ಕಳ್ಳತನಕ್ಕೆಂದು ಬಂದು ಕಣ್ಣಿಗೆ ಬಿದ್ದ ವಾಹನಗಳಿಗೆ ಬೆಂಕಿ ಹಚ್ಚಿ ದುಷ್ಕೃತ್ಯ ಮೆರೆದ ಕಿಡಿಗೇಡಿಗಳು

ದರೋಡೆ ಯತ್ನದಲ್ಲಿ ವಿಫಲವಾಗಿ ಬಳಿಕ ಆಟೋ, ಬೈಕ್​ಗೆ ಬೆಂಕಿ ಹಚ್ಚಿರುವುದಲ್ಲದೆ ಮತ್ತೊಂದು ಕಡೆ ತೆರಳಿ ಸರಣಿ ಕಳ್ಳತನ ನಡೆಸಿ ಕಿಡಿಗೇಡಿಗಳು ಪರಾರಿಯಾಗಿದ್ದಾರೆ. ಈ ಸಂಬಂಧ ಉಡುಪಿ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಉಡುಪಿ: ‌ ಸರಣಿ ದರೋಡೆ ಯತ್ನ ನಡೆಸಿ‌‌ ಸಿಕ್ಕ‌ ಸಿಕ್ಕ‌ ವಾಹನ ಸುಟ್ಟು ‌ಹಾಕಿರುವ ಘಟನೆ ಬೈಲೂರು ಹಾಗೂ ಮಾರ್ಪಳ್ಳಿಯಲ್ಲಿ ನಡೆದಿದೆ. ಇಲ್ಲಿನ ಬೈಲೂರು ವಾರ್ಡ್​​​​ನ ದುರ್ಗಾ ನಗರದಲ್ಲಿ ಬೈಕ್, ಆಟೋಗಳಿಗೆ ಕಿಡಿಗೇಡಿಗಳು ಬೆಂಕಿ ಹಚ್ಚಿ ಪರಾರಿಯಾಗಿದ್ದಾರೆ.

ಒಂದು ಮನೆಯ ಗಾಜು ಒಡೆದು ಮತ್ತೊಂದು ಮನೆಯಲ್ಲಿ ಇನ್ವರ್ಟರ್ ವೈಯರ್ ಕಟ್ ಮಾಡಿ ದರೋಡೆ ಯತ್ನ ನಡೆಸಲಾಗಿದೆ. ತಡರಾತ್ರಿ 2 ಗಂಟೆ ಸುಮಾರಿಗೆ ಕಳ್ಳರು ಕೈಚಳಕ ತೋರಿದ್ದು, ಬೈಲೂರಿನಿಂದ ಒಂದು ಕಿಲೋ ಮೀಟರ್ ದೂರದಲ್ಲಿ ಮತ್ತೆ ಸರಣಿ ಕಳವು ನಡೆದಿದೆ.

ಬೈಲೂರು ಭಾಗದಲ್ಲಿ ದರೊಡೆ ಯತ್ನ ನಡೆಸಿ ವಿಫಲವಾಗಿ ಬಳಿಕ ಮಾರ್ಪಳ್ಳಿಯಲ್ಲಿ ಸರಣಿ ಕಳ್ಳತನ ನಡೆಸಿದ್ದಾರೆ. ಆಟೋದಲ್ಲಿದ್ದ 2 ಸಾವಿರ ನಗದು, ದೇವಸ್ಥಾನದ ಕಾಣಿಕೆ ಹುಂಡಿ ಕಳವು ಯತ್ನ ನಡೆಸಿ ಮನೆಯೊಳಗೆ ನುಗ್ಗಿ ಚಿನ್ನ ಕಳವು‌ ಮಾಡಿದ್ದಾರೆ. ಈ ಸಂಬಂಧ ಉಡುಪಿ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಇದನ್ನೂ ಓದಿ: 'ಖಾಯಂ ಕೆಲಸ ಬೇಕಂದ್ರೇ ನಿನ್ನ ಬೆತ್ತಲೆ ವಿಡಿಯೋ ಕಳ್ಸು..' ಎಲಾ ಇವ್ನಾ!