ಶಿರಸಿ: ಜೋಯಿಡಾದಲ್ಲಿ ಹೊಸದಾಗಿ ಪತಂಗ ಪಾರ್ಕ್ ನಿರ್ಮಾಣ ಮಾಡಲಾಗಿದ್ದು, ಪ್ರವಾಸೋದ್ಯಮಕ್ಕೆ ಹೆಸರುವಾಸಿಯಾಗಿರುವ ಜಿಲ್ಲೆಗೆ ಮತ್ತೊಂದು ಹಿರಿಮೆ ಬಂದಿದೆ.
ಜೋಯಿಡಾದಲ್ಲಿ ಅರಣ್ಯ ಇಲಾಖೆ ನಿರ್ಮಿಸಿದ ಸಾಲು ಮರದ ತಿಮ್ಮಕ್ಕ ಉದ್ಯಾನವನದೊಳಗೆ ಈ ಪತಂಗ ಪಾರ್ಕ್ ಇದೆ. ಪಾರ್ಕ್ನಲ್ಲಿ ಎಲ್ಲೆಂದೆರಲ್ಲಿ ಹಾಯಾಗಿ ಹಾರಾಡುವ ಪತಂಗಗಳು ಕಾಣುತ್ತವೆ. ಹೂವಿನಿಂದ ಹೂವಿಗೆ ಹಾರುತ್ತಾ ಕಣ್ಣಿಗೆ ಹಬ್ಬವನ್ನುಂಟು ಮಾಡೋ ಈ ಜೀವಿಗಳ ಸಾಲು ಪ್ರವಾಸಿಗರಿಗೆ ಅತ್ಯಂತ ಆಕರ್ಷಣೀಯವಾಗಿದೆ.
ಕಳೆದ ವರ್ಷ ಪಾರ್ಕ್ ನಿರ್ಮಾಣ ಕಾರ್ಯ ಕೈಗೊಂಡ ಅರಣ್ಯ ಇಲಾಖೆ ಈವರೆಗೂ ನೂರಕ್ಕೂ ಹೆಚ್ಚು ನಮೂನೆಯ ಪತಂಗಗಳನ್ನು ಗುರುತಿಸಿದೆ. ಆಂಗ್ಲೆಡ್ ಪಿಯರೋಟ್ ಗ್ರೆ ಕೌಂಟ್, ಗ್ರಾಸ್ ಡೆಮೊನ್, ಟಾನಿ ಕಾಸ್ಟರ್, ಗ್ರೆ ಪಾನ್ಸಿ, ಪ್ಯಾರಿಸ್ ಪಿಕಾಕ್, ಕಮ್ಯಾಂಡರ್, ಡಾರ್ಕ್ ಬ್ಲೂ ಟೈಗರ್, ಲೈಮ್ ಬಟರ್ ಪ್ಲೈ, ಪ್ಲೈನ್ ಟೈಗರ್ ಮೊದಲಾದ ಜಾತಿಯ ಪತಂಗಗಳು ಇಲ್ಲಿವೆ.
ದಾಂಡೇಲಿಯಿಂದ ಜೋಯಿಡಾ ಪ್ರವೇಶಿಸುವ ದಾರಿಯಲ್ಲೇ ಈ ಉದ್ಯಾನವನ ಕಂಡುಬರುತ್ತದೆ.