ಅಂಗಡಿ ತೆರೆಯಲು ಜಿಲ್ಲಾಧಿಕಾರಿ ಆದೇಶವಿದ್ದರೂ ಬೈಂದೂರು ಎಸ್​ಐನಿಂದ ಹಲ್ಲೆ: ಹಾಪ್​ಕಾಮ್ಸ್​ ವ್ಯಾಪಾರಿ

ಜಿಲ್ಲಾಧಿಕಾರಿ ಅನುಮತಿ ನೀಡಿದ್ದ ಹಾಪ್​ಕಾಮ್ಸ್ ಮಳಿಗೆಗಳನ್ನು ನಡೆಸುತ್ತಿದ್ದ ವ್ಯಕ್ತಿಯ ಮೇಲೆ ಬೈಂದೂರು ಮಹಿಳಾ ಎಸ್​ಐ ಲಾಠಿಯಿಂದ ಹಲ್ಲೆ ಮಾಡಿದ ಆರೋಪ ಕೇಳಿಬಂದಿದೆ.

ಉಡುಪಿ: ಜಿಲ್ಲೆಯ ಬೈಂದೂರು ಎಸ್ಐ ಸಂಗೀತಾ ಗೂಂಡಾಗಿರಿ ಮಾಡಿದ್ದು, ಹಾಪ್​ಕಾಮ್ಸ್​​ ಮಳಿಗೆಗೆ ನುಗ್ಗಿ ವ್ಯಾಪಾರಿ ಮೇಲೆ ಲಾಠಿ ಬೀಸಿದ ಆರೋಪ ಇವರ ಮೇಲೆ ಕೇಳಿ ಬಂದಿದೆ.

ನಿನ್ನೆ ಉಡುಪಿ ಜಿಲ್ಲಾಧಿಕಾರಿ ಮೂರು ಹಾಪ್​ಕಾಮ್ಸ್​ ಮಳಿಗೆಗಳನ್ನು ತೆರೆಯಲು ಆದೇಶ ನೀಡಿದ್ದರು. ಬೆಳಗ್ಗೆ ಏಳು ಗಂಟೆಯಿಂದ ಸಂಜೆ 7 ಗಂಟೆಯ ತನಕ ಮಳಿಗೆಗಳನ್ನು ತೆರೆಯಲು ಅವಕಾಶ ನೀಡಲಾಗಿತ್ತು. ಈ ಹಿನ್ನೆಲೆಯಲ್ಲಿ ಉಪ್ಪುಂದದ ಹಾಪ್​ಕಾಮ್ಸ್​ ಮಳಿಗೆ ತೆರೆಯಲಾಗಿತ್ತು. ಸ್ಥಳಕ್ಕೆ ಬಂದ ಬೈಂದೂರು ಎಸ್​ಐ ಸಂಗೀತ ಹಾಪ್​ಕಾಮ್ಸ್ ವ್ಯಾಪಾರಿ ಮೇಲೆ ಲಾಠಿಯಿಂದ ಹಲ್ಲೆ ನಡೆಸಿರುವ ಆರೋಪ ಕೇಳಿಬಂದಿದೆ.

ವ್ಯಾಪಾರಿ ತೋರಿಸಿದ್ದ ಜಿಲ್ಲಾಧಿಕಾರಿಯ ಆದೇಶಪ್ರತಿಯನ್ನು ಹರಿದು ಹಾಕಿ, ದರ್ಪ ತೋರಿಸಿದ್ದಾರೆ ಎಂದು ವ್ಯಾಪಾರಿ ಆರೋಪಿಸಿದ್ದಾರೆ. ಇಲಾಖೆಗಳ ನಡುವೆ ಸಮನ್ವಯತೆಯ ಕೊರತೆಯಿಂದ ಈ ಘಟನೆ ನಡೆದಿದೆ ಎನ್ನಲಾಗಿದೆ.