ಬಯಲು ಶೌಚಾಲಯಕ್ಕೆ ಹೋದ ಯುವಕ ನಾಪತ್ತೆ: ಪ್ರಕರಣ ದಾಖಲು

ಹೊಸಪೇಟೆಯ ಹೆಲ್​ಎಲ್​ಸಿ ಕಾಲುವೆ ಬಳಿ ಬಯಲು ಶೌಚಾಲಯಕ್ಕೆ ಹೋದ ಯುವಕನೊಬ್ಬ ನಾಪತ್ತೆಯಾಗಿರುವ ಘಟನೆ ನಡೆದಿದೆ.

ಹೊಸಪೇಟೆ: ನಗರದ ರೈಲ್ವೆ ಸ್ಟೇಷನ್ ಬಳಿಯ ಹೆಲ್​ಎಲ್​ಸಿ ಕಾಲುವೆಯಲ್ಲಿ ಯುವಕನೊಬ್ಬ ನಾಪತ್ತೆಯಾಗಿರುವ ಘಟನೆ ಬೆಳಕಿಗೆ ಬಂದಿದೆ.

ಇಲ್ಲಿನ 6ನೇ ವಾರ್ಡ್​ನ ಮುತ್ತ್ಯಾಲಮ್ಮ ದೇವಸ್ಥಾನ ಬಳಿಯ ನಿವಾಸಿ ಮಂಜುನಾಥ (27) ಕಾಣೆಯಾದ ಯುವಕ. ಮಂಜುನಾಥ ಪ್ರತಿದಿನ ಹೊರಗಡೆ ಬಯಲು ಶೌಚಾಲಯಕ್ಕೆ ಹೋಗುತ್ತಿದ್ದ. ಕಾಲುವೆ ಬಳಿ ನಿನ್ನೆ ಬೆಳಗ್ಗೆ ಬಯಲು ಶೌಚಾಲಯಕ್ಕೆ ಹೋದವನು ಮರಳಿ ಬಂದಿಲ್ಲ.‌ ಎಲ್​ಎಲ್​​ಸಿ ಕಾಲುವೆ ಬಳಿ ಚಪ್ಪಲಿ ದೊರೆತಿದ್ದು, ಮಂಜುನಾಥಗೆ ಈಜಲು ಬರುವುದಿಲ್ಲ ಎಂದು ತಿಳಿದು ಬಂದಿದೆ.

ಬೆಂಗಳೂರಿನಲ್ಲಿ ಅಡುಗೆ ಕೆಲಸ ಮಾಡುತ್ತಿದ್ದ ಅವರು, ಕೊರೊನಾ ಹಿನ್ನೆಲೆಯಲ್ಲಿ ಎರಡು ತಿಂಗಳು ಹಿಂದೆ ಹೊಸಪೇಟೆಗೆ ಬಂದಿದ್ದರು ಎಂದು ಮಂಜುನಾಥನ ಸಹೋದರ ಪೊಲೀಸರಿಗೆ ತಿಳಿಸಿದ್ದಾರೆ.‌ ಈ ಕುರಿತು ಗ್ರಾಮೀಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.