ಟ್ಯಾಗೋರ್ ಬೀಚ್​ನಲ್ಲಿ ಲೈಫ್​ಗಾರ್ಡ್ ಮೇಲೆ ಹಲ್ಲೆ.. ನಾಲ್ವರು ನೌಕಾನೆಲೆ ಸಿಬ್ಬಂದಿಯ ಬಂಧನ..

ಕುಡಿದ ಅಮಲಿನಲ್ಲಿ ನೌಕಾನಲೆ ಸಿಬ್ಬಂದಿ ಬೀಚ್ ಲೈಫ್​ಗಾರ್ಡ್ ಮೇಲೆ ಹಲ್ಲೆ ನಡೆಸಿರುವ ಘಟನೆ ಇಂದು ಕಾರವಾರದ ರವೀಂದ್ರನಾಥ ಟ್ಯಾಗೋರ್​ ಕಡಲತೀರದಲ್ಲಿ ನಡೆದಿದೆ.

ಕಾರವಾರ: ಕುಡಿದ ಅಮಲಿನಲ್ಲಿ ನೌಕಾನಲೆ ಸಿಬ್ಬಂದಿ ಬೀಚ್ ಲೈಫ್​ಗಾರ್ಡ್ ಮೇಲೆ ಹಲ್ಲೆ ನಡೆಸಿರುವ ಘಟನೆ ಇಂದು ಕಾರವಾರದ ರವೀಂದ್ರನಾಥ ಟ್ಯಾಗೋರ್​ ಕಡಲತೀರದಲ್ಲಿ ನಡೆದಿದೆ.

ಮುಂಬೈ ಮೂಲದ ಸುನೀಲ್ ಚೌದರಿ, ಕಮಲೇಶ್ ಯಾದವ್, ಕಮಲ್ ಕಿಶೋರ್, ಸತ್ಯೇಂದ್ರ ಖುಶ್ವಾಹ ಹಲ್ಲೆ ನಡೆಸಿದ ಆರೋಪಿಗಳು. ಮುಂಬೈ ಮೂಲದ ಶಿಪ್​ವೊಂದರಲ್ಲಿ ಕರ್ತವ್ಯದ ಮೇಲೆ ಕದಂಬ ನೌಕಾನೆಲೆಗೆ ಆಗಮಿಸಿದ್ದ ನಾಲ್ವರು,ಇಂದು ರವೀಂದ್ರನಾಥ ಟ್ಯಾಗೋರ್​​ ಕಡಲತೀರಕ್ಕೆ ಆಗಮಿಸಿದ್ದರು. ಕುಡಿದ ಅಮಲಿನಲ್ಲಿ ಸಮುದ್ರಕ್ಕಿಳಿದು ಮೋಜು ಮಸ್ತಿಯಲ್ಲಿ ತೊಡಗಿದ್ದವರಿಗೆ ಲೈಫ್​ಗಾರ್ಡ್ ಚಂದನ ಜೋಸಿ ಎಚ್ಚರಿಸಿದ್ದರು.

ಆದರೆ, ಇದನ್ನು ಲಕ್ಷ್ಯಕ್ಕೆ ತೆಗೆದುಕೊಳ್ಳದೆ ನೀರಿನಲ್ಲಿ ಈಜುತ್ತ ಮುಂದೆ ತೆರಳುತ್ತಿರುವುದರ ಬಗ್ಗೆ ಪ್ರಶ್ನಿಸಿದಾಗ ಕುಪಿತಗೊಂಡ ನೌಕಾನೆಲೆ ಸಿಬ್ಬಂದಿ, ಲೈಫ್​​ಗಾರ್ಡ್​ಗೆ ಅವಾಚ್ಯ ಶಬ್ದಗಳಿಂದ ನಿಂದಿಸಿ ಹಲ್ಲೆ ನಡೆಸಿದ್ದಾರೆ. ಇದನ್ನು ತಡೆಯಲು ಬಂದ ಬೀಚ್ ಇನ್​ಚಾರ್ಜ್ ನಿವೃತ್ತ ಸೈನಿಕ ಸತ್ಯಜಿತ್ ಪಡವಾಳಕರ್ ಮೇಲೂ ಹಲ್ಲೆ ಮಾಡಿದ್ದಾರೆ. ಬಳಿಕ ಸ್ಥಳದಲ್ಲಿದ್ದವರು ಪೊಲೀಸರಿಗೆ ಮಾಹಿತಿ ನೀಡಿದ್ದು, ಸ್ಥಳಕ್ಕಾಗಮಿಸಿದ ಪೊಲೀಸರು ನಾಲ್ವರನ್ನು ವಶಕ್ಕೆ ಪಡೆದು ಪ್ರಕರಣ ದಾಖಲಿಸಿದ್ದಾರೆ. ಈ ಬಗ್ಗೆ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.