ಉಡುಪಿ: ಗೋಕರ್ಣದಲ್ಲಿ ನಡೆದ ರಸ್ತೆ ಅಪಘಾತದಲ್ಲಿ ಉಡುಪಿ ಮೂಲದ ಇಬ್ಬರು ವಿದ್ಯಾರ್ಥಿಗಳು ಮೃತಪಟ್ಟಿರುವ ಘಟನೆ ನಡೆದಿದೆ.
ನಗರದ ಅಂಬಲಪಾಡಿ ದೇವಳ ಸಮೀಪದ ನಿವಾಸಿ ಸತೀಶ್ ಶೆಟ್ಟಿ ಎಂಬವರ ಮಗ ಸಯನ್ ಶೆಟ್ಟಿ (19) ಹಾಗೂ ಬ್ರಹ್ಮಗಿರಿಯ ನಾಯರ್‌ ಕೆರೆ ಬಳಿಯ ನಿವಾಸಿ ರೇಖಾ ಸಾಗರಿಕ ಎಂಬವರ ಮಗ ಆರ್ತಿಕ್ ಸಾಲ್ಯಾನ್ (19) ಮೃತಪಟ್ಟ ವಿದ್ಯಾರ್ಥಿಗಳು.
ಮಣಿಪಾಲ ಮಾಹೆಯ ಬಿಬಿಎ ವಿದ್ಯಾರ್ಥಿಗಳಾದ ಇವರು ನಾಲ್ವರು ಗೆಳೆಯರು ಒಟ್ಟಾಗಿ ಎರಡು ಬೈಕ್ನಲ್ಲಿ ಗೋಕರ್ಣಕ್ಕೆ ತಿರುಗಾಡಲು ತೆರಳಿದ್ದರು. ಈ ವೇಳೆ ರಾಷ್ಟ್ರೀಯ ಹೆದ್ದಾರಿ 66ರಲ್ಲಿ ಸಯನ್ ಹಾಗೂ ಆರ್ತಿಕ್ ಸಾಗುತ್ತಿದ್ದ ಬೈಕ್ಗೆ ಎದುರಿನಿಂದ ಬಂದ ಲಾರಿ ಡಿಕ್ಕಿ ಹೊಡೆದಿದೆ ಎನ್ನಲಾಗುತ್ತಿದೆ.
ಗಂಭೀರವಾಗಿ ಗಾಯಗೊಂಡ ಇವರಿಬ್ಬರು ಸ್ಥಳದಲ್ಲೇ ಮೃತಪಟ್ಟಿದ್ದು, ಸ್ಥಳೀಯ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
