೊರೆಯಾಗುತ್ತಿದೆ. ಈ ಹಿನ್ನೆಲೆ ರೈತರಿಗೆ ಕೈಗೆಟುಕುವ ಯಂತ್ರವೊಂದನ್ನ ಎಸ್ಎಸ್ಎಲ್ಸಿ ವಿದ್ಯಾರ್ಥಿಗಳು ತಯಾರಿಸಿದ್ದಾರೆ. ಇನ್ಸ್ಪೈರ್ ಅವಾರ್ಡ್ ಸಹ ಗೆದ್ದುಕೊಂಡಿದ್ದಾರೆ.
ಜಿಲ್ಲೆಯ ಇಂಡಿ ತಾಲೂಕಿನ ಸರ್ಕಾರಿ ಶಾಲೆಯ ಇಬ್ಬರು ವಿದ್ಯಾರ್ಥಿಗಳು ‘ಭೀಮ ಸಲಗ’ ಎಂಬ ಯಂತ್ರ ತಯಾರಿಸಿದ್ದಾರೆ. ಈ ಯಂತ್ರಕ್ಕೆ ಇನ್ಸ್ಪೈರ್ ಅವಾರ್ಡ್ ಸಹ ಬಂದಿದೆ. ಇಲ್ಲಿನ ನಾದ ಕೆ ಡಿ ಗ್ರಾಮದ ಸರ್ಕಾರಿ ಮಾಧ್ಯಮಿಕ ಶಾಲೆಯ ದೇವೀಂದ್ರ ಬಿರಾದಾರ್ ಹಾಗೂ ಕಾರ್ತಿಕ್ ಈ ಸಾಧನೆ ಮಾಡಿದ್ದಾರೆ.
ಹಳೆ ವಸ್ತು ಬಳಸಿ ಯಂತ್ರ ತಯಾರಿ
ಶಾಲೆಯಲ್ಲಿನ ನಿರುಪಯುಕ್ತ ವಸ್ತುಗಳು, ಹಳೆಯ ಫ್ಯಾನ್ ಭಾಗ, ಹಳೆಯ ಸೈಕಲ್ ವ್ಹೀಲ್ಗಳು ಸೇರಿ ಇತರ ವಸ್ತು ಬಳಸಿ ಕಟಾವು ಯಂತ್ರ ತಯಾರು ಮಾಡಿದ್ದಾರೆ. ಸುಮಾರು 25 ರಿಂದ 30 ಸಾವಿರ ರೂಪಾಯಿ ಖರ್ಚು ಮಾಡಿ ಯಂತ್ರವನ್ನು ತಯಾರಿಸಿ 2019-20ನೇ ಸಾಲಿನ ಇನ್ಸ್ಪೈರ್ ಅವಾರ್ಡ್ ವರ್ಚುವಲ್ ಸ್ಪರ್ಧೆಯಲ್ಲಿ ಭಾಗವಹಿಸಲಾಗಿತ್ತು.
ರಾಜ್ಯ ಸರ್ಕಾರ ಆಯೋಜಿಸುವ ಇನ್ಸ್ಪೈರ್ ಅವಾರ್ಡ್ನಲ್ಲಿ ಭಾಗಿಯಾಗಿ ರಾಜ್ಯಕ್ಕೆ 4ನೇ ಸ್ಥಾನ ಹಾಗೂ ರಾಷ್ಟ್ರಪಟ್ಟದಲ್ಲಿ 28ನೇ ಸ್ಥಾನ ಪಡೆದಿರುವುದಲ್ಲದೇ, 10 ಸಾವಿರ ಪ್ರೋತ್ಸಾಹ ಧನ ತಮ್ಮದಾಗಿಸಿಕೊಂಡಿದ್ದಾರೆ.
ವಿದ್ಯುತ್ನಿಂದ ಕಾರ್ಯ ನಿರ್ವಹಿಸುವ ಯಂತ್ರ
ಕೃಷಿ ಕೆಲಸಗಳಲ್ಲಿ ಪವರ್ ಟಿಲ್ಲರ್, ರೂಟರ್, ಬಿತ್ತನೆ ಕಾರ್ಯ, ಕಳೆ ಕತ್ತರಿಸುವುದು, ಔಷಧ ಸಿಂಪಡಣೆ, ಗುಂಡಿ ತೋಡುವುದು, ಗ್ರಾಸ್ ಕಟಿಂಗ್, ಪುಟ್ಟ ಪುಟ್ಟ ಮರಗಳ ಬಾರ್ಡರ್ ಕಟಿಂಗ್ ಸೇರಿದಂತೆ ಇತರ ಕೆಲಸಗಳನ್ನು ಈ ಒಂದೇ ಯಂತ್ರದ ಮೂಲಕ ಮಾಡಬಹುದಾಗಿದೆ.
ಪ್ರಾಯೋಗಿಕವಾದ ಯಂತ್ರವನ್ನು ಸದ್ಯ ವಿದ್ಯುತ್ ಸಹಾಯದಿಂದ ಉಪಯೋಗಿಸಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ಸೋಲಾರ್ ಹಾಗೂ ಇಂಧನ ಶಕ್ತಿ ಮೂಲಕ ನಿರ್ವಹಿಸುವಂತೆ ರೂಪಿಸುವ ಕನಸು ಹೊಂದಿದ್ದಾರೆ.
ಈಗಾಗಲೇ ಈ ಯಂತ್ರಕ್ಕೆ ಅವಾರ್ಡ್ ಬಂದ ಕಾರಣ ಮುಂಬರುವ ದಿನಗಳಲ್ಲಿ ಈ ಸಾಧನಕ್ಕೆ ಪೇಟೆಂಟ್ ಪಡೆದು ಹೆಚ್ಚಿನ ಸಂಖ್ಯೆಯಲ್ಲಿ ಉತ್ಪಾದಿಸಿ ಮಾರುಕಟ್ಟೆಯಲ್ಲಿ ಕಡಿಮೆ ಬೆಲೆಗೆ ರೈತರಿಗೆ ಸಿಗುವಂತೆ ಮಾಡುವ ಗುರಿಯನ್ನು ಈ ಯುವಕರು ಹೊಂದಿದ್ದಾರೆ.
