ರಾಜ್ಯಮಟ್ಟದ ಖೋ-ಖೋ: ಮೈಸೂರು ಮಹಿಳಾ ತಂಡ, ತುಮಕೂರು ಪುರುಷರ ತಂಡ ಪ್ರಥಮ

2019-20 ನೇ ಸಾಲಿನ ರಾಜ್ಯಮಟ್ಟದ ಪದವಿಪೂರ್ವ ವಿದ್ಯಾರ್ಥಿಗಳ ಖೋ-ಖೋ ಪಂದ್ಯಾವಳಿಯಲ್ಲಿ ಮೈಸೂರು ಮಹಿಳಾ ತಂಡ ಮತ್ತು ತುಮಕೂರು ಪುರುಷರ ತಂಡ ಪ್ರಥಮ ಸ್ಥಾನ ಪಡೆದಿವೆ.

ತುಮಕೂರು: 2019-20 ನೇ ಸಾಲಿನ ರಾಜ್ಯಮಟ್ಟದ ಪದವಿ ಪೂರ್ವ ಶಿಕ್ಷಣ ವಿದ್ಯಾರ್ಥಿಗಳ ಖೋ-ಖೋ ಪಂದ್ಯಾವಳಿಯಲ್ಲಿ ಮೈಸೂರು ಮಹಿಳಾ ತಂಡ ಮತ್ತು ಜಿಲ್ಲೆಯ ಪುರುಷರ ತಂಡ ಪ್ರಥಮ ಸ್ಥಾನ ಗಳಿಸಿದವು.

ನಗರದ ಸರ್ಕಾರಿ ಜೂನಿಯರ್ ಕಾಲೇಜು ಮೈದಾನದಲ್ಲಿ ಪದವಿ ಪೂರ್ವ ಶಿಕ್ಷಣ ಇಲಾಖೆ, ಸರ್ವೋದಯ ಪದವಿ ಪೂರ್ವ ಕಾಲೇಜು ಮತ್ತು ವಿದ್ಯಾನಿಧಿ ಪದವಿಪೂರ್ವ ಕಾಲೇಜು ಇವುಗಳ ಸಂಯುಕ್ತಾಶ್ರಯದಲ್ಲಿ ಮೂರು ದಿನಗಳ ಕಾಲ ಹಮ್ಮಿಕೊಳ್ಳಲಾಗಿದ್ದ 2019-20ನೇ ಸಾಲಿನ ರಾಜ್ಯಮಟ್ಟದ ಪದವಿಪೂರ್ವ ಶಿಕ್ಷಣ ವಿದ್ಯಾರ್ಥಿಗಳ ಖೋ-ಖೋ ಪಂದ್ಯಾವಳಿಯಲ್ಲಿ ಮೈಸೂರು ಮಹಿಳಾ ತಂಡ ಮತ್ತು ತುಮಕೂರು ಪುರುಷರ ತಂಡ ಪ್ರಥಮ ಸ್ಥಾನ ಗಳಿಸಿದವು.

ನವಂಬರ್ ಒಂದರಿಂದ ಪ್ರಾರಂಭವಾದ ಈ ಪಂದ್ಯಾವಳಿಗಳಲ್ಲಿ ರಾಜ್ಯದ ಮಹಿಳಾ ಹಾಗೂ ಪುರುಷರ ಒಟ್ಟು 64 ತಂಡಗಳು ಪಾಲ್ಗೊಂಡಿದ್ದವು. ಇಂದು ಸೆಮಿಫೈನಲ್ ನಲ್ಲಿ ಪುರುಷರ ತಂಡ ತುಮಕೂರು-ದಾವಣಗೆರೆ ತಂಡವನ್ನು ಸೋಲಿಸಿ, ಚಿಕ್ಕೋಡಿ -ಮೈಸೂರು ತಂಡವನ್ನು ಸೋಲಿಸಿ, ಫೈನಲ್ ಹಂತ ತಲುಪಿದ್ದವು. ಫೈನಲ್ ನಲ್ಲಿ ತುಮಕೂರು ತಂಡ ಮೈಸೂರು ತಂಡವನ್ನು ಸೋಲಿಸುವ ಮೂಲಕ ಪ್ರಥಮ ಸ್ಥಾನ ಗಳಿಸಿತು.

ಅದೇ ರೀತಿ ಮಹಿಳೆಯರಲ್ಲಿ ತುಮಕೂರು-ದಕ್ಷಿಣ ಕನ್ನಡ ತಂಡವನ್ನು ಸೋಲಿಸಿ, ಮೈಸೂರು-ಮಂಡ್ಯ ತಂಡವನ್ನು ಸೋಲಿಸಿ ಫೈನಲ್ ಹಂತ ತಲುಪಿದ್ದವು. ಫೈನಲ್ ನಲ್ಲಿ ತುಮಕೂರು ತಂಡವನ್ನು ಪರಾಭವಗೊಳಿಸಿದ ಮೈಸೂರು ತಂಡ ಪ್ರಥಮ ಸ್ಥಾನ ಗಳಿಸಿತು.

ರಾಜ್ಯಮಟ್ಟದ ಖೋ-ಖೋ ಪಂದ್ಯಾವಳಿಯ ಸಂಚಾಲಕರಾದ ಟಿ.ಆರ್ ಬಸವರಾಜು ಮಾತನಾಡಿ, ಬಾಲಕರ 32 ಹಾಗೂ ಬಾಲಕಿಯರ 32 ತಂಡಗಳು ಪಂದ್ಯಾವಳಿಯಲ್ಲಿ ಪಾಲ್ಗೊಂಡಿದ್ದವು. ಈ ಪಂದ್ಯಾವಳಿಯಲ್ಲಿ ಉತ್ತಮ ಪ್ರದರ್ಶನ ತೋರಿದ 12 ಪುರುಷ ಹಾಗೂ 12 ಮಹಿಳಾ ಕ್ರೀಡಾಪಟುಗಳನ್ನು ರಾಷ್ಟ್ರಮಟ್ಟಕ್ಕೆ ಆಯ್ಕೆ ಮಾಡಲಾಗುವುದು, ಇಂತಹ ಕಾರ್ಯಕ್ರಮ ಹಮ್ಮಿಕೊಳ್ಳುವುದರಿಂದ ಅವರಲ್ಲಿನ ಪ್ರತಿಭೆ ಅನಾವರಣಗೊಳಿಸಲು ಸಹಕಾರಿಯಾಗುತ್ತದೆ ಎಂದರು.