ತುಮಕೂರು: ಲಾಕ್ಡೌನ್ ಉಲ್ಲಂಘಿಸಿ ಕರ್ತವ್ಯ ನಿರತ ಗೃಹ ರಕ್ಷಕ ಮಹಿಳಾ ಸಿಬ್ಬಂದಿ, ಕಂದಾಯ ಇಲಾಖಾ ಸಿಬ್ಬಂದಿಗೆ ನಿಂದಿಸಿದ ವ್ಯಕ್ತಿಗೆ ತುರುವೇಕೆರೆ ನ್ಯಾಯಾಲಯವು 50 ಸಾವಿರ ರೂ. ಶೂರಿಟಿ ತೆಗೆದುಕೊಂಡು ಬಿಡುಗಡೆ ಮಾಡುವಂತೆ ಆದೇಶ ನೀಡಿದೆ.
ಅಲ್ಲದೇ ಕೊರೊನಾ ವೈರಸ್ ಭೀತಿ ಹಿನ್ನೆಲೆ ಹೈಕೋರ್ಟ್ ನಿರ್ದೇಶನದಂತೆ ಏಪ್ರಿಲ್ 20ರಂದು 50 ಸಾವಿರ ರೂ ಶೂರಿಟಿ ಬಾಂಡ್ ನೀಡುವಂತೆ ಆದೇಶಿಸಿದೆ. ತುರುವೇಕೆರೆಯ ಲೋಕಮ್ಮನಹಳ್ಳಿಯ ಮಲ್ಲಿಕಾರ್ಜುನ್ ಎಂಬಾತ ಕರ್ತವ್ಯಕ್ಕೆ ಅಡ್ಡಿಪಡಿಸಿ ಅವಾಚ್ಯ ಶಬ್ದಗಳಿಂದ ನಿಂದಿಸಿ ಬೆದರಿಕೆ ಹಾಕಿದ್ದಾರೆ ಎಂದು ಆರೋಪಿಸಿ ತಹಶೀಲ್ದಾರ್ ತುರುವೇಕೆರೆ ಪೊಲೀಸ್ ಠಾಣೆಗೆ ಇಂದು ಬೆಳಗ್ಗೆ ದೂರು ನೀಡಿದ್ದರು.
ತುರುವೇಕೆರೆ ಪಟ್ಟಣದ ದಬ್ಬೇಘಟ್ಟ ರಸ್ತೆ ಕೆಇಬಿ ಕಚೇರಿ ಬಳಿ ಆರೋಪಿಯು ಕೊರೊನಾ ವೈರಸ್ ಜಾಗೃತಿ ಮೂಡಿಸುತ್ತಿದ್ದ ಸಿಬ್ಬಂದಿಯೊಂದಿಗೆ ಅನುಚಿತವಾಗಿ ನಡೆದುಕೊಂಡಿದ್ದ. ಕಾರು ನಿಲ್ಲಿಸುವಂತೆ ತಡೆದಿದಕ್ಕೆ ಆಕ್ರೋಶಗೊಂಡು ಸಿಬ್ಬಂದಿಗೆ ಆವಾಜ್ ಹಾಕಿದ್ದ. ತುರುವೇಕೆರೆ ಪೊಲೀಸರು ಈತನನ್ನು ಬಂಧಿಸಿ ಇಂದು ತುರುವೇಕೆರೆ ಹಿರಿಯ ನ್ಯಾಯಾಧೀಶರ ಹೋಮ್ ಆಫೀಸ್ ಗೆ ಹಾಜರುಪಡಿಸಿದ್ದರು.
